ILOOWALI 40 - KITABI HABARI MOPIOHE

Tei Yusu helo tombangao̒ boli lo tohiilopo lotahi tahangia

¹ Dengolo wakutu mola lapatio mao̒ tamomayawa duulota li olongia lo Masiri, deu̒yito-yito tamoo-ngulusia minumani wau tamoo-ngulusia lotilio, helohutu totala toli olongia.

² Yi maloingo ti olongia totahi pomayaalio duulota boito,

³ lapatao̒ pilopo tuwotio timongolio duulota ode delomo tutupa, tobele lotau̒wa tamookawalia bele biluloa̒ saaha li olongia, to tambati lei Yusu tilahangialio.

⁴ Lohiheo olo timongolio totutupa boito, wau tau̒wa lo tamookawalia bele biluloa̒ saaha li olongia malongohi mao̒ tuugasi olei Yusu u mohinta olimongolio.

⁵ Tou̒ huilio tuwau tamoo-ngulusia minumani wau tamoo-ngulusia loti boito ngota-ngota loo̒ tohiilopo. Boli lo tohiilopo limongolio boito diila tutuuwauwa.

⁶ Tou̒ tei Yusu lonao̒ mai ode limongolio loombulio mola didimodupo, timongolio oontonga mao̒ suukali.

⁷ Lapatao̒ tio lohintu mao̒, “Yilongola mongo wutato malo odito suukali todulahee botie?”

⁸ Tametao̒ limongolio, “Ohui amiaatia loo̒ tohiilopo, wau diaaluo mao̒ tamotota boliilio.” Ualei Yusu, “Bo Allahu Taa̒ala wambao̒ tamopo luasi mai tau motombanga boli lo tohiilopo. Nte wunggulia mai tohiilopomu boito.”

⁹ Tamoo-ngulusia minumani boito malo loi̒ya, “To delomo tohiilopo boito watia loo̒onto woluo bungo lo angguru totalu lowatia.

¹⁰ Bungo lo angguru boito otango mohelu totolu. Boheli tataa-ngolio mahe oduungai, bubuu-ngaalio hua̒a longoa̒be mola, tulusi hungolio malowali lolutu.

¹¹ Tou̒ boito watia donggo dihudihu halati lo minumani li olongia, tulusi pilohinta mao̒ lowatia olio.”

¹² Ualei Yusu, “Uti-utieelo tombangio: Tango totolu boito boliilio mao̒ tolo hui.

¹³ To delomo tolo hui botie ti olongia mamopo bebasi mao̒ olemu, tio mamo ngambungu olemu wau mopowalinga olemu ode huhuloa̒mu ubohu-bohulio mai. Yio̒ mamohinta mao̒ halati lo minumani odeli olongia debo odelo ubohu-bohulio mai.

¹⁴ Bo Eelai mai watia wonu owowoluwoamu malopiohe. Tulungia mao̒ potunggula mota sua̒li lowatia odeli olongia, alihu watia maa bebasialio monto tutupa botie.

¹⁵ Sababu, otutuulio mao̒ muloololio mai watia pilotetei̒o lonto lipu taulo Ibrani wau boli tewe olo, to Masiri botie, diila pee̒enta mao̒ watia helohutu u hitua-tuawua umoleeto tunggula watia musi pilopo tuwoto ode delomo tutupa.”

¹⁶ Tou̒ tamoo-ngulusia loti boito lotota deu̒ boliilio lo tohiilopo lo tamoo-ngulusia minumani boito mopiohe, yi tio olo malo loi̒ya mao̒ odelei Yusu, “Watia olo loo̒ tohiilopo, wuntu-wuntu kalanji lo roti mohelu totolu to lunggongo.

¹⁷ To delomo kalanji u toitaato daa̒ tua-tuanga kuukisi u hidala-dalaala odeli olongia, bo bubuu-lungiyalo tilumombotai mailonga kukuu-kisiyaalo boito.”

¹⁸ Tametao̒ lei Yusu, “Uti-utieelo tombangio lo tohiilopo boito: Tolo kalanji boito boliilio tolo hui mola.

¹⁹ To delomo tolo hui mola botie ti olongia mamopoa̒hu mai tau molimade lunggongumu lapatao̒ mopontayungo milatemu to wolihi tuwau, wau bubuu-lungiyalo mamonga mao̒ tapumu.”

²⁰ Tolo hui lapatio mao̒ yi todulahee iloowali mai li olongia, wau tio helohutu potihunggu daa̒ ode ngoa̒amila pogawee. Tio lomalentao̒ alihu tamoo-ngulusia minumani wau tamoo-ngulusia roti pilei̒ lualio mao̒ lonto tutupa wau pilei̒ delolio mai ode talu lo ngoa̒amila pogawee lobele biluloa̒ saaha li olongia.

²¹ Tamoo-ngulusia minumani pilopo walingio mao̒ ode huhuloa̒ ubohu-bohulio mai.

²² Bo tamoo-ngulusia roti hilukuumani yila-yilateelo mao̒. Ngoa̒amilalo boito lotoduo mai lotuuu̒de lou̒ wolo u mailoi̒ya lei Yusu.

²³ Bo tamoo-ngulusia minumani boito diilalo loe̒ela olei Yusu. Tio sama-samaata lolipata olei Yusu.