ILOOWALI 38 - KITABI HABARI MOPIOHE

Tei Yehuda woli Tamar

¹ Otanu tou̒ boito tei Yehuda lololaa mao̒ mongo wutatio wau lotibiluloa̒ pee̒-pee̒enta wolei Hira, talolai̒ ngota asaliilio mai lonto Adulam.

² Mota teto tei Yehuda loo̒taawa wolo taabua ngota lo Kanaa̒n walae̒e Sua, lapatao̒ timongolio malonika.

³ Walai̒ mongolio bohulio talolai̒, yilohia mao̒ liyamolio tanggula Er.

⁴ Walao̒ oluolio olo, ilunteelio Onan.

⁵ Walao̒ otolulio debo talolai̒ wau ilunteelio Syela. Tou̒ tei Syela pilotutulio mai tei Yehuda donggo mola to Kejib.

⁶ Tei Yehuda malo ponika mao̒ olei Er, walai̒o tamohuhula daa̒ woli Tamar.

⁷ Watade lei Er moleeta daa̒, tilinggula Eeya lomuluka to olio wau lomate olio yila-yilateelo mao̒.

⁸ Lapatao̒ tei Yehuda loloi̒ya mao̒ odelei Onan tawaliyali lei Er, “Ponao̒lo odeli janda likaakamu, wau potuluheo̒ wolio. Poo̒polua mao̒ uwajibu ode olio, sababu yio̒ tawaliyali lodilelio; wolo odito tikaakamu mowali moo̒tapu mai wali.”

⁹ Bo otaawa lei Onan deu̒ mongo walai̒o demaa diila mowali hakuulio. Oditolio, timii̒du tio mou̒lauwa wolo janda likaakalio boito, hiluliyalio mao̒ manilio helo popao̒ to bulemengio alihu tikaakalio diila tamoo̒tapu mai wali.

¹⁰ Huhutuulio boito loo̒muluka to Eeya, wau Eeya malomate olio olo yilate-yilateelo mao̒.

¹¹ Lapatao̒ loloi̒ya mao̒ tei Yehuda odeli Tamar tiyamo moluhengio boito, “Pohualingolo ode bele lomongo dulaa̒mu wau potibiluloo̒lo mota teto odelo janda dilumutu walau̒uu̒ Syela mowali leidaa̒ mai.” Tio loloi̒ya mao̒ odito kalana moohe diila bolo tei Syela mapatee lo Eeya olo mate-mateelo mao̒, debo odelo tikaakalio duulota. Yi malo hualinga mota ti Tamar ode bele lomongo dulaa̒lio.

¹² Diila lohiheo mola lapatio mao̒ dile lei Yehuda yilate. Lapatao̒ lopalutao̒ wakutu u lotilimi, tei Yehuda loheinga olei Hira, sahabatilio lonto Adulam boito, lonao̒ mota ode Timna, tambati u hepo huntingalo lambuto hihii-mbaalio.

¹³ Ti Tamar loo̒tapu habari deu̒ tei Yehuda tiyamo moluhengio mamonao̒ mai ode Timna u mohuntinga lambuto lo hihii-mbaalio.

¹⁴ Yi tio malo potuloa̒a pakeyangi li jandalio wolo pakeyangi uwewo. Bayalio tilau̒belio wolo kaingi, lapatao̒ lotihuloo̒lo mola tio to huhebu hulubangi lokota Enaim, u dudutuulio todalalo udulu-dulunga ode Timna. Otaawa tutu li Tamar deu̒ tei Syela, walae̒e Yehuda tapulitio, maleidaa̒ bo tio diipo pilopo nikaalio olo wolo tabohulotau boito.

¹⁵ Tou̒ tei Yehuda loo̒onto mao̒ oli Tamar, yilantobio taabua boito tasuuntali ngota, sababu bayalio tau̒tau̒bu.

¹⁶ Lapatao̒ tei Yehuda lohimbide mota olio totili lodalalo boito, wau loloi̒ya mao̒, “Ngoolo mao̒ u pohileemu?” Diila otaawalio deu̒ taabua boito walao̒ moluhengio lohihilao. Ti Tamar lolametao̒, “Bolo toli Tuani.”

¹⁷ Tei Yehuda luli loloi̒ya mao̒, “Wau̒ mamongohi mai olemu batade buboto tuwau.” Tametao̒ li Tamar, “Mowali, asali woluo pongaku, dilumutu ti Tuani molao batade boito.”

¹⁸ “Wolo pongaku?” yilintu mao̒ lei Yehuda. Tametao̒ li Tamar, “Wohia mai olaatia capu li Tuani wolo taliilio wau olo tunggadu u woluo toli Tuani boito.” Tei Yehuda longohi mao̒ uu̒u-pangowalo boito to olio, lapatao̒ timongolio lodiilea wau ti Tamar maa ilombodaa̒.

¹⁹ Ti Tamar luli lohualinga mota ode belelio wau hiluo̒lio mao̒ kaingi tau̒bu bayalio, lapatao̒ luli lopopake mao̒ kaingi lo jandalio.

²⁰ Dengolo wakutu mola lapatio mao̒ tei Yehuda malolao olei Hira, sahabatilio, mota lodepitaa batade boito wau luli lohile mao̒ upango u mailohilio boito odelo pilongaku, bo tei Hira diila loo̒ dungga taabua boito.

²¹ Tei Hira helo hintu-hintu ode tau-tauwalo to Enaim, “Tou̒toonu tasuuntali boito tabiasaalio hemohima totili lo dalala botie?” “Diila pee̒enta mao̒ woluo tasuuntali tewe,” tametao̒ limongolio.

²² Lapatao̒ malo hualingolo tei Hira odelei Yehuda wau loloi̒ya mao̒, “Diila ilodungga lowatia taabua boito. Modudua̒a totau-tauwala mola teto diila pee̒enta mao̒ tasuundali woluo teto.”

²³ Ualei Yehuda, “Huliyalo mao̒ uu̒u-pangowalo boito to olio, asali diila moo̒olito olanto wambai̒o. Wau̒ malo tolopani u lomayali mao̒, bo yio̒ debo diila loo̒dungga olio.”

²⁴ Tanu tolo hula mola lapatio mao̒ tei Yehuda loo̒tapu habari deu̒ ti Tamar walao̒ moluhengio malohutu odelo tasuuntali wau maa ilombodaa̒. Lapatao̒ tei Yehuda lomalentaao̒, “Hamaawa mai tio wau tumbilalo tunggula mate!”

²⁵ Tou̒ ti Tamar dilelolio yilumuwalao̒ ode bulemengio, tio malolao mola tahuli ode moluhengio talolai̒, ualio mao̒, “Wau̒ mapilo ombodaa̒ lotaa u motolo miliki uu̒u-pangowalo botie. Palakisai mao̒ tatoonu taa ohuu̒wo locapu wolo taliilio wau tunggudu botie.”

²⁶ Iloonuhe lei Yehuda uu̒u-pangowalo boito wau loloi̒ya mao̒, “Taabua boito diila ototala. Wau̒ diila helo poo̒polu mao̒ u wajibu olau̒ ode olio; patutilio wau̒ moponika mao̒ olio wolo walau̒uu̒ tei Syela.” Tei Yehuda diilalo pee̒enta mao̒ helo ulauwa woli Tamar.

²⁷ Tou̒ maa wakutuulio ti Tamar mopotutu mai, loi̒laalo mai tio mamo potutu mai walaa̒ pingi.

²⁸ Donggo tio hemo polohulo mai tala ngota lotau̒nge pingi boito lopolualai uluu̒lio, lapatao̒ hulango boito lodihu mao̒ uluu̒ boito wau longawadeo̒ wolo pitolo meela. Ualio mao̒, “Walao̒ botie leimulo pilotutu mai.”

²⁹ Bo tau̒nge boito luli lomantangao̒ uluu̒lio, wau tau̒nge ngota poli leimulo pilotutu mai. Lapatao̒ hulango boito loloi̒ya mao̒, “Oditolio odi-odieelo mola dudelomu mohuntula ode bulemengio!” Yi walao̒ unge tapilotutu mai leimulo boito iluntelio mao̒ Peres.

³⁰ Lapatao̒ uito deu̒ito tawali-waliilio pilotutu mai tau̒luu̒lio opitolo meela. Tio yilohialio tanggulo Jerah.