ILOOWALI 14 - KITABI HABARI MOPIOHE

Tei Abram lotulungi olei Lot

¹ Wopatota olongia, deu̒yito-yito: Amrapel lonto Babilonia, Ariokh lonto Elasar, Kedorlaomer lonto Elam wau Tideal lonto Goyim

² helopaatea loluali limo lota olongia, deu̒yito-yito: Bera lonto Sodom, Birsya lonto Gomora, Synab lonto Adma, Semeber lonto Jeboim, wau olongia lonto Bela tai̒lunte olo Joar.

³ Olongia limolota boito helo heeluma wau longambu suludadu limongolio to Lumbaya lo Sidim, u masaatia ilunte Lau mati.

⁴ Ngotilonggadu mopulaa dulo taunu mola timongolio kiluwasa li Olongia Kedorlaomer, bo todelomo taunu u opulaa tolulio, timongolio helo mintaa̒ tingolo loluwali olio.

⁵ To delomo taunu u opulaa pato, Olongia Kedorlaomer wau tahelo heeluma wolio lonao̒ mai wolo suludadu limongolio wau lopo olaaheo̒ taulo Repaim to Asyterot-Karnaim, taulo jujim to Ham, taulo Emim to Syawe-Kiryataim,

⁶ wau taulo Hor to hihui̒-hui̒dee lo Edom, tulusi lohilapita olimongolio ngoilaminga El-Paran totili lohuta datahu wau luasi udelita.

⁷ Lapatao̒ uito tahipo hilapitawa luli lobale wau lohualinga mola ode En-Mispat u masaatia ilunte Kades. Tilaa̒aluku limongolio ngoilanggubu huta lo Amalek wau lopo olaaheo̒ taulo Amori tahi biluloa̒wa to Hajejon-Tamar.

⁸ Lapatao̒ mongo olongia lonto Sodom, Gomora, Adma, Jeboim wau Bela helo ngantulu baliisani lo suludadu limongolio to Lumbaya lo Sidim tulusi helo paatea,

⁹ loluwali mongo olongia lonto Elam, Goyim, Babilonia, wau Elasar; oditolio, limo lota olongia loluwali wopatota olongia.

¹⁰ Lumbaya boito polupolu wolo ali loteri, wau tou̒ mongo olongia lonto Sodom wau Gomora helo tolopani mopolahi batanga monto popaatea, timongolio helo dedeehu ode delomo aa̒a-liyaalo boito. Toulota olongia wewolio loa̒ahu tilumeteo̒ ode hihui̒-hui̒dee.

¹¹ Wopatota olongia taloo̒haama, helo lambata totoonulalo u to Sodom wau Gomora leituwoto balangi ua̒aloolo, lapatao̒ lonao̒.

¹² Tei Lot pou̒walao̒ lei Abram olo biluloa̒lio to Sodom, kalana uito tio olo dilelo lomusu pee̒-pee̒enta wolo totoonulalo halataalio.

¹³ Bo ngotaalio lo taloa̒ahu lopoduloheo̒ ngoa̒amila u helo toduo boito tolei Abram, taulo Ibrani boito. Tei Abram bilu-biluloa̒ totili bubuu-ngowaalo ayu aulia tambati potabiyalo miliki lei Mamre, ngotaalio lo Amori. Tei Mamre wau mongo wutatio, deu̒yito-yito tei Eskol wolei Aner yito mongo sahabati wau ngoheeluma wolei Abram.

¹⁴ Tou̒ tei Abram loo̒dungohe deu̒ pou̒walaa̒lio tilawaalio, mailimoi̒o ngoa̒amila taa todelomo kemalio, deu̒yito-yito tamotota mopaatea ngodaata tolo hetuto mopulaa walulota, tulusi lohilapita olongia wopatota boito demola kota Dan.

¹⁵ Mota teto tei Abram malo layadeo̒ taulio dengolo polemboa̒a, tulusi heloluhu musu tou̒ hui wau lopo olaaheo̒ olimongolio. Tio lohilapita olimongolio demola Hoba to ambahu tilayo kota lo Damusiki.

¹⁶ Tei Abram ilohaasili luli lohama babaa-langiyalo umaa yilahuulio, wau olo tei Lot wolo totoonulalo halataalio, wau mongobua wau tawaalo wewolio.

Tei Malkisedek lobalakati olei Abram

¹⁷ Lapatao̒ lopo olaaheo̒ li Olongia Kedorlaomer wolo mongo olongia talo heeluma wolio, tei Abram luli lohualingai. Tulusi olongia lo Sodom lohunuhe mota olio to Lumbaya Syawe u ilunte olo Lumbaya Olongia.

¹⁸ Tei Malkisedek, olongia lo Salem olo tadihu-dihu iimanu lo Allahu Taa̒ala Taa Laba-labaalo molanggato, lodelo mao̒ roti wau angguru odelei Abram,

¹⁹ tulusi lobalakati mao̒ olei Abram, loi̒yalio mao̒, “Hinta Allahu Taa̒ala Taa Laba-labaalo molanggato, tamalo powali mai hulungo wau dunia, mobalakati olei Abram.

²⁰ Ilopujiaalo mola Allahu Taa̒ala Taa Laba-labaalo molanggato, tamalo poo̒ohama olemu lonto musumu.” Lapatao̒ uito tei Abram longohi mao̒ odelei Malkisedek ngotayade mopulu lonto totoonulalo balangi yilambato umaa luli dilelio lohualinga.

²¹ Lapatao̒ malo loi̒ya ti olongia lo Sodom odelei Abram, “Hamaalo mao̒ balangi u yilambata boito, bo ambunguolo powalinga mai tawuu̒ ngoa̒amila ode olau̒.”

²² Bo tei Abram lolametao̒, “Watia motadia mai totalu lo Eeya, Allahu Taa̒ala Taa Laba-labaalo molanggato, Talo powali mai hulungo wau dunia,

²³ deu̒ watia diila tamohama wolo-wolo monto milikiimu, tumbao̒ bola ngopata meaalo tali losandale penu boli ngoputu mao̒ diila. Lou̒ odito yio̒ diila moo̒loi̒ya, ‘Wawaatiyalo tahe lohutu olei Abram lowali kaya.’

²⁴ Watia diila mohuto mohama mao̒ wolo-wolo duo̒lo batanga lowatia lohihilao. Watia bo mohuto mololimo wolo umaa pilomake lotau laatia. Bo huliyalo mao̒ mongo sahabati ngoheeluma laatia, deu̒yito-yito tei Aner, Eskol wolei Mamre, mohama tayadu limongolio.”