GALATIA 1 - KITABI HABARI MOPIOHE

^1-3 Mongo wutato jajaa-maa̒alo tomadala lo Galatia, watia, Paulus, wau ngoa̒amila wutato Nasara tawolaatia, mohalapu pohileaala dua̒ Allahu Taa̒ala ti Paapanto wau Eeya Isa Almasi mongohi mai balakati wau salaamati olimongoli. Watia lowali rasulu diila lotimbulude loli manusia meaalo sababu piluduo̒ lomanusia, bo sababu ti Isa Almasi wau Allahu Taa̒ala ti Paapanto tamaaluli lopotumulai o-Lio lonto opopate.

⁴ Modungoheo̒ u otohilaa lo Allahu Taa̒ala ti Paapanto, ti Almasi lohudu mai batanga-Lio lowali bake ode duduu-saanto, alihu ito poa̒ahuwolo monto jamani u moleeto botie.

⁵ Ilopujiaalo mola Allahu Taa̒ala ohiheo-hiheolo mao̒! Amin.

Tuwa-tuwaulo Habari Mopiohe

⁶ Watia lolinggolabe pasali lo Mongo wutato! Timongoli tiliyango Allahu Taa̒ala masababu odehu hilaa li Almasi, bo botia timongoli odito lolamemeto lobulemenga to Allahu Taa̒ala wau lodudua̒ “habari mopiohe” uwewo wolo Habari Mopiohe ulonto Allahu Taa̒ala.

⁷ Otutuulio mao̒ diaaluo “habari mopiohe uwewo”. Bo woluo tau-tauwalo talo pohabari olimongoli “habari mopiohe” pasali li Almasi upilopo boboolio̒ limongolio, tilinggula loo̒ puyoo̒to olimongoli.

⁸ Taa u mopohabari “habari mopiohe” uwewo wolo Habari Mopiohe u mapilo habari lamiaatia, huliilo mao̒ tio hukuumanio mai lo Allahu Taa̒ala – eleponu tau boito amiaatia lohihilao meaalo malai̒kati monto sologa!

⁹ Amiaatia malo loi̒ya mai omoo̒omolu, masaatia watia muli moloi̒ya mai pee̒entapo; Taa u mopohabari olimongoli “habari mopiohe” uwewo wolo Habari Mopiohe u matilolimo limongoli lonto olamiaatia, tau boito wajibulio hukuumanio lo Allahu Taa̒ala!

¹⁰ Wolo tingga woleeto boito watia oontonga mao̒ debo odelo mei̒ pasisi tomanusia? Sama-samaata diila! Watia bo motiwunelo pasisio mai lo Allahu Taa̒ala. Wolo watia donggo hemo tolopani mohama hilaa lomanusia alihu aahudu lotau? Wonu watia donggo hemohutu odito, watia diila wato li Almasi.

Woololo mola tei Paulus lowali rasulu

¹¹ Mongo wutato musi motota mao̒ deu̒ Habari Mopiohe upilopo habari lowatia boito asaliilio mai diila lonto manusia.

¹² Watia diila lololimo habari boito lonto manusia, wau diaaluo penu boli ngotaa mao̒ tahe longaajali olaatia. Ti Isa Almasi lohihilaolo talo tombangai tuangio lo Habari Mopiohe boito olaatia.

¹³ Tantu timongoli maloo̒ dungohe pasali tutumulo lowatia omoo̒omolu odelo ngotaalio tahelo dudua̒ agama lo Yahudi. Otaawa limongoli woloolo mola palangilio watia helo pohutu jamaa̒ lo Allahu Taa̒ala wau woloolo mola ohuu̒lio watia helo tolopani u mopo aantulu mao̒.

¹⁴ Todelomo sua̒li moponao̒ agama lo Yahudi, watia mongilaboto wolo odaata taulo Yahudi tango-hilaide lowatia. Watia osumangati daa̒ todelomo susuu-aliyaalo tomimbihu uu̒du linenemoya lamiaatia.

¹⁵ Bo sababu opopiohu hilaa lo Allahu Taa̒ala, Tio lolulaotai olaatia tou̒ watia diipo pilotutulio mai wau lotianga olaatia u lomaya o-Lio.

¹⁶ Allahu Taa̒ala lopoi̒laalo mai lo Wala-I̒o olaatia alihu Habari Mopiohe pasali lo Wala-I̒o mowali pohabario lowatia totaa diila Yahudi. Tou̒ boito watia diila lonao̒ penu boli ode olita u lohile naseehati.

¹⁷ Watia olo diila lonao̒ ode tau-tauwalo to Yerusalemu tamalei mulo wolaatia lowali rasulu. Bo watia malonao̒ ode lipu lo Arabi, tulusi lonteeto luli lohualinga ode Damusiki.

¹⁸ Tolo taunu mola lapatio mao̒, watia lonao̒ ode Yerusalemu mola loo̒taawa wolei Petrus. Watia lotibiluloa̒ wolio bo mopulaa limohui mola hiheolio.

¹⁹ Watia diila lodunggaya wolo mongo rasulu wewo, ngopohia tei Yakobus, wutato Eeya.

²⁰ Wolo u tiluladei lowatia botie otutu. Otaawa lo Allahu Taa̒ala deu̒ watia diila lohimbulo.

²¹ Lapatao̒ uito watia ode mamaa-lawaalo to Siria wau Kilikia.

²² Dilumutu tosaaa̒ti boito jajaa-maa̒alo Nasara to Yudea debo diipo hua̒a lotota olaatia.

²³ Timongolio bo lodungohu tau hipoloi̒yawa, “Taa u muloololio mai helo ngalinaya olamiaatia, masaatia hemo pohabari opopalacaya u muloololio mai ohilaa pobinasalo.”

²⁴ Yi timongolio malomuji Allahu Taa̒ala sababu watia.