ESRA 8 - KITABI HABARI MOPIOHE

Tau-tauwalo polayahu taluli lohualingai wolei Esra

¹ Utieelo daputali mongo tau̒wa lokaumu tamaa pilolayahu ode Babel wau luli lohualingai wolau̒, Esra, ode Yerusalemu tou̒ tei Artahsasta hemomalenta odelo olongia:

^2-14 Gersom, lonto kaumu Pinehas Daniali, lonto kaumu Itamar Hatus walae̒e Sekhanya lonto kaumu Dauda Jakaria, lonto kaumu Paros, pee̒-pee̒enta wolo ngohetuto limo lopulu lota mongo lolai̒ lonto kaumulio (odaputali tomimbihu silasila limongolio) Elyoe̒nai walae̒e Jerahya, lonto kaumu Pahat-Moab, pee̒-pee̒enta wolo dulo hetuto lota mongo lolai̒ Sekhanya walae̒e Yahajiel, lonto kaumu Jatu, pee̒-pee̒enta wolo tolo hetuto lota mongo lolai̒ Ebed walae̒e Yonatan, lonto kaumu Adin, pee̒-pee̒enta wolo mongo lolai̒ limo lopulu lota Yesaya walae̒e Atalya, lonto kaumu Elam, pee̒-pee̒enta wolo pitu lopulu lota mongo lolai̒ Jebaja walae̒e Mikhael, lonto kaumu Sepaca, pee̒-pee̒enta wolo walu lopulu lota mongo lolai̒ Obaja walae̒e Yehiel, lonto kaumu Yoab, pee̒-pee̒enta wolo dulo hetuto mopulaa walu lota mongo lolai̒ Selomit walae̒e Yosipya, lonto kaumu Bani, pee̒-pee̒enta wolo ngohetuto wolomo pulu lota mongo lolai̒ Jakaria walae̒e Bebai, lonto kaumu Bebai, pee̒-pee̒enta wolo dulo pulaa walu lota mongo lolai̒ Yohanan walae̒e Hakatan, lonto kaumu Ajgad, pee̒-pee̒enta wolo ngohetuto mopulu lota mongo lolai̒ Elipelet, Yehiel wau Semaya, lonto kaumu Adonikam, pee̒-pee̒enta wolo wolomo pulu lota mongo lolai̒ (timongolio lapatio mao̒ lonao̒ mai) Utai wau Jabud, lonto kaumu Bigwai, pee̒-pee̒enta wolo pitu lopulu lota mongo lolai̒.

Tei Esra helo ngaambu tau-tauwalo Lewi u lomaya to Bele lo Eeya

¹⁵ Ngoilanggubu polemboa̒ boito he ilambuu̒ mao̒ to biihu dutulaa utolo-tolohe ode kota Ahawa, tulusi ami lotikema mola teto ngotilonggadu tolo hui mola. Lapatao̒ pilalakisau̒ mao̒, loi̒laalo mai woluo dengolo lota mongo iimamu to wolota limongolio, bo diaaluo penu boli ngotaa mao̒ lonto suku Lewi.

¹⁶ Lapatao̒ tiliyanguu̒ mai tio lota to wolota lomongo tau̒wa boito, deu̒yito-yito tei Eliejer, Ariel, Semaya, Elnatan, Yaribi, Elnatan, Natan, Jakaria, Mesulam wau olo guru duulota, deu̒yito-yito tei Yoyarib wolei Elnatan.

¹⁷ Lapatao̒ yilawou̒ timongolio mola lodunggaya wolei Ido, tau̒wa lo ulipu to Kasipya, wolo hihiile alihu tei Ido wolo mongo sahaabatilio, tahi pokalajawa to Bele lo Eeya, molao mai ode olami tau-tauwalo u momaya mao̒ to Bele lo Eeya.

¹⁸ Sababu oopiohu hilaa lo Allahu Taa̒ala, timongolio lolao mai ode olami tei Serebya, ngotaalio lo Lewi tamotoloa̒a pikiilangilio lonto kaumu Mahli. Pee̒-pee̒enta wolio lonao̒ mai olo tau̒ kekeei̒ wau mongo wutatio, ngojumula mopulaa walu lota.

¹⁹ Tei Hasabya wolei Yesaya lonto kaumu Merari, wolo dulo pulu lota mongo ilaato limongolio, heilaolio mai olo olami.

²⁰ Wewolio mao̒ leeto woluo olo dulo hetuto dulo pulu lota tamoo kalajawa to Bele lo Eeya talei daputali tanggulio. Loluuhuru limongolio anggadu muloololio mai tilantu mao̒ li Olongia Dauda wau taduduulaa̒ lo bele biluloa̒ saaha li olongia u momantu mao̒ taulo Lewi.

Tau-tauwalo bakasi polayahu helo puasa wau lodua̒ mola

²¹ Lapatao̒ tobiihu Dutulaa Ahawa boito wau̒ helo pomalalumu mola deu̒ ngoa̒amila musi mopuasa wau motidupapa batanga totalu lo Allahu Taa̒ala. Ami helodua̒ mola alihu Allahu Taa̒ala modelo olami todelomo nonao̒ boito, wau moduo̒lai olami, mongo walao̒ lami, wau totoonulalo miliki lami.

²² Wau̒ moomu mohile mao̒ suludadu owadala odeli olongia huna moduo̒la olami lonto musu todelomo nonao̒ lami. Sababu wau̒ maloloi̒ya olio, deu̒ Allahu Taa̒ala lami mobalakati mai motii̒du taa u motiwato to Eeya wau molonuo̒ wau mohukumani mao̒ timii̒du taa udiila tatapu wau molotolo hilao to Eeya.

²³ Yi malo puasaalo ami wau helodua̒ mola to Allahu Taa̒ala lei̒ duo̒lai wau Allahu Taa̒ala olo lodungohe dua̒ lami.

Dedee-wowaalo ode Bele lo Eeya

²⁴ To wolota lomongo iimamu tao̒ tilanggulo wau̒ helo lulaotao̒ mopulaa duulota: tei Serebya, Hasabya, wau mopulu lota poli.

²⁵ Lapatao̒ tilimenguu̒ mao̒ ode limongolio talaa̒, hulawa, wau pakaa kasiyaalo u mapilo dembulo li olongia, tahipo naseehatia wau taduduulaa̒ ulipu wau lo ngoa̒amila taulo Isirai̒lu, u pomakelio todelomo Bele lo Eeya. Ngoa̒amilalo boito yiluduu̒ mao̒ ode mongo iimamu boito.

^26-27 Uti-utieelo daputali lo dedee-mbulowalo boito: talaa̒ – 22 tonu 100 pakaakasi talaa̒ – 70 kilo hulawa – 3.400 kilo 20 manggo hulawa – 8,4 kilo 2 manggo polunggu u mopiohe daa̒, u tutuuwauwa nilailio wolo manggo hulawa.

²⁸ Wau̒ loloi̒ya mao̒ ode mongo iimamu boito, “Timongoli pilopo tolomodu mola ode Eeya, Allahu Taa̒ala tahe tuboo linene moyaanto, odito olo totoonulalo pakaakasi talaa̒ wau hulawa upilo dembulo ode Eeya yito tolomodu ode Eeya.

²⁹ Dahailo mao̒ tio̒otutua totoonulalo upango boito dilumutu timongoli meidungga mola to Bele lo Eeya. Tou̒ timongoli meidungga mola odito, musi timenga mao̒ limongoli totoonulalo upango boito, wau mohudu mao̒ ode mongo iimamu tau̒wa wau mongo tau̒wa taulo Lewi, wau mongo tau̒wa taulo Isirai̒lu to Yerusalemu.”

³⁰ Lapatao̒ mongo iimamu wau tau-tauwalo Lewi boito mololimo mao̒ talaa̒, hulawa wau pakaa kasiyaalo boito u deloolo ode Bele lo Eeya to Yerusalemu.

Leidungga mola ode Yerusalemu

³¹ To dulahu opulaa pato hulalo bohulio ami lololaa mao̒ Dutulaa Ahawa wau lomonggato ode Yerusalemu. To delomo nonao̒ boito ami diluo̒lai lo Allahu Taa̒ala lami lonto luhu wau pontoo̒ lo musu.

³² Tou̒ leidungga mola ode Yerusalemu, ami lohuheli ngotilonggadu tolo hui mola hiheolio.

³³ Lapatao̒ to dulahe opatio maa lonao̒ mota ode Bele lo Eeya, tulusi helo timengao̒ talaa̒, hulawa wau pakaa kasiyaalo boito. Lapatao̒ uito yiludu mao̒ lami odeli Iimamu Meremot walae̒e Uria lou̒ silaakusia lei Eleajar walae̒e Pinehas wau duulota taulo Lewi, deu̒yito-yito tei Yoyabad walae̒e Yesua wolei Noaja walae̒e Binui.

³⁴ Ngoa̒amila upango boito yilia̒apo wau tilimengo, tulusi tiluladeo̒ wolo wimu-wimumuto.

³⁵ To dulahe boitolo ngoa̒amila tamalo hualingai lonto polayahu boito helo podewo bake yilalango ode Allahu Taa̒ala lo Isirai̒lu. Timongolio helo podewo mao̒ mopulaa duluo sapi ulai̒ ode ngoa̒amila taulo Isirai̒lu, tio lopulaa wolomo himba ulai̒ wau pitu lopulaa pitu walao̒ himba; wewolio mao̒ leeto olo mopulaa duluo batade ode bake pongambungualo dusa ode limongolio lohihilao. Ngoa̒amila binatangi boito pilobulio odelo bake ode Eeya.

³⁶ Lapatao̒ dokumeni uilohi mao̒ li olongia ode limongolio pilopo tunggulio mota ode mongo gubolonulu wau tahidihima pantungo lo polopinsi Eprat Otolopa. Yi tahidihima pantungo lo polopinsi boito helo ngohi mao̒ to ulipu alihu timongolio debo mowali moi̒baadati to Bele lo Eeya.