ESRA 7 - KITABI HABARI MOPIOHE

Tei Esra leidungga mai ode Yerusalemu

¹ O taataunua mola lapatio mao̒, tou̒ tei Artahsasta helo malenta odelo olongia lo Persia, woluo talolai̒ ngota tai̒lunte Esra, lonto wali mai li Iimamu Daa̒ Haruna. Pilito lo waliilio mai lonto tibawa odeitaato yito odie mola: Esra Seraya Ajarya Hilkia

² Salum Jadok Ahitub

³ Amarya Ajarya Merayot

⁴ Jerahya Uji Buki

⁵ Abisua Pinehas Eleajar Iimamu Daa̒ Haruna.

^6-7 Tei Esra ngotaalio lo tao̒sikola wau dadaata otaawalio pasali lo Butoo̒ uilohi mai lo Eeya, Allahu Taa̒ala lo Isirai̒lu odelei Musa. Sababu tei Esra bilarakati mai lo Eeya Allahu Taa̒alaalio, yi ti olongia longohi mao̒ olio totoonulalo u pilohilelio. To taunu opitulio pamalenta li Olongia Artahsasta, maa lomonggato tei Esra lonto Babel lotidulunga ode Yerusalemu wolo ngopolemboa̒ taulo Isirai̒lu u tilitangoa lou̒ ngojumulaa iimamu, taulo Lewi, tamoolahua wau tamodahawa hulubangi to Bele lo Eeya, wau tahi pokalajawa.

^8-9 Timongolio he lololaa mao̒ Babel to bohulo dulahu wau hulalo bohulio wau wolo ponu lo Allahu Taa̒ala, timongolio malei dungga mai ode Yerusalemu tobohulo dulahu hulalo olimolio.

¹⁰ Tei Esra malo poo̒daata-daatalo mao̒ poo̒tuotio tou̒ helo tulete Butoo̒ lo Eeya, u ponao̒olio wau mopoa̒ajari mao̒ totoonulalo tilantu wau wuu̒dulio to bangusa lo Isirai̒lu.

Dokumeni uiludu mao̒ li Olongia Artahsasta odelei Esra

¹¹ Utieelo dokumeni uiludu mao̒ li Olongia Artahsasta ode lei Esra, ngotaalio li iimamu wau ahali lo Butoo̒,

¹² “Lonto li Olongia Artahsasta odeli Iimamu Esra, ahali Butoo̒ lo Allahu Taa̒ala takawa-kawasa tosologa.

¹³ Wau̒ momalentai deu̒ ngoa̒amila iimamu, taulo Lewi wau taulo Isirai̒lu wewolio to ngoilanggubu yilaidiaau̒, tao̒hilaa monao̒ ode Yerusalemu, mowali monao̒ wolo Wutato.

¹⁴ Sababu wau̒ wau opitu lota tamoo-naseehatia olau̒ molao to Wutato ode Yerusalemu wau Yehuda mola motulete owowoluwoalio wau momiloheo̒ wolo Butoo̒ lo Allahu Taa̒ala u mapilo malacaya mao̒ to Wutato, tio̒otutua hedilungohehe.

¹⁵ Wau̒ wau tahipo naseehatia olau̒ ohilaa mopodewo hulawa wau talaa̒ ode Allahu Taa̒ala lo Isirai̒lu, Allahu Taa̒ala tabilu-biluloa̒ to Yerusalemu. Delowalo mota dewo lami boito.

¹⁶ Delowalo mota olo ngoa̒amila hulawa wau talaa̒ u yilimoo̒ lo Wutato to ngoilanggubu Babel wau totoonulalo dembulo bangusa lo Isirai̒lu wau mongo iimamulio duo̒lo Bele lo Eeya Allahu Taa̒ala limongolio to Yerusalemu.

¹⁷ Pomakeyalo doi boito wolo mou̒lintapo u motali sapi ulai̒, himba ulai̒, walao̒ himba, pale wau angguru. Podewowalo ngoa̒amilalo boito toitaato mesba Bele lo Eeya to Yerusalemu.

¹⁸ Talaa̒ wau hulawa u donggo ilolabita mowali pomake mao̒ lo Wutato duo̒lo kaparluwani lo Wutato wau mongo sahaabati lo Wutato, tutuuu̒de wolo kahandaki lo Allahu Taa̒ala lo Wutato.

¹⁹ Wuduwalo ode Allahu Taa̒ala to Yerusalemu totoonulalo pakaakasi uiludu mao̒ lo Wutato ode ibaadati to Bele lo Allahu Taa̒ala.

²⁰ Wau totoonulalo kaparluwani wewo duo̒lo Bele lo Eeya, mowali pohile mao̒ lo Wutato monto kasi lo bele biluloa̒ saaha li olongia.

²¹ Duo̒lo ngoa̒amila tamongurusia kasi lo bele biluloa̒ saaha li olongia to polopinsi Eperat Otolopa palentau̒ mai alihu penu boli wolo wambai̒o u pohile li Iimamu Esra, ahali Butoo̒ lo Allahu Taa̒ala takawa-kawasa tosologa, wohia mao̒ olio wolo molamemeto,

²² dilumutu ngodaata lo jumulaa botie: talaa̒ dilumutu tolo lihu wopato hetuto kilo, pale dilumtu mopuulo lihu kilo, angguru dilumutu dulo lihu liiteri, winulo jaituni dilumutu dulo lihu liiteri, wau watingo ngodaata u palaluwolo.

²³ Pohutuwalo wolo ulintapo todelomo mopodapato totoonulalo hitua-tuawua u pohile lo Allahu Taa̒ala takawa-kawasa tosologa duo̒lo Bele-Lio, alihu Eeya diila momuluka mai olau̒ meaalo ode tau-tauwalo tamomalenta lapatio mao̒ wau̒.

²⁴ Timongoli diila mowali mohimoa̒ beya monto mongo iimamu, taulo Lewi, tamoolahua, tamodahawa huhebu hulubangi, tamookalajawa, meaalo penu boli tatoonu wambai̒o tao̒ wumbutalio wolo Bele lo Eeya.

²⁵ Wutata Esra, pohunawa mao̒ hikimati u mailohi mai lo Allahu Taa̒ala ode Wutato, wau pudua̒alo mao̒ mongo tau̒wa wau hakimu tamomalenta ngoa̒amila tau to polopinsi Eperat Otolopa tahitumula lodudua̒ Butoo̒ lo Allahu Taa̒ala lo Wutato. Patutilio Wutata mopoa̒ajali mao̒ Butoo̒ boito ode ngoa̒amila taa u diipo yilotota.

²⁶ Timii̒du taa udiila modungohe bubuu-too̒waalo Allahu Taa̒ala lo Wutato, meaalo bubuu-too̒waalo lo bele biluloa̒ saaha li olongia, musi hua̒a hukumaniyola mate, meaalo popolayahulo, meaalo hamaalo harata upangolio, meaalo tutupaalo.”

Tei Esra helomuji mola Allahu Taa̒ala

²⁷ Lapatao̒ ualei Esra, “Pujialo mola Eeya, Allahu Taa̒ala tahe tuboo linenemoyaanto! Eeya malo poo̒oliyoa̒i hilaa li olongia tilinggula tio lohuto tolomodu helo poo̒otuoto Bele lo Eeya to Yerusalemu.

²⁸ Wolo polotulungi lo Allahu Taa̒ala wau̒ ilaahudu li olongia, lo tahipo naseehatia olio wau tahidihuma pantungo ulipu tao̒ kawasa boito; Eeya, Allahu Taa̒alau̒ malongohi mai sumaangati olau̒ tilinggula wau̒ ilohaasili helo heingo ngodaata tau̒wa lokaumu Isirai̒lu u luli lohualinga ode Yerusalemu.”