ESRA 6 - KITABI HABARI MOPIOHE

Palenta lei Kores ilodungga todelomo arasipu

¹ Lapatao̒ uito to palenta li Olongia Darius, he tuletelio to mao̒ delomo arasipu lo bele biluloa̒ saaha li olongia u tahutahu to Babel.

² Bo palenta tomimbihu lo sua̒li boito diila ilodunggalio to Babel, bo to kota lo Ahmeta to lipu lo Media. Palenta boito he tiluladio mao̒ to lilibu ngopata wau tingohio odie mola,

³ “To bohulo pamalenta li Olongia Koresi, tio he lopolualao̒ palenta alihu Bele lo Eeya to Yerusalemu muli bonguloolo odelo tambati lo taa modelo dewo wau momobu bake. Langgato Bele boito musi dulo pulaa pitu lo meeteri wau tanggalio olo dulo pulaa pitu lo meeteri.

⁴ Didiingingaala lo meeselilio musi bonguloolo debo odelo odie mola: to yitaato lo timii̒du tolo woludu botu musi popohuliaalo ngowoludu ayu. Onggosilio maa bantaa kasi lo bele biluloa̒ saaha li olongia.

⁵ Wau olo pakaakasiyaalo hulawa wau talaa̒ u pomake to Bele lo Eeya wau maa hilama li Olongia Nebukadnejar lonto Yerusalemu wau he dilelolio ode Babel, musi powalingoolo ode tambatilio bohulio.”

Tei Darius helo maletao̒ alihu pomongulalo tolongaala mola

⁶ Lapatao̒ tei Darius luli lolao totametio odie mola, “Odelei Tatnai, gubolonulu lo polopinsi Eprat Otolopa. Diila mao̒ pomarosa to tau-tauwalo Yahudi boito,

⁷ wau diila mao̒ heponto-pontoli pomongulalo Bele Poi̒baadatialo limongolio. Polulia mao̒ ti gubolonulu lo Yehuda wau mongo tau̒wa lo Yahudi muli momongu mola Bele boito.

⁸ Woleeto wau̒ momalentai tomongo wutato u momantu mao̒ olimongolio todelomo kalaja pomongulalo boito wolo dudelo botie: Ngoa̒amila oonggosi pomongulalo musi hamaalo monto tilapulo beya lolipu to polopinsi Eprat Otolopa wau musi pomaayaria mao̒ totau-tauwala boito wau diila helohu-lohudua.

⁹ Wewolio mao̒ leeto penu boli wolo wamabi̒o u palaluwolo modudua̒ao̒ mongo iimamu to Yerusalemu, debo odelo humayalio sapi lai̒ buboto, himba lai̒ wau walao̒ himba duo̒lo bake podewo ode Allahu Taa̒ala takawa-kawasa tosologa, wau olo pale, watingo, angguru wau winulo jaitun, musi wuduolo ode limongolio timii̒du dulahu lou̒ diila palongolo.

¹⁰ Ponao̒wa mao̒ ngoa̒amila boito alihu timongolio moo̒ podewo bake u moo̒sanangi to Allahu Taa̒ala takawa-kawasa to sologa, wau alihu timongolio momolohone mola balakati olau̒ wau ode mongo walau̒ lai̒.

¹¹ Wau̒ mopoa̒hu mai alihu taa u molambanga palenta botie monto belelio pahutolo wolihi ngoputu, poluitolo huudio, tulusi pobituo̒olo towawao̒ tau boito tunggula molaapata. Belelio musi onggaloolo wau powaliyolo tambati lo puputo.

¹² Pohileaala dua̒ Allahu Taa̒ala tamalo lulaotao̒ Yerusalemu odelo tambati polubowalo Eeya, mopobinasa mao̒ timii̒du olongia meaalo bangusa tabuheeli molambanga palenta botie wau tamo himontala mongaantulu Bele lo Eeya to Yerusalemu boito. Wau̒, Darius, malongohi palenta botie. Ponao̒walo lou̒ mopio-piohulo mao̒.”

Bele lo Eeya mapilo mantali

¹³ Palenta li Olongia Darius boito hepiloponao̒ wolo ulintapo lei Tatnai, gubolonulu lo Eprat Otolopa, wolei Syetar-Bojnai wau mongo sahaabati limongolio.

¹⁴ Hebilantua lomongo nabi Hagai wau Jakaria, mongo tau̒wa lo Yahudi helo tolonga mola pomongulalo Bele lo Eeya boito. Timongolio hua̒a lopoo̒ lapatao̒ pomongulalo Bele lo Eeya boito lotuuu̒de wolo palenta lei Kores, Darius wolei Artahsasta, mongo olongia lo Persia boito.

¹⁵ Bele lo Eeya boito yilapato todulahu otolulio hulalo Adar totaunu olomio pamalenta li Olongia Darius.

¹⁶ Lapatao̒ wolo weengahe tau-tauwalo Isirai̒lu, mongo iimamu, tau-tauwalo Lewi wau ngoa̒amila taa bakasi polayahu helo posaaha mao̒ Bele lo Eeya boito.

¹⁷ To polou̒tia boito timongolio helo podewo ode Eeya ngohetuto sapi ulai̒, dulo hetuto himba ulai̒ wau wopato hetuto walao̒ himba. Ode bake pongambungualo dusa, hepilodewo mopulaa duluo batade ulai̒, tuwau ode timii̒du suku lo Isirai̒lu.

¹⁸ Lapatao̒ u pohinta to Bele lo Eeya timongolio helo polemboa̒ao̒ tomongo iimamu wau tau-tauwalo Lewi lodudua̒a wuu̒du u tulatuladee todelomo buku lei Musa.

Rameyangi lo Paska

¹⁹ To dulahu opulaa pato hulalo bohulio totaunu wumbutio mola, tau-tauwalo tamalo hualingai lonto polayahu, helo polame mao̒ Paska.

²⁰ Ngoa̒amila iimamu wau taulo Lewi malohutu upacara pobelesiyalo batanga tilinggula anggapuola beresi. Lapatao̒ tau-tauwalo Lewi boito helo lambala bibii-natangiyalo ode bake lo Paska duo̒lo mongo iimamu, ode limongolio lohihilao wau ngoa̒amila taa bakasi polayahu wewolio.

²¹ Babaa-keyaalo boito hetilamela lo ngoa̒amila taulo Isirai̒lu tamalo hualingai lonto polayahu wau ulipu lolipu boito tamalo lolaa mao̒ dudelo tutumulo u odusa wau lonao̒ mai helotiwato to Eeya, Allahu Taa̒ala lo Isirai̒lu.

²² Pitu hui mola hiheolio timongolio wolo weengahe helo polame Potihunggu Roti Diila Oragi. Timongolio hiweengahe daa̒ sababu Eeya malohutu mao̒ oli olongia lo Asyur ilomura lohilao to limongolio tilinggula helomantu oilmongolio todelomo kalaja luli lomongu mola Bele lo Eeya, Allahu Taa̒ala lo Isirai̒lu.