ESRA 5 - KITABI HABARI MOPIOHE

¹ Tou̒ boito nabi duulota, deu̒yito-yito tei Hagai wolei Jakaria walae̒e Ido, lomulaao̒ lobisala to tanggulo Allahu Taa̒ala lo Isirai̒lu ode taulo Yahudi tahibiluloa̒wa to Yehuda wau Yerusalemu.

² Loo̒dungohe tahuli lonabi duulota boito, tei Jerubabel walae̒e Sealtiel wolei Yesua walae̒e Yojadak hua̒a lolumula poli lomongu mola Bele lo Eeya to Yerusalemu, hebilantua lonabi duulota boito.

³ Bo tei Tatnai, goboronuru lo polopinsi Eprat Otolopa, pee̒-pee̒enta wolei Syetar-Bojnai wau mongo sahaabati limongolio hua̒a lonao̒ mai ode Yerusalemu wau helohintu mao̒ totau-tauwalo Yahudi, “Tatoonu talo poa̒hu olimongoli lomongu wau lopowimumutao̒ Bele Poi̒baadatiala botie?”

⁴ Timongolio helohintu mao̒ olo ngoa̒amila tanggulo taa u helomantu lopotihula mola Bele lo Eeya boito.

⁵ Bo Allahu Taa̒ala lopoo̒tuotai wau helo duo̒la mongo tau̒wa lo Yahudi boito, tilinggula taa hidihuma pantungo lipu lo Persia boito he lolantu mao̒ u diila mohutu wolo-wolo tou̒ timongolio diipo molao tuladu odelei Darius wau mololimo mai totametio.

⁶ Utieelo dudulohu uilao limongolio odeli Olongia,

⁷ “Ode talu li Olongia Darius. Pohileaala dua̒ ti Baginda momalenta mola wolo aamani wau salamati!

⁸ Bolo potaala ti Baginda maa̒lumu, deu̒ amiaatia malonao̒ mola ode polopinsi lo Yehuda wau loo̒onto mao̒ deu̒ Bele lo Eeya, Allahu Taa̒ala Taa Molamahu, donggo hebongulolio poli wolo boboo-tuwaalo leiduduulaa̒ wau didii-ngingaalo meeselilio yiloludelio wolo ayu. Kalaja boito hepilo hutulio wolo mou̒lintapo daa̒ wau nonao̒olio moolato.

⁹ Lapatao̒ heilintu mao̒ lamiaatia tomongo tau̒wa lobangusa boito, tatoonu tamalo poluasi olimongolio u luli lomongu mola Bele Poi̒baadatiala boito wau helo powimumutao̒.

¹⁰ Heilintu mao̒ lamiaatia olo tangguli mongolio alihu moo̒ podulohei odeli Baginda deu̒ tatoonu wambai̒o tahe lotitau̒wa mao̒ tokalaja boito.

¹¹ Timongolio helo lametao̒, ‘Amiaatia botie wato lo Allahu Taa̒ala takawa-kawaasa to ngoilanggubu aalamu. Amiaatia donggo hemomongu mola poli Bele lo Eeya u bilongu wau yilumumuta heo̒opulu-pulua lotaunu uilalu mao̒ li olongia ngota lo Isirai̒lu tamolamahu.

¹² Bo sababu mongo luluuhuru lamiaatia malo potoodeo̒ omuluka lo Allahu Taa̒ala taa kawa-kawaasa tosologa, yi Eeya lohudu mao̒ olimongolio odelei Nebukadnejar, olongia lo Babel wali mai lo Kasdim. Tio longaantulu mao̒ Bele boito wau helo polayahe mota bangusa lamiaatia ode Babel.

¹³ Lapatao̒ tei Kores lowali mola olongia lo Babel wau totaunu bohulio pamalentaalio, tio helo polualao̒ palenta u muli momongu mola Bele lo Eeya boito.

¹⁴ Tumbao̒ hepilo powalingio olo pakaa-kasiyaalo hulawa wau talaa̒ u hepilomake todelomo Bele lo Eeya wau u hilama lonto Yerusalemu lei Nebukadnejar lapatao̒ pilopo tuotio ode Kuili to Babel. Pakaa-kasiyaalo boito yiludu mao̒ li Olongia Kores ode tai̒lunte Sesbajar, tamaa piludui̒o lowali gubolonulu lo Yehuda.

¹⁵ Ti olongia helo poa̒hu olio lohama mao̒ pakaa-kasiyaalo boito wau luli lopowalinga mota ode Bele lo Eeya to Yerusalemu, wau luli lomongu mola Bele boito.

¹⁶ Lapatao̒ maa lonao̒ mai tei Sesbajar ode Yerusalemu wau lomayangao̒ pundasi Bele lo Eeya boito. Tumulalo mao̒ tou̒ boito demai botia polomongula boito nao̒nao̒ tulusi, bo debo diipo heilapato olo.’

¹⁷ Wonu ti Baginda potala mopoluasi mai, pohile lamiaatia alihu pei̒ tuleteepo todelomo arasipu lo bele biluloa̒ saaha li olongia to Babel. Lou̒ odito mowali otaawa mao̒ wolo otutu woluo palenta li olongia Kores u muli momongu mola Bele lo Eeya to Yerusalemu botie. Lapatao̒ amiaatia momolohone habari pasali lo putuusani li Baginda tomombihu palakala boito.”