ESRA 10 - KITABI HABARI MOPIOHE

Ranjana u mopohuheli mao̒ nika uu̒ulauwa boito

¹ Tou̒ tei Esra donggo hemodua̒ mola sambela hiyohiyongo wau helongaku dusa totalu Bele lo Eeya, dadaata daa̒ taulo Isirai̒lu lonao̒ mai lotia̒mbu, mopio mongo lolai̒, mongobua tau̒ kekeei̒. Timongolio olo lomalitao̒ olio sambela hehiyongo daa̒-daa̒alo mao̒.

² Lapatao̒ tei Sekhanya walae̒e Yehiel lonto kaumu Elam, loloi̒ya mao̒ odelei Esra, “Amiaatia ilodusa to Eeya sababu malonika wolo bangusa deli. Penu boli odito donggo woluo halaapani ode Isirai̒lu.

³ Duloolo ito motadia mola ode Allahu Taa̒ala, deu̒ ito mamopolahi mao̒ ngoa̒amila mongobua boito pee̒-pee̒enta wolo mongo walai̒ mongolio. Amiaatia mamodudua̒ totoonulalo potuwaanto wau potua lotau-tauwalo wewo tamomasisi palenta lo Allahu Taa̒ala.

⁴ Itoolo tamusi moponao̒ mao̒. Amiaatia mamomantu mai Olanto wolo lealeaatu lohilao. Pohutuwalo mao̒ lou̒ mopata-patalo mao̒ tunggula mopulitolo mao̒.”

⁵ Yi matilumula lei Esra u lopohutu mao̒. Tio helo poa̒hu tomongo iimamu tau̒wa, tau-tauwalo Lewi wau tau-tauwalo Isirai̒lu wewolio helo tadia deu̒ timongolio mamoponao̒ mao̒ potua lei Sekhanya boito.

⁶ Lapatao̒ timongolio helo tadia mola, malonao̒ tei Esra lonto talu Bele lo Eeya wau tilumuotao̒ ode delomo tambati biluloa̒ lei Yohanan walae̒e Elyasib wau lotihui teto. Tio diila lohuto lolamela meaalo longilu sababu siluukali hemomikiilangi mola huhutu lotau-tauwalo polayahu boito.

⁷ Lapatao̒ pilopo loladio mota maa̒alumati tuwau ode ngoilanggubu Yerusalemu wau Yehuda to ngoa̒amila taa u malo hualingai lonto pilolayahu, alihu motia̒mbu mai to Yerusalemu.

⁸ Titaalo tita tadiila monao̒ mai todelomo tolo hui mola, mahamaalo ngoilanggubu halataalio wau tio diilalo anggapuolo pongawaa̒ lo ulipu. Maa̒alumati boito hedilutua mao̒ pali lo uluu̒ lomongo tau̒wa ulipu.

⁹ Lapatao̒ tolo hui mola, todulahu odulopulu hulalo otiolio, ngoa̒amila mongo lolai̒ tahi biluloa̒wa tolipu lo Yehuda wau Benyamin lonao̒ mai ode Yerusalemu wau lotia̒mbu topaango Bele lo Eeya. Tou̒ boito didi lotuhutai wolo polodio. Ngoa̒amila tau bolo polo-polopalio sababu huhulio lodulente wau olo sababu polohuna daa̒ lo dudunggaya boito.

¹⁰ Lapatao̒ tei Esra tilimihula mola wau loloi̒ya mao̒ olimongolio. Tio loloi̒ya, “Timongoli maa ilodusa wau he loduheenga totaala lo Isirai̒lu sababu he lonika wolo bangusa deli.

¹¹ Sababu uito, tolongakualo mola dusa limongoli to Eeya, Allahu Taa̒ala tahe tuboo linenemoyaanto, wau pohutua mao̒ wolo umoo̒ sanangi hilaa lo Eeya. Pohalaheo̒ monto tau deli tahi biluloa̒wa to lipunto wau polahia mao̒ mongo dilebua limongoli monto bangusa deli boito.”

¹² Tau-tauwala boito helo lametao̒ wolo loo̒ohuu̒, “Amiaatia mamodudua̒a potuwanto.”

¹³ Lapatao̒ uali mongolio poli, “Bo tawoluo tewe dadaata daa̒ wau didi odito polodio. Amiaatia diila moo̒ tahangi timihula to bulemengio odie. Donggo poli utie diila palakala u mowali poo̒lopatolo todelomo ngohui duuhui mola, sababu dadaata daa̒ lonto olamiaatia taleimaso todelomo dusa botie.

¹⁴ Poluasia mai tomongo tau̒wa lamiaatia motibiluloa̒ to Yerusalemu wau monguurusi mao̒ sua̒li boito. Lapatao̒ timii̒du tau to kokoo-tawaalo lamiaatia, tao̒ dilebua monto bangusa deli musi monao̒ mai towakutu utilantu mao̒ pee̒-pee̒enta wolo mongo tau̒wa wau mongo hakimu lo kotaalio ngota-ngota. Lou̒ odito Allahu Taa̒ala diila tamomuuka mai poli olanto sababu palakala boito.”

¹⁵ Diaaluo penu boli ngotaa mao̒ tahelo kabaraatani to ranjana boito, ngopohia tei Yonatan walae̒e Asael wolei Yahjeya walae̒e Tikwa, hebilantua lo taduulota taulo Lewi, deu̒yito-yito tei Mesulam wolei Sabetai.

¹⁶ Tau-tauwalo polayahu tamalo hualingai boito debo ohilaa moponao̒ ranjana boito, sababu uito ti Iimamu Esra loo̒onto mao̒ dengolo lota to wolota mongo tau̒wa lokaumu, tulusi loluladeo̒ tangguli mongolio. To bohulo dulahu hulalo opululio timongolio maa lomajalisi u lotulete mao̒ palakala boito.

¹⁷ To delomo tolo hula wumbutio mola mai̒lo haasili timongolio lopoo̒ lapato helo malakisao̒ to ngoa̒amila mongo lolai̒ tamalonika wolo mongobua lonto bangusa deli.

Tau-tauwalo tao̒ dilebua lonto bangusa deli

¹⁸ Uti-utieelo daputali lotau-tauwalo tahi odilea bua lonto bangusa deli: Mongo Iimamu, leidaputali wolo kaumulio: Kaumu Yesua wolo mongo wutatio, mongo walae̒e Yojadak: tei Maa̒seya, Eliejer, Yarib wolei Gedalya.

¹⁹ Timongolio helodanti mamobua̒aya wolo dile limongolio, lapatao̒ timongolio mopodewo himba ulai̒ duo̒lo bake pongambungualo dusa limongolio.

²⁰ Kaumu Imeri: tei Hanan wolei Jebaja.

²¹ Kaumu Harim: tei Maaseya, Elia, Semaya, Yehiel wolei Ujia.

²² Kaumu Pasyhur: tei Elyoe̒nai, Maaseya, Ismai̒la, Nataneel, Yojabad, wau Elasa.

²³ Tau-tauwalo Lewi: tei Yojabad, Simei, Kelaya (wau olo ilunte Kelita), Petahya, Yuda wolei Eliejer.

²⁴ Tahi poolahua: Eliyasib. Tahi podahawa huhebu hulubangi Bele lo Eeya: tei Salum, Telem wolei Uri.

²⁵ Tau-tauwalo Isirai̒lu uwewo: Kaumu Paros: tei Ramya, Yejia, Malkia, Miyamin, Eleajar, Malkia wolei Benaya.

²⁶ Kaumu Elam: tei Matanya, Jakaria, Yehiel, Abdi, Yeremot wolei Elia.

²⁷ Kaumu Jatu: tei Elyoe̒nai, Eliyasib, Matanya, Yeremot, Jabad wolei Ajija.

²⁸ Kaumu Bebai: tei Yohanan, Hananya, Jabai wolei Atlai.

²⁹ Kaumu Bani: tei Mesulam, Malukh, Adaya, Yasub, Seal wolei Yeramot.

³⁰ Kaumu Pahat-Moab: tei Adna, Kelal, Benaya, Maa̒seya, Matanya, Bejaleel, Binui wolei Manasye.

^31-32 Kaumu Harim: tei Eliejer, Yisia, Malkia, Semaya, Simeon, Benyamin, Malukh wolei Semarya.

³³ Kaumu Hasum: tei Matnai, Matata, Jabad, Elipelet, Yeremai, Manasye wolei Simei.

^34-37 Kaumu Bani: tei Maadai, Amram, Uel, Benaya, Bedeya, Keluhu, Wanya, Meremot, Elyasib, Matanya, Matnai, Yaasai.

^38-42 Kaumu Binui: tei Simei, Selemya, Natan, Adaya, Makhnadbai, Sasai, Sarai, Ajareel, Selemya, Semarya, Salum, Amarya wolei Yusu.

⁴³ Kaumu Nebo: tei Yeiel, Matica, Jabad, Jebina, Yadai, Yoel wolei Benaya.

⁴⁴ Ngoa̒amila tau boito malonika wolo mongobua lonto bangusa deli. Yi mongo dilebua boito hebilua̒aya limongolio wau pilolontulo pee̒-pee̒enta wolo mongo walai̒ mongolio.