ESRA 1 - KITABI HABARI MOPIOHE

Tei Kores helo poluasi taulo Yahudi lohualinga ode lipu limongolio

¹ To bohulo taunu pamalenta lei Kores, olongia lo Persia, Eeya heloponao̒ wolo u mapilo tahuda-Lio mai lotimbulude oli Nabi Yeremia. Eeya lohuntula hilaa lei Kores u lopolualao̒ palenta tuwau u hepilobaca to ngoilanggubu yilaidialio. Tingohio odie mola:

² “Utieelo palenta lei Kores, olongia lo Persia. Eeya, Allahu Taa̒ala takawa-kawaasa tosologa malo powali mai olau̒ olongia to ngoilanggubu dunia, wau longohi tuugasi olau̒ u momongu bele ode Eeya to Yerusalemu tomadala Yehuda.

³ Pohileaala dua̒ Allahu Taa̒ala moduo̒lai olimongoli ngoa̒amilalo talowali umati-Lio. Timongoli musi mohualinga mola ode Yerusalemu wau muli momongu mao̒ Bele lo Eeya, Allahu Taa̒ala lo Isirai̒lu, Allahu Taa̒ala tabilu-biluloa̒ to Yerusalemu.

⁴ Wonu woluo ngotaalio lo umati-Lio to tambati lo polayahu botie tamei̒ bantu u moo̒ walinga mola, yi mongo tiheedio musi momantu mao̒. Timongolio musi momantu mao̒ talaa̒ wau hulawa, potomeu̒ to dalalo wau binatangi podetohelo, wau olo dedee-wowaalo ode Bele lo Eeya to Yerusalemu.”

⁵ Lapatao̒ mongo tau̒wa lokaumu lonto suku Yehuda wau Benyamin, mongo iimamu wau tau-tauwalo Lewi, timii̒du taa u hilaalio iliyoo̒ lo Allahu Taa̒ala, lotidapa-dapato u lohualinga ode Yerusalemu wau luli lomongu mola Bele lo Eeya.

⁶ Ngoa̒amila tiheedi mongolio lodudua̒ lomantu helongohi mao̒ babaa-rangiyaalo, debo odelo pakaa-kasiyaalo talaa̒ wau hulawa, potomeu̒ todalalo, binatangi podetohelo, harata upango wewolio wau dedee-wowaalo ode Bele lo Eeya.

⁷ Tei Kores helo polualao̒ mamaa-nggowaalo wau hahaa-latiyaalo u muloololio mai hepilomake todelomo Bele lo Eeya to Yerusalemu. Babaa-rangiyaalo boito mabilintao̒ li Olongia Nebukadnejar wau pilopodutu todelomo kuili lo dedeewalio lohihilao.

⁸ Tei Kores lohudu mao̒ uruusani lo babaa-rangiyaalo boito odelei Mitredat, tau̒wa lo tamoolahua harata upango lo bele biluloa̒ saaha li olongia. Lapatao̒ tei Mitredat helohutu mao̒ daputali lo babaa-rangiyaalo boito odelei Sesbajar, gubolonulu lo Yehuda.

^9-10 Uti-utieelo duputarilio: Mamaa-nggowaalo hulawa ode upacara podewowalo 30 Mamaa-nggowaalo talaa̒ ode upacara podewowalo 1.000 Mamaa-nggowaalo wewolio 29 Mamaa-nggowaalo kekeei̒ lohulawa 30 Mamaa-nggowaalo kekeei̒ lotalaa̒ 410 Pakaakasi wewolio 1.000

¹¹ Ngoa̒amilalo ngojumula 5.400 manggo hulawa wau talaa̒ wau babaa-rangiyaalo wewo. Ngoa̒amilalo boito dilelo lei Sesbajar tou̒ tio wau tahe pilolayahu uwewo lomonggato lonto Babel ode Yerusalemu.