EPESUS 6 - KITABI HABARI MOPIOHE

Tau̒kekeei̒ wolo tiilo tiyamolio

¹ Tau̒kekeei̒! Odelo muri li Almasi, dungohi mao̒ mongo dulaa̒amu, sababu uitolo upaatuti pohutuwolo.

² “Hulumatia mao̒ tiyamamu wau tiilamu” uito yito palenta bohulio monto Allahu Taa̒ala wolo danti,

³ deu̒ito-yito: “Alihu yio̒ sanangi tutu wau hayahaya tutumulumu todunia.”

⁴ Mongo wutato tamowali tiyamo! Diila mao̒ pohutuo mongo walau̒mu odito rupalio tilinggula timongolio mowali moingo. Bolii̒o mao̒, pou̒daa̒awa mola timongolio wolo taratibu wau pongaajali lo Eeya.

Wato wau tuani

⁵ Mongo wutato tamowali wato! Dudui̒ mao̒ palenta lituanimu todunia botie. Pohutua mao̒ uito wolo laasa hulumati boli modungohe wau lou̒ tio̒otutua debo odelo pohutuo mao̒ limongoli toli Almasi lohihilao.

⁶ Diila mao̒ potihutu odito bo tou̒ timongoli he imatowalo, bo u moo̒tapu poloi̒laalo pujio lomanusia. Bo timongoli mamusi mopohutu mao̒ odelo wato li Almasi tadonggo hemodudua̒ otohilaa lo Allahu Taa̒ala wolo lealeaatu lohilao.

⁷ Kalaja u pohutuo limongoli odelo wato boito, mamusi kalajaa mao̒ limongoli wolo hilaa u meengahe debo odelo Eeyaalo tahe bayawa limongoli, wau diila bo manusia.

⁸ Poo̒toloma mao̒ deu̒ timii̒du tau, mopio wato meaalo taa molopato, mamololimo pahala monto Eeya to susuu-aliyaalo u mopiohe upilo hutulio.

⁹ Mongo wutato tamowali tuani! Mamusi timongoli ohuhaama odito olo ode mongo watomu. Diilalo mao̒ pomakea aa̒an-jamuwaalo. Eelai deu̒ timongoli wau mongo watomu boito, tutuuwauwa otuani ngota, deu̒ito-yito Eeya tatosologa. Tio diila momilohe baya.

Tingolo Allahu Taa̒ala u wimu-wimumuto

¹⁰ Pulitio mao̒, mamusi timongoli mowali molotolo wolo olootolo u lotapu limongoli lonto kawasa lo Eeya, sababu timongoli lotituwau wo-Lio.

¹¹ Pomakea mao̒ ngoilanggubu pohi wumumuto lo popaatea uilohi mai lo Allahu Taa̒ala olimongoli, alihu timongoli moo̒ tahangi moluwali aa̒a-kaliyaalo u moleeto monto Ibilisi.

¹² Sababu ito mohipate diila moluwali manusia, bo moluwali ngoa̒amila olootolo lo lalaa-tiyaalo u motolo kawasa jamani u moleeto botie. Ito moluwali olootolo roroo-huwaalo moleeta u motolo kawasa dulente daa̒.

¹³ Sababu uito, botia, pomakea mao̒ ngoa̒amila pohi wimumuto popaatea lo Allahu Taa̒ala, alihu todulahe u moleeto timongoli mambo moluwali tutuu-huwaalo musu. Wau alihu lapatao̒ timongoli mohipate demola pulitio, timongoli donggo molotolo wau buheli.

¹⁴ Mamusi timongoli mopoo̒ daha-dahaalo mao̒. Pomakea mao̒ otatapu wau molotolo hilao duo̒lo Allahu Taa̒ala odelo bintolo wohuta, wau otuulusi odelo boo̒ watemu.

¹⁵ Mamusi oleela u mopohabari Habari Mopiohe umodelo ode salaamati mowali sapatumu.

¹⁶ Timii̒du wakutu pomakea mao̒ palacayamu to Eeya odelo tingolo polame; wolo iimani boito timongoli mowali momate ngoa̒amila walao̒ pana otulu monto Ibilisi.

¹⁷ Hamawa mao̒ oa̒ahu odelo helemu waja, wau tahuda lo Allahu Taa̒ala odelo wamilo lo Rohullah.

¹⁸ Pohutuwalo mao̒ ngoa̒amilalo boito sambela modua̒ mola u mei̒ tulungi mai monto Allahu Taa̒ala. To timii̒du ohiyango, podua̒alo odelo woloolo mola Rohullah helodelo olimongoli. Mamusi timongoli laito dapadapato wau diila mao̒ potaa̒luku. Podua̒alo laito duo̒lo umati lo Allahu Taa̒ala.

¹⁹ Wau dua̒i mola watia olo, alihu towakutu watia mobisala, Allahu Taa̒ala mongohi mai olaatia loi̒ya u tuhata. Wau alihu watia lou̒ buheli mowali mopoo̒taa hitua-tuawua u milakusudu hetuuolo Habari Mopiohe boito.

²⁰ Sababu Habari Mopiohe boitolo, watia lowali ngotaalio lo utolia, wau botia woluo todelomo tutupa. Podua̒alo mola alihu watia buheli mobisala pasali lo Habari Moiohe boito, odelo woloolo mola watia musi mobisala.

Salamu pulitio

²¹ Tei Tikhikus, wutatonto wau tamoomayawa taa tatapu wau molotolo hilao todelomo kalaja lo Eeya, mamopoo̒taa mai olimongoli totoonulalo u hitua-tuawua pasali lowatia, alihu otaawa limongoli owowoluwoa lowatia wau kalaja lowatia.

²² Uitolo sababuulio watia lolao mai olio odeli mongoli u mopoo̒taa owowoluwoa lamiaatia olimongoli ngoa̒amilalo, alihu moo̒ udaa̒ hilaa limongoli.

²³ Pohileaala dua̒ Allahu Taa̒ala, wau Eeya Isa Almasi mopoluasi mai ngoa̒amila jamaa̒ u motituwau wau mototoo-lia̒nga wau debo palacaya li Almasi.

²⁴ Pohileaala dua̒ Allahu Taa̒ala mobalakati Wutato ngoa̒amila tamo tolia̒ngo Eeyanto Isa Almasi wolo tolia̒ngo udiila mowali mooli. Hulumati lamiaatia, Paulus 17