EPESUS 5 - KITABI HABARI MOPIOHE

Tumumulo todelomo u mobango

¹ Timongoli yito mongo walao̒ Allahu Taa̒ala tapilonu-Lio, sababu uito timongoli musi motolopani modudua̒ obaaya lo Allahu Taa̒ala.

² Tutumuli mongoli mamusi napasiyalo wolo tolia̒ngo, debo odelo ti Almasi olo lomonu olanto. Tio lopo bake batanga-Lio olanto, odelo tuwaulio lodewo umoonu wau moo̒sanangi hilaa lo Allahu Taa̒ala.

³ Timongoli yito umati lo Allahu Taa̒ala. Sababu uito totoonulalo huhutu u huloto wau diila paatuti, meaalo olanggamu diila paatutilio woluo tohungi mongoli. Diila bolo taa wewo o alaasani u moloi̒ya deu̒ timongoli helohutu susuu-aliyaalo odelo uito.

⁴ Diila paatuti olo olimongoli moloi̒ya tataa-heyaalo u kootolo, u huloto wau udiila paatuti. Bolii̒o mao̒ mamusi timongoli molapali mola sukuru ode Allahu Taa̒ala.

⁵ Poo̒tuota mao̒ tio̒otutua: taa u opii̒li huloto, meaalo diila paatuti, meaalo langgamu (pii̒li debo odelo uito tutuuwauwa wambai̒o lou̒ molubo balaahala), tau boito diila mowali pongawaa̒ umati tapilalenta li Almasi wau Allahu Taa̒ala.

⁶ Diila mao̒ timongoli o aakalia lo loloo-iyaalo utoongi. Sababu susuu-aliyaalo botieelo u mopotoodei muluka lo Allahu Taa̒ala totau-tauwalo tadiila hidungohe o-Lio.

⁷ Oditolio, diila mao̒ pohumbuta sama-samaata wolo tau-tauwalo debo odelo uito.

⁸ Timongoli lohihilao mulooloalio todelomo dio̒lomo. Botia timongoli malowali umati lo Eeya, oditolio timongoli woluo todelomo mobaango. Masababu uito timongoli musi tumumulo todelomo mobaango.

⁹ Sababu monto mobaango boitolo mobutu mai totoonulalo huhutu umopiohe hidala-dalaala, aadili wau tuulusi to bibilohu Allahu Taa̒ala.

¹⁰ Potolo panilo u motota mao̒ wolo umoo̒ sanangi hilaa lo Eeya.

¹¹ Diila mao̒ pohutua totoonulalo huhutu udiila ohuna u hepohutuo lotau-tauwalo tahitumula todelomo dio̒lomo. Bolii̒o mao̒ mamusi tio̒otutua yinggila mao̒ limongoli susuu-aliyaalo debo odelo uito. (

¹² Sababu susuu-aliyaalo u pohutuo limongolio wolo tuua̒ao̒-tuua̒ao̒ boito, u bisalaalo olo maloo̒olito.)

¹³ Totoonulalo hitua-tuawua u tinelalo todelomo mobaango, mao̒ontonga wolo mopatato.

¹⁴ Sababu ngoa̒amila u mowali oontonga wolo mopatato, deu̒ito-yito mobaango. Uitolo sababuulio loi̒loi̒ya “Pobongulo, wuu yio̒ tatuutuluhu, wau pobongulo monto opopate! Ti Almasi mamotinelai toitaatumu.”

¹⁵ Sababu uito, poo̒tuota mao̒ tio̒otutua dudelo tutumuli mongoli. Diila mao̒ potitumulo debo odelo tau-tauwalo tahi hulode, poti tumuloolo debo odelo tau-tauwalo molinepo.

¹⁶ Pohunawa mao̒ lou̒ tio̒otutua timii̒du hiango uwoluo toli mongoli, sababu maasa botie yito maasa u moleeto.

¹⁷ Diila mao̒ potihulodu, bo tuletea mao̒ wolo u otohilaa lo Eeya.

¹⁸ Diila mao̒ potihuwoo̒ lo angguru timongoli, sababu uito mamoo̒luusa olimongoli. Bolii̒o mao̒, mamusi timongoli kiluwaasa lo Rohullah.

¹⁹ Pomakea mao̒ tataa-heyaalo monto Jaburu, lahu puji poloi̒laalo momuji wau lahu lorohu, todelomo bibii-salawaalo limongoli. Mamusi timongoli wolo hilaa meengahe mopolahu mola puji poloi̒laalo momuji ode Eeya.

²⁰ Mololaita wau tomimbihu penu boli wolo olo, mamusi timongoli molapali mola oduo̒lo ode Allahu Taa̒ala ti Paapa, to tangguli Isa Almasi Eeyaanto.

Motolodile

²¹ U mohulumati li Almasi, paatutilio timongoli taa̒luku ngota timongota.

²² Dile taabua, tuu̒dio motaa̒luku todile talolai limongoli, tutuuwauwa debo odelo to Eeya.

²³ Sababu dile talolai yito tau̒wa todilelio, tutuuwauwa debo odelo toli Almasi olo talowali tau̒wa tojamaa̒ wau Tio lohihilaolo olo Olongia Tamoo-poa̒ahua duo̒lo jamaa̒ talowali batanga-Lio.

²⁴ Tutuuwauwa debo odelo jamaa̒ olo taa̒luku toli Almasi, odito olo todelomo ngoa̒amila sua̒li dile taabua musi taa̒luku todilelio.

²⁵ Wuu dile talolai, tolia̒ngi mao̒ dilemu, tutuuwauwa debo odelo ti Almasi momonu jamaa̒ wau lopo bake batanga-Lio ode jamaa̒ boito.

²⁶ Ti Almasi lohutu mai uito alihu Tio moo̒ pobelesi jamaa̒ boito wolo pongaajali-Lio wau moli taluhu popolihu, alihu lapatao̒ uito Tio mowali wuduo-Lio ode Allahu Taa̒ala.

²⁷ Lou̒ odito ti Almasi mohutu jamaa̒ boito tihutihula wolo lailaio̒ wau belesi totalu-Lio, diila oa̒aibu meaalo wentea̒ penu boli loolo.

²⁸ Odito olo dile talolai musi motolia̒ngo dilelio debo odelo tio motolia̒ngo batangalio lohihilao. (

²⁹ Diila pee̒enta mao̒ woluo taa u molonuo̒ batangalio lohihilao. Bolii̒o mao̒, tio molaala wau modaha olio debo odelo ti Almasi olo molaala jamaa̒-Lio.

³⁰ Otaawanto uito, sababu ito yito popoo-ngawaa̒alo batanga li Almasi.)

³¹ Todelomo Kitabi tulatulade, “Sababu uito talolai̒ ngota mamololaa mao̒ tiilo wau tiyamolio u motituwau wolo dilelio, wau duduulotalo mamowali tuwau.”

³² Ayati boito wanto-wantohe boliilio u modelomo. Wau poa̒ayito mao̒ lowatia uito wolo wumbuta wolota li Almasi wau jamaa̒.

³³ Bo ayati boito o wumbutio olo woli mongoli: Mamusi timii̒du dile talolai motolia̒ngo dilelio debo odelo tio motolia̒ngo batangalio lohihilao wau mamusi timii̒du dile taabua motolopani u mohulumati dilelio.