EPESUS 4 - KITABI HABARI MOPIOHE

Otuuwau lobatanga

¹ Uito sababuulio watia – tau ngota lotutupa, tau̒ tataahangi sababu hemomaya to Eeya – mohile lou̒ tio̒otutua olimongoli: poti tumulolo motuuu̒de wolo huhuloa̒a limongoli debo odelo taamaa tiliyango Allahu Taa̒ala.

² Mamusi timongoli laito motidupapa lohilao, molumboyoto, wau sabali. Pobilohe mao̒ tolia̒ngi mongoli lou̒ momantu ngota timongota.

³ Potolo panilo tio̒otutua tumumula wolo dame alihu otuuwau u pilowali mai lo Rohullah debo taataalo.

⁴ Bo woluo batanga tuwau, wau Rohu tuwau. Odito olo timongoli tiliyango duo̒lo tuwau halapani u tutuuwauwa.

⁵ Bo woluo tuwau Eeya, tuwau iimani, tuwau popolihua,

⁶ wau tuwau Allahu Taa̒ala, talowali ti Paapa lotaa ngoa̒amila. Tiolo Eeya ngoilanggubu aalamu, tahelo kalaja lotimbulude tou̒ ngoa̒amilalo, wau okawasa todelomo ngoa̒amilalo.

⁷ Ito ngota-ngota lololimo tuwaulio lo wowohi lodudua̒ wolo uilohi mai li Almasi.

⁸ To delomo Kitabi tulatulade, “Tou̒ Tio mobotula mola ode tambati u molanggato daa̒, Tio modelo dadaata tawalo; wau Tio mongohi totoonulalo wowohi tomanusia.”

⁹ Naa, wonu loi̒loi̒ya “Tio lobotulo” boliilio mao̒ tou̒ bohu-bohulio Tio malo tuhutai demola tambati u wopa-wopaalo mao̒ todunia botie.

¹⁰ Wau Tio tamalo tuhutai boito, Tiolo olo talo botula demola tambati ulebe molanggato daa̒ monto ngoa̒amila hulungo tilinggula ngoilanggubu aalamu ilotuanga lo ilowoluwoa-Lio.

¹¹ Tiolo “talongohi mai totoonulalo wowohi tomanusia”; ngotayadu piludu-I̒o lowali rasulu, tawewo lowali nabi; tawewolio poli lowali Tamo pohabaria Habari Mopiohe boito, wau tawewo poli piludu-I̒o lowali guguu-ruwaalo wau tamolaalawa jamaa̒.

¹² Utie pilohutu-Lio alihu umati lo Allahu Taa̒ala powimumutola lou̒ lealeaatulo mao̒ alihu mowali momaya to Eeya wau momongu batanga li Almasi.

¹³ Lou̒ odito ito ngoa̒amila mowali tuwau sababu iimani u tutuuwauwa wau huhaama u tutuuwauwa tomimbihu Walao̒ Allahu Taa̒ala. Wau ito mowali tau-tauwalo tamoontapo u hihii-heolio mao̒ helebe oduhenga mola ngoa̒amilalo wimu-wimumuto debo odelo ti Almasi.

¹⁴ Yi ito diilalo mowali mongo walao̒ tahepo bale-baleangio wau heo̒ delo-delowalio odito mota odia mai lo pongaajali u hidala-dalaala lotahi o aakalia dadaata u moleeto. Timongolio hemopoo̒ lapala tau wolo yimbulo u hidala-dalaala limongolio.

¹⁵ Diila! Bolii̒o mao̒ ito musi mopo biloheo̒ susuu-aliyaalo u otutu wolo hilaa ulealeaatu motolia̒ngo, tilinggula todelomo totoonulalo sua̒li ito hihii-heolio mao̒ helebe mowali mola wimu-wimumuto ngoa̒amilalo debo odelo ti Almasi talowali tau̒wanto.

¹⁶ To walungo lo totau̒wa-Lio, ngoa̒amila pongawaa̒ lobatanga boito leisusungi mopiohe, wau tinggai pilopo wumbutio lotimii̒du leleetualio. Wau wonu timii̒du pongawaa̒ boito mokalaja debo odelo u patutilio, yi ngoilanggubu batanga boito mamobutu mowali leidaa̒ wau molotolo moli tolia̒ngo.

Tutumulo u bohu todelomo li Almasi

¹⁷ Sababu uito domi tanggulo Eeya, uti-utieelo u mapolele wau popidudutai lowatia: diilalo potitumulo debo odelo tau-tauwalo tadiila hitootawa to Allahu Taa̒ala, wau momikiilangi udia-diaaluo mao̒.

¹⁸ Pikiilangi limongolio malo dio̒lomo. Timongolio diila motota lo tutumulo uilohi mai lo Allahu Taa̒ala, sababu timongolio sama-samaata diila o pongotota wolo-wolo pasali lo Allahu Taa̒ala. Timongolio odito, sababu baa̒ngiyolo.

¹⁹ Timongolio madiilalo owoolito, tilinggula timongolio helo dudua̒ totoonulalo ilohilao moo̒ohuu̒ limongolio, wau tumutumulo huloto lodudua̒ totoonulalo otohilaa lohilao.

²⁰ Boti Isa Almasi tao̒taawa limongoli diila odito!

²¹ Timongoli malo dungohe tomimbihu o-Lio! Wau odelo tahidudua̒ o-Lio, timongoli mai̒laajali olo pasali pii̒li lo Allahu Taa̒ala u woluo to o-Lio!

²² Sababu uito yinggila mao̒ manusia deedelo wolo pohuli tutumulo deedelo udonggo herusaalio lou̒ totoonulalo ilohilaalio umopo lapalo.

²³ Pikiilangi wau hilaa limongoli mamusi pobohuwalo ngoa̒amilalo.

²⁴ Mamusi timongoli tumumulo odelo manusia bohu u pilowali modudua̒ gambali lo Allahu Taa̒ala; deu̒ito-yito wolo pii̒li u otutu, motulidu wau mantali.

²⁵ Sababu uito Mongo wutato ngoa̒amilalo, diilalo pohimbulo. Potiwalilo juujulu ode ngota timongotalio, sababu ito ngoa̒amila yito tutuuwauwa pongawaa̒ lobatanga li Almasi.

²⁶ Wonu timongoli moingo, diila mao̒ polulia oyiyingo boito moo̒sababu olimongoli odusa. Diila mao̒ poingo ngotupa lodulahu.

²⁷ Alihu Ibilisi diila ohiyango.

²⁸ Taa u biaasa motao̒ musi mohuheli motao̒. Bolii̒o mao̒ tio musi mokalaja alihu moo̒tapu rijiki wolo hilaa motulidu wau moo̒ tulungi tahi odiaaluwoa.

²⁹ Wonu timongoli mobisala, diila mao̒ pomake tataa-heyaalo u kootolo. Pomakea mao̒ wambai̒o tataa-heyaalo umopo dulungo wau u motulungi taa wewo. Tataa-heyaalo debo odelo uito mamoo̒ toduo mai u mopiohu titau-tauwalo tamo dungoheo̒.

³⁰ Diila mao̒ posuukalia hilaa lo Rohullah. Timongoli masilaaha-Lio wolo Rohu, lowali miliki lo Allahu Taa̒ala. Rohu boito olo debo odelo pongaku deu̒ Dulahu Polobebasi mamei dungga mai ode limongoli.

³¹ Yinggila mao̒ totoonulalo umoo̒ ngongoto hilao; niyati wau moingo. Diilalo potiwati-watio̒ wau momua-muayo. Diilalo powoluwoa pongolaasa umolonuo̒ meaalo pongolaasa wewolio debo odelo uito.

³² Bolii̒o mao̒, mamusi timongoli o hilao u mopiohe wau modehu hilao ode ngota-timongota, wau mongaa-ngambungua tutuuwauwa debo odelo Allahu Taa̒ala olo longambungu mai olimongoli lotimbulude li Almasi.