AYUBA 26 - KITABI HABARI MOPIOHE

Tei Ayuba

^1-2 Bo tei Ayuba loloi̒ya mao̒, “Malo odito woolatio yio̒ mongohi polo tulungi to olau̒ taa u molulupuhu wau ilowoongolo!

³ Malo odito piohio potua wau pongaajali boito u mailohimu mai olau̒, taa u abaloolo!

⁴ Ode olita loi̒yamu boito leidulungo? Tatoonu talo ngilihamu mai olemu u lobisala debo odelo uito?”

Tei Bildad

⁵ Tametao̒ lei Bildad, “Tau-tauwala to aalamu mautu hilumuhelo; taluhee wau tuango lipulio hulu-huluhelio.

⁶ Totalu lo Allahu Taa̒ala, dunia lotaa mate lohuo̒, diila loheu̒to tilinggula iloontonga-Lio.

⁷ Allahu Taa̒ala lomua̒de mola hulungo toitaato auhe daa̒, wau lopo ntayunga dunia tohuwali udaa̒ koosongi.

⁸ Dilutohe lo Eeya heengo wolo taluhee laba-labaalo daata, bo heengo boito diila lokaidingo sababu buheetio.

⁹ Tiluuo̒ Eeya baya lo hulalo mopulaa limo hui to dibalaka loheengo u mabilua̒a-Dio.

¹⁰ Gilaambali lo Eeya hulilingo totudu lo auhu u lopobua̒ u mobaango monto modio̒lomo.

¹¹ Wonu Eeya mongantingo wolo suala hula-hulaubio, wowoo-lihiyaalo polumude hulungo humuhela.

¹² Auhe daa̒ tilaa̒aluku lo kawasaa-Lio wau ti Rahab olo pilate lo owoolaa-Tio.

¹³ Napasi-Lio longaa̒to hulungo tunggula lobaanga daa̒; ulu-I̒o helomate naha yila-yilateelo mao̒ u ngopee̒ lolahi.

¹⁴ Bo ngoa̒amila boito bo potuoto lo kawasaa-Lio; bo loohuma u leidungga mai to bulonganto. Mailaba ngoi̒di pongotota to olanto pasali lo Allahu Taa̒ala wau oheebati kawasaa-Lio!”