AYUBA 20 - KITABI HABARI MOPIOHE

Tei Jopar

^1-2 Lapatao̒ tei Jopar lolametao̒, “Wuu Ayuba, wau̒ diila molaasa sanangi olemu, botia wau̒ ohilaa hua̒a mongohi mai totametuu̒.

³ Loi̒yamu boito otutu mohina, bo otaawau̒ woloolo mola molametao̒.

⁴ Bo tingga otaawamu, deu̒ monto jamani muloololio mai daa̒, anggadu manusia bohu-bohulio pilopo tambati todunia,

⁵ oweengahu lotaa moleeto bo ngopee̒ mola, wau osanangi lotaa juluhaka bo ngoi̒nta lomato?

⁶ Eleponu odudaa̒lio demola dulente daa̒, tilinggula lunggongio molenggula heengo to hulungo,

⁷ bo tio mamooli ohiheo-hiheolo mao̒, mooli monto dunia wolo dudelo u hina. Tau-tauwalo tapee̒enta loo̒taawa wolio, mamohintu, “Wuu, ode utoonu nao̒olio?”

⁸ Tio mamooli debo odelo wolilu lo tohiilopo, mooli debo odelo bibilohu tou̒ hui.

⁹ Tio diilalo oontongo lomato; tio diduu̒ totambati biluloa̒lio.

¹⁰ U omoo̒moolu tilao̒lio monto taa u diaaluo musi tuloa̒a lomongo walai̒o.

¹¹ Eleponu tio humula wau molotolo boli buheli daa, bo ngopee̒epo tio mamowali wahu sama-samaata.

^12-13 Malo odito wolingo ololeeto todelomo tunggilio! Rasaalio tabitabi u hua̒a tololoolio; sababu uito tilahulio towalungo dilalio, alihu mohiheo olamitalio.

¹⁴ Bo ua̒alo boito mobolio̒ todelomo ombongo, mowali peedi u mopaa̒to moo̒toduo mai mautu.

¹⁵ Halata tilao̒ u tiloloolio, lou̒ pakusa pilotuo̒lio; Allahu Taa̒ala lopolualao̒ lonto delomo ombongio.

¹⁶ Taamoleeto mamongilu peedi u moo̒toduo mai baala, tio maamate woleeto debo odelo tilopango tulidu obisa.

¹⁷ Tio diila tamoo̒ lamita winulo jaitun ulaba-labaalo daata, meaalo susu wau hula lotiia̒ u lobangguwato dadaata tutu.

¹⁸ Totoonulalo untungilio musi powalingolio; tilapulo kelekelalio diila tao̒ lamitalio.

¹⁹ Sababu tio helodeehe wau longoi-lolohia taa udiaaa̒ wolo-wolo; tio lolambata bebee-leyaalo udiila bilongulio.

²⁰ Sababu langgamulio diilalo o eenggadelio, yi tio diila tamowali olulia lohilao.

²¹ Wonu tio molamelo yi ngoa̒amilalo poo̒pulitolio, sababu uito omaa̒amululio diila moo̒taahangi.

²² Tou̒ boli-bolitutuo̒ omaa̒amululio, dutolo wau limilimi meidungga molemba to olio.

²³ Tou̒ tio odito oloohu moluango ombongio, Allahu Taa̒ala malo muluka daa̒ wau muhukuumani olio.

²⁴ Wonu tio tumeteo̒ mohalahu monto wamilo waja, tio mapaalia lopana tombaha.

²⁵ Tio otuhata lopana, tilinggula paliyalo, mato lopana u molilingga molaapata to wawai̒o, yi owowoohe mamo henggube hilaalio.

²⁶ Moa̒antulu lomola ngoa̒amila halata tilahulio; tio wolo ngoilanggbu ngaalaa̒lio maahu lotulu udiila pilopolei̒to lomanusia.

²⁷ Hulungo momuo̒ mai ololeetio; dunia mobongu moluwali olio.

²⁸ Totoonulalo okokayalio mabinaasa, sababu tombulaa̒ muluka lo Allahu Taa̒ala.

²⁹ Ui-uitolo paladu lotaa moleeto, paladu utilantu mai lo Allahu Taa̒ala olio.”