AYUBA 17 - KITABI HABARI MOPIOHE

¹ Opopateu̒ malo himbidei, ngopee̒ mobuntolo mola napasiu̒; bo polobungalo wambao u leitolaa to olau̒.

² Wau̒ lowali pilohentea̒ lotau; iloontongau̒ malo odito timongolio hemo pomukaa̒i dalili.

³ Watotia botie hilaa motulidu, yaa Allahu Taa̒ala. Ambunguolo palacayailo mai watotia! Donggo tatoonu poli tamoo̒ tulungi loi̒ya lowatotia?

⁴ Hileu̒ta lo Eeya hilaa limongolio tilinggula diila mongalati; diila bolo timongolio mopo taa̒aluku olo watotia botia.

⁵ Modudua̒a lumadu, tatoonu tamopo duloheo̒ sahabati domi o uuntungi, mongo walai̒o lohihilao mamololimo tontuli.

⁶ Botia watotia dilalili wolo lumadu boito; timongolio lonao̒ mai lonula loiyohu baya lowatotia.

⁷ Matou̒ yilambulo sababu suukali lohilao; ngangaawaa̒lo mao̒ batangau̒ lohata lominggalato.

⁸ Taa u hisaalea, iloohea wau lolinggolabu; taa udiila ototala hemo nganggapu olau̒ diila o eeya.

⁹ Taa u mopiohe wau tadiila ototala, helebe yakini mola todudelo lo tutumulio motuhatawa to Allahu Taa̒ala.

¹⁰ Bo humayaalio timongoli ngoa̒amila monao̒ mai odia, diaaluo penu boli ngotaa mao̒ tamaa odunggaau̒.

¹¹ Duduulahuu̒ malo paluto, diila lomata lomola totoonulalo ranjanau̒; yilooli olo ngoa̒amila titatita lohilaau̒.

¹² Bo mongo sahabatiu̒ helo loi̒ya, ‘Hui boito dulahu wau mobaango ngopee̒ meidungga.’ Bo otaawau̒ todelomo hilaau̒ deu̒ debo modio̒lomo lomola owowoluwou̒.

¹³ Bo dunia lomautu wambao̒ u hehalapuwou̒, mola teto wau̒ mamotuluhu todelomo u modio̒lomo.

¹⁴ Kuubuluu̒ ilunteu̒ “Tiyamau̒”, wau luluu-wantiyalo ilunteu̒ “Tiilau̒” wau “Wutatuu̒ taabua”.

¹⁵ Tou̒toonu halaapani olau̒; tatoonu tamomilohe owoluolio sanangi tutu olau̒?

¹⁶ Wonu bolo wau̒ molaahe mola ode dunia lotaa mate, wau̒ diilalo o halaapani.”