AYUBA 15 - KITABI HABARI MOPIOHE

POLO-BISALAWA OLUOLIO 15:1–21:34 Tei Elipas

^1-3 Yi tei Elipas lolametao̒, “Latabu, Ayuba, loi̒yamu otutu diila oboliilio! Diaaluo taa aaripu u molametao̒ debo odelo yio̒ botie, tio diila tamo poduulua batangalio wolo tataa-heyaalo udiila oboliilio.

⁴ Humayaalio tabibomu boito dudua̒alo, diaaluo penu boli ngotaa mao̒ tamoohe muli meaalo modua̒ mola to Allahu Taa̒ala.

⁵ Tataaheemu mopobukuti deu̒ yio̒ ototala, bo ololeetumu hedilepuhe wolo owoolaato lodila.

⁶ Diila palalu yio̒ potuludeu̒ mai wau potalaalo, sababu tataaheemu lohihilao yio̒ ilaibulio.

⁷ Wolo lantobumu yio̒ bohulo manusia tapilotutu mai? Tingga woluo yio̒ tou̒ huhuu-ideyaalo pilopowali mai?

⁸ Tingga ilodungohemu Allahu Taa̒ala helohutu ranjanaa-Lio? Tingga bo yio̒ tao̒ hikimati lomanusia?

⁹ Totoonulalo u otaawamu, otaawa lami olo; totoonulalo u opahamuamu, mopatato olo to olami.

¹⁰ Hikimati botie tilolimo lami lonto taa uwaalalo; timongolio mawoluo tou̒ tiyamamu diipo pilotutu mai!

¹¹ Yilongola liyango Allahu Taa̒ala moomu tolimoomu? Ami mobisala mai wolo sabali wau molumboyoto to tanggu-Lio.

¹² Bo yio̒ loingo daa̒, matomu lingga mao̒ lingga mao̒;

¹³ yio̒ loingo to Allahu Taa̒ala wau lobatata o-Lio.

¹⁴ Tingga woluo manusia sama-samaata diila ototala? Tingga mowali tio poo̒tutuwolo totalu lo Allahu Taa̒ala?

¹⁵ Tumbao̒ to malai̒kati olo Allahu Taa̒ala diila palacaya; timongolio diila mantali to bibilo-Hio.

¹⁶ Tidiyolo mao̒ manusia taloruusa wau o aibu, tamo linggupo ololeeto debo odelo taluhee wambai̒o.

¹⁷ Dungohi Ayuba, yio̒ mapoto-mbangau̒ mai u hitua-tuawua,

¹⁸ upilo ngaajali mai lotaa aaripu olau̒. Pongaajali boito tilolimolio lonto loluuhurulio, wau pilopo tolonga wolo wimu wimumuto to waliilio mola.

¹⁹ Tou̒ boito diaaluo tau deli tolipu limongolio; diaaluo talo polapalo olimongolio lonto Allahu Taa̒ala.

²⁰ Taa moleeto tahe modeehe timongotalio, mamolaasa moohe ngotupa lo tutumulio.

²¹ Titii-ngohuwalo upolu-polutuo̒ moo̒bungola bulongalio; to saaa̒ti u aamani tamoo-lambata mai moluhu olio.

²² Diila o halaapani olio mohei monto u modio̒lomo, sababu wamilo lo tamoomatea mate-mateelo mao̒ mohilapita olio to timii̒du ohiango.

²³ Bubuu-lungiyalo nasari hemohima saaa̒ti lo opopatelio, bubuu-rungiyaalo boito ohilaa mangoa monga milatelio. Yi longaratilo mola tio deu̒ suusaalo mola dulahio momooli.

²⁴ Baala debo odelo olongia molotolo boli buheli daa̒, malei dapato ohilaa momontoa̒a olio.

²⁵ Odi-odieelo mola paladu lotaa u motehengi Allahu Taa̒ala, wau buheli moluwali Taa Laba-labaalo kawasa.

^26-27 Wolo mangi-mangi tio moluhu wau moluwali Allahu Taa̒ala; bilintai̒o porisailio, tio neekati sama-samaata diila mohuto taa̒aluku.

²⁸ Tio lotitatapu to kokoo-tawaalo u loa̒antulu hia̒mbu-ambulatialo mao̒, to bebee-leyaalo u diaalu tabilu-biluloa̒. Kokoo-tawaalo boito matilantu u debo mowali tuodu.

²⁹ Okokaya lotau boito mamooli lou̒ diila obakasi; halata upangolio mamopulito sama-samaata.

³⁰ Tio diila tamoo̒hei monto u modio̒loma tutu; tulu mamomobu totoonulalo tumbui̒o. Tio mabinaasa lo humbuo̒ napasi lo Allahu Taa̒ala.

³¹ Wonu tio palacaya to udiila ohuna, yi maa oimbuloa tio; wau pahala umaa tolimoolio, diila ohuna olo.

³² Tou̒ diipo meidungga wakutuulio, tio maamate, debo odelo tango mololante u diilalo mowali moidu.

³³ Tio debo odelo bungo lo angguru u lodulahu hungolio, debo odelo bungo lo jaitun u loduduulahu bungalio.

³⁴ Taa u moleeto diila tao̒ wali mai; mopulito mopobulo mola bele u bilongulio monto tilapulo sooloi̒.

³⁵ Ui-uitolo timongolio tahipo ranjanawa u moleeto wau moponao̒ mao̒; wimbulo boli wimbulo laito woluo todelomo hilaalio.”