MATIUS 28 - AY ATAYI

Yesus aojaworsitef

¹ Barewen. E Ses Ban Jo aofefesen. Ajofay tam ara masirin, jopok aurumwisimefen. Er Hari Minggu arawen. E Maria Magdalenaam, e wun Mariaam, e awerem bapor, ajisosfesen.

² Tuhan malaikatam onam op aewneyefen. Ar e awerem jimasap ek apwepweremosomef, wunam e ek ton aemapefen. Inimas ajow awutnakut asimefen.

³ E malaikat bi, bare bwer inim sere awutnakut aemefen. Apakaianam salju inim fwesaknakut arawen.

⁴ E awerem manmok batiw ow omar awutnakut aefesen. Inimas dam tetete aefesen. Ar masirin, damir aaffes ow inim cimin aemamesfesen.

⁵ E malaikatam atakam e cepes aotawefen. “Car omar arapok. Car e Yesus apowpormokom apormin ara. Ow aramat ipic salib os op acatopomfes.

⁶ E nat, aram emeojaworsitor. Inimas e sumu ipic arasan opok. Er e atakam aotawefas jipu ara. Ca nat, dey! E aemamesef asan baporey.

⁷ Car masirin, mamsarimjisosey. Atakam e amamkawi ow mamotawey. ‘Aramat ipic emeojaworsitor. Ar e Galilea capinmi bap a takam ajisoscema. Car masirin, erasan asep ajisoscomokom. Car aramat ipic bi erasan aporcomokom.’ Inim mameey. Bare, dor a atakam car aotawmin ara.” Inim aeefen.

⁸ E cepes masirin, omar aefesen. Aram jak akatnakut aememfesen. E awerem asan bakan asarimjiosfesen. Ar, e Yesus mamkawi ow botaw, je akukuosfesen.

⁹ Yesus masirin, e cepes biamnuk asarimemamtewefen. Aramat ipicam “Selamato,” inim aeefen. E cepes masirin, aramat ipic bipu ameremfesen. Aram aramat ipic kamtar becer ajipiropfes, wunam aramat ipic asicimfesen.

¹⁰ Yesus masirin, atakam e cepes aotawefen. “Omar arapok. Ca nat, cey. E dojowow, e Galilea baysos, atakam mamotawey. Erasan ara, ar e dobi aporcemenes.” Inim aeefen.

E awerem manmok atiwfes tentara ow e aotawfes atakam

¹¹ Barewen. E cepes e bowsec cowocjarmepesaw, e awerem manmok batiw wun ow, e kota ajisosfesen. Ar e aporfesas takas, atakam, e Allah atakam mamtaw tugas ow awut, aotawfesen.

¹² Wunam, e Allah atakam mamtaw tugas ow awutam, e ownucuram, ajarewsiemfesen. Ar masirin, atakam aamsakamfes, wunam uang awut e tentara ow atetamfesen.

¹³ Aram atakam e tentara ow aotawfesen. “Car inim atakam mamotawey. ‘Iram isi cowocemamsesmom, e Yesus mamkawi ow aapenawesmes. Wunam e asumu ipic osom atewesmes.’ Inim mameey.

¹⁴ E gubernuram inim atakam jen ajicow, dar atakam aramat ipic aotawcomom. Inimas car bajurusem opok ara.” Inim aefesen.

¹⁵ E tentara ow masirin, e uang atewfesen. Aram e ow, e atawfes atakam jipu aefesen. Bare, wow ajiwaram, e Yahudi ow, e atakam aatamtawmes.

Yesus jirmec e amamkawi ow ajirimef.

¹⁶ Barewen. E Yesus mamkawi ow sebelas ajiwar, Galilea capinmi sikonpu ajisosfes. Er e Yesus jirmec ajirimef asan ara.

¹⁷ E ow e Yesus bi aporfes, ar aramat ipic asicimfes. E wun ow nat, bi binip arke aceceremfes.

¹⁸ Yesusam e owpu ameremef, wunam atakam aotawefen “Allah, dor e onam opas takas momomkurumam, awames capinmias takas momomkurumam, inim fakas dor emetetamfan.

¹⁹ Inimas ara, car e samatin samatin mamjisosey. E ow do mamkawi mammememtamey. Car doricipic juwasam, atiw juwasam, Roh Kudus juwasam, mamjiemey, wunam e ow bwi mambwimey.

²⁰ Caram e ow e jirmec ajirimfinas takas ji bwe, mammememtamey. Caram jakaperey. Dor join join akac car aatamemawarcimin— e asepnak jofay ajiwar ara.” Inim aeef.