MARKUS 4 - AY ATAYI

Eke bajimirsasam ipic baposomtew atakam

¹ Barewen. Wun jofay ara, Yesus e jopir aememefen. Aram atakam amememtamefen. Ow arkenakutam Yesuspu ajarewsifesen. Aramat ipicam e ow arkenakut aporefen. Inimas ar ci aneyjuapefen. Ar masirin, e jicupum inim ajirseefen. Aram e ci aemapefen. E ow arkenakutam e fwikin aemapfesen.

² Aramat ipicam baposomtew atakam arke e ow aotawefen. Aram e ow atakam amememtamefen. Aram inim atakam e ow amememtamefen:

³ “Atakam jen pajiey. Kebun kerja ipic eke bapom ajisefen.

⁴ Ar e eke ajimirsasamefen. Eke ajimirsasamef, wun eke e bwey asanpu aneyjuamestotorefen. Sokam apipisayneytotorfes, wunam e eke anakurumtotorfesen.

⁵ E wun eke masirin, ek capinmi asanpu aneyjuamestotorefen. Erasan jif awut opoknakap arawen. E jif, bare kow opoken. Inimas e eke asarimjittotorefen.

⁶ E nat, e pok akan bimi awut opoken. Inimas jo op atometapef ara, sisne aemaptotorefen. Aram sa asaefen.

⁷ E wun eke masirin, fa epcom akan aman aneyjuamestotorefen. E fa epcom akan nat, awut awanief, wunam e eke akan apwirimopefen. Aram e eke akan asanamimapomefen. Inimas e eke akan, anakat bwemtep opoken.

⁸ Wun eke masirin, capinmi akat asanpu aneyjuamestotorefen. E akanam ajittotorefen. Aram sur aotemtotorefen. Aram eke apeteptotorefen. E wun akan, eke tiga pulih ajiwar apeteptotorefen. Wun masirin, eke enam puluh ajiwar apeteptotorefen. Wun masirin, eke seratus ajiwar apeteptotorefen.” Yesus inim aeefen.

⁹ E Yesus masirin, “Jen fo ow a atakam jen bajices.” Inim aeefen.

Yesus e aposomtawef atakam, ucim inimaram?

¹⁰ Barewen. Asep ara, Yesus arop aemapefen. E amamkawi ow dua belas ajiwaram, e wun akac aememfes owam, aramat ipicpu aapenfesen. Aram aramat ipic e baposomtew atakam umuton botaw janim aanimfesen.

¹¹ E Yesus masirin, “E Allah Pemerintah aenawcow jofay atakam, bare amannakut atakam ara. E aman atakam jen bajikurum, bare caras ara. E cesen ow nat, e baposomtew atakam jen desen ajimes.

¹² Er e Alkitab atakam jipu ara: ‘E ow manmok batiwawarces. E nat, ar baporkurumasin. Aram jen bajiawarces. E nat, ar jen bajikurumasin. Aram bajarewemasin. Allaham adosa bakokoromosomasin.’ E Alkitab inim aema. Inimas e cesen ow, e baposomtew atakam jen desen bajices.” Yesus inim aeefen.

Yesus e eke bajimirsasam ipic baposomtew atakam umuton aotawef

¹³ Yesusam jonow e ow atowporefen. “Car a baposomtew atakam jen bajikurum opok aemamokomnew, car e wun baposomtew atakamam jen bwemjikurum asan opok.

¹⁴ Bare, e eke bajimirsasam ipic, Allah atakam botaw ipic inim awcawor ara.

¹⁵ E bwey asanpu aneyjuamestotoref eke masirin, e wun Allah atakam jen ajicemes ow inim awcawor ara. Ar e atakam jen ajices, Iblis e owpu asarimenawomcema. Ar e ow e jen ajices atakam bi binip atewcema.

¹⁶ E ek capinmi aneyjuamestotoref eke masirin, e wun Allah atakam jen ajimes ow inim awcawor ara. Ar e atakam jen ajices, jak akat aememcemes. Aram e atakam ji asarimecemes.

¹⁷ E ow nat, e atakam mamkawi fak opok aemcemes. Inimas ar jo jirow opoknakap ajamkawicemes. Ow e ow e atakam mamkawi aporces, wunam e ow ajurusumcesnew, aemsokomcesnew, bare e ow asarimkoremcemes.

¹⁸ E fa epcom akan aman aneyjuamestotoref eke masirin, e wun Allah atakam jen ajicemes ow inim awcawor ara.

¹⁹ Ar awames capinmias fa jakay aemcemes. Ar pok arke batat jak aseremomcemes. Aram pok jukpiri bakakayimat jak asinomcemes. Inimas ar e Allah atakam bi binip acawucemes. Aram Allah kerja bwemtamnak opok aemcemes.

²⁰ E capinmi akat aneyjuamestotoref eke, e wun Allah atakam jen ajimes ow awcawor ara. Ar e atakam asicimcemes. E wun masirin, ow tiga puluh ajiwar, Tuhan mamkawi amememapomcemes. E wun masirin, ow enam puluh ajiwar, Tuhan mamkawi amememapomcemes. E wun masirin, ow seratus ajiwar, Tuhan mamkawi amememapomcemes.” Yesus inim aeefen.

Pelita ember aman bakapimapom

²¹ Barewen. Yesus atakam e ow aootawefen. “Ow pelita acomsemces, ar e pelita ember aman bakapimapom open? Aram e pelita tempat tidur caman bajiwtewapom open? Ar inimas opok. Ar pelita e op asan atewapomcemes araman.

²² E bacukumapomas takas umuton atewapomcemes. E curuwas takasam, umuton aemapcemes. (E baposomtew atakam takas inimas cowok ara.)

²³ Jen fo ow a atakam jen bajices.” Inim aeefen.

²⁴ E Yesusam, “E jen ajimokom atakam pimicima. Car e atakam jen ajikurumcokom, Allah bi binip umuton car atetamceman. Aram car e wun atakam jen bajikurum, bi binip umuton aotetamceman.

²⁵ E atakam jen ajikurumces ow, wun atakamam jen aojicemes. E nat, e atakam jen bajikurum opok ow, e jen ajifesasam binip aanimcemes.” Yesus ini aeefen.

Eke ajittotoref baposomtew atakam

²⁶ Barewen. Aramat ipic wun atakamam aotawefen. “E Allah Pemerintah, jipic cowok eke ajimirsasamef inim awcawor ara.

²⁷ Iram e ipic isi apwitamesa aeefen. Tamam asita aeefen. E nat, e eke ajittotoref, wunam sur aotaptotorefen. Eras nat, ucim inimaram? E ipicam amsom opok.

²⁸ Bare, e pok akan se aman afiscema. E binip bap awerejiscema. Wunam e bitep awewerejiscema. E anakat masirin, asepnak ara.

²⁹ E ipicam e anakat piwi aporcow, aram asesakamtawcema. E anakat basesakamtaw jofay emcaenawor aporcema. Bare, e Allah Pemerintaham inim awcawor ara.” Yesus inim aeefen.

Sesawi eke baposomtew atakam

³⁰ E Yesusam, “E Allah Pemerintah ucimas awcaworaram? Dar e Allah Pemerintah atakam umuton bataw, ucom baposomtew atakam atawcom?

³¹ Bare, e Allah Pemerintah, sesawi eke inim awcawor ara. E sesawi eke, bare kanimnakap ara. E wun pok akan eke takas awut.

³² Ow e sesawi eke se aman atewapomcemes. E akan ajitcow, ar awutut aememcema. E wun sayur akan takas, bare kanim inim ara. E sesawi akanam o awut ajimirsasamisimcema. Sokam e ef jiwic aman, co aecemes.” Yesus inim aeefen.

³³ Aramat ipic e ow e baposomtew atakam jen fo awut, inim aporefen. Inimas ar wun inim baposomtew atakam arke e ow aotawefen. Er e Allah atakam e ow mamememtamas arawen.

³⁴ E atakamin atakamin aotawef ara, ar baposomtew atakam aotawefen. E nat, aram, amamkawi owam, arop aemapfes, ar e atakam takas umuton atawefen.

Yesus jon akarimef

³⁵ E jofay porow ara, Yesus atakam e amamkawi ow aotawefen. “Dey! Dar poman ajirmoc.” Inim aeefen.

³⁶ Bare aram e ow arke bakan ajirfesen. Yesusam e ci aman bap a takam aneyapefen. E owam aramat ipic batowomir anajuwfesen. Wun ciam akac anajuwfesen.

³⁷ E jicupum ajirsefes, jon awutut awumenamefen. Waam ci aman asawuminamefen. Bare, e ci bwi awutnakut aemseefen.

³⁸ E Yesus nat, e ci ep isi apwitamesefen. Aram kus waspok aosamesefen. E amamkawi owam, e Yesus ajitimfesen. “Guru! Or da bwi damir akatnew?” Inim aefesen.

³⁹ Barewen. Aramat ipic asitefen. Aram jirmec e jon ajirimefen. “Bakariey.” Inim aeefen. Aram jirmec e bwi ajirimefen. “Jokona.” Inim aeefen. Bare, e jonam akariefen. E bwiam orom cowok aesemefen.

⁴⁰ Aramat ipic masirin, atakam e ow aotawefen. “Car jak fak opok ucimaram? Car do basicim opok ucimaram?” Inim aeefen.

⁴¹ E ow masirin, omar awutnakut aemfesen. Aram atakam aramaman aamtawfesen. “A ca ipicam? E foam, e bwiam, aratakam ji aemes.” Inim aefesen.