MARKUS 2 - AY ATAYI

Yesus japow ipic ajaworomtewef

¹ Asep jofay ara, Yesus kota Kapernaum aofasiefen. Ow arkeam, “Yesus cem awap,” inim atakam jen ajifesen.

² Ow arkenakutam ajarewsiemfesen. Inimas e cem aman, asan opok cowok arawen. E cesen e jimasappu, aram asan opok cowok arawen. Aramat ipic nat, e cem aman, Allah atakam acacapiomefen.

³ Ow empat ajiwaram, japow ipic, erasan atowotnawfesen.

⁴ E nat, erasan ow arkenakut aememfesen. Inimas ar e japow ipic Yesuspu bwemtowomiw asan opoken. Aram inimas aporfes, wunam e cem op aaptometfesen. Aram e Yesus kus sotop aemamesef onew jof afimapomfesen. Ar masirin, e japow ipic tepen epcom, e cenes atewnemfesen.

⁵ Yesusam e ow a basicimnak aporefen. Ar masirin, atakam e japow ipic aotawefen. “Ata. Dor e odosa akokoromosomtamamin.” Inim aeefen.

⁶ Wun Allah Jirmec mamememtam owam erasan aemapfesen. Aram bi binip aceceremtotorfesen.

⁷ “Awamec ipic e atawmar atakam ucimaram? Ar Allah awcawor arawen. Inimas ar pwicak atakam awut atawma. E dosa bakokoromosomtam ipic, bare Allah arop araman.” Inim aefesen.

⁸ Yesusam e ow e bi binip aceceremfesas asarimporefen. Ar masirin, “Car e bi binip aceceremamokomas ucimaram?

⁹ Dor e ton atakam e japow ipic botaw, ucim atakamaramnew? ‘Dor e odosa akokoromosomtamamin,’ inim atakam aranew? Wunam, ‘Basitey. E otepen batewey. Oram bajarey.’ Inim atakam aranew?

¹⁰ Bare, e Asmat Anakat Ajaworemef Ipic, awames capinmi ow dosa bakokoromosomtam fakas aomomamar araman. Dor eras car aporomtamamin.” Inim aeefen. Ar masirin, atakam e japow ipic aotawefen.

¹¹ “Basitey! E otepen batewey! Oram cema!” Inim aeefen.

¹² Bare, e japow ipic asitefen. Aram e atepen asarimtewef, wunam ajisosefen. E ow takas eras aporfesen. Aram junum awut aefesen. Aram Allah asicimfesen. “Dar inimas basam bat opokut.” Inim aefesen.

Yesus, Lewi, a mamkawi jirmec ajirimef

¹³ Barewen. Yesus e jopir aoneyefen. E ow arkeam aramat ipicpu aenawomfesen. Aramat ipic masirin, atakam e ow amememtamefen.

¹⁴ Aram ajaref ara, ar jipic juwas Lewi bi aporefen. E Lewi, Alfeus atiw arawen. E Lewi e pemerintah uang batawanimtam cem aman aemapefen. Yesusam atakam e aramat ipic aotawefen. “Mamkawican.” Inim aeefen. Bare, Lewi asitef, wunam ar Yesus ajamkawiefen.

¹⁵ Yesusam e Lewi cem amos aemenefen. Pemerintah uang batawanimtam ow arkeam, dosa ow arkeam, aenawfesen. Ar e Yesusam, e amamkawi owam, amos akac aemenfesen. Bare, e pemerintah uang batawanimtam ow arkeam, dosa ow arkeam, e Yesus ajamkawifesen.

¹⁶ Wun Allah Jirmec mamememtam ow, Yesus e dosa owam, e pemerintah uang batawanimtam owam, amos akac aemenfes aporfesen. Ar masirin, jonow e Yesus mamkawi ow atowporfesen. “E Yesus e pemerintah uang batawanimtam owam, e dosa owam, amosam bwiam akac aanmes ucimaram?” Inim aefesen. (Bare, e jonow atowporfes Allah Jirmec mamememtam ow, aram Parisi ow arawen.)

¹⁷ Yesusam e jonow atowporfesas jen ajiefen. Ar masirin, “Dam akat ow dokter janim manim opok aemcemes. E nat, dam pwicak ow dokter janim aanimcemes. Dor tarowat ow bayte bapenaw opok. Do nat, fasi ow bayte aapenawof.” Inim aeefen.

Amos pok bamase

¹⁸ Barewen. Jofay ara, e Yohanes mamkawi owam, e Parisi mamkawi owam, amos pok amasefesen. Wun owam Yesus ameromfes, wunam jonow atowporfesen. “E Yohanes mamkawi owam, e Parisi mamkawi owam, amos pok amasemes. E omamkawi ow nat, amos pok aanmes. E ucim inimaram?” Inim aefesen.

¹⁹ E Yesusam atakam aotawefen. “E ay petew ipic, e ajowow cowkon aemapmesnew, e ajowow amos pok bamase open? Bare, e ay petew ipic e ajowow cowkon aemapmesnew, e owam amos pok aanmes.

²⁰ Asep jofay nat, ow e ay petew ipic e ow wasec aemtewcemes. E jofay ara, e ajowow amos pok amasecemes.”

²¹ “Ow, ay picin, tarey baju ton bakakamimapomporji opok. Ar ay picin, tarey baju ton akakamimapomces, wunam e baju bwi acicikimces, bare e ay picin, e tarey baju akekemtawcema. E kay masirin, jirow aojirowcema.

²² Owam, ay anggur bwi, tarey picin bwi ese bowapomporji opok. Ow ay anggur bwi, tarey picin bwi ese aowapomces, e ay anggur bwi e picin ateremomiscema. E bwiam aokoyameskurumcema. E nat, ow, ay anggur bwi, ay picin bwi ese aowapomcemes.” Yesus inim aeefen.

Yesusam, Parisi owam, Ses Ban Jo, atakam aamtawfes

²³ Barewen. Ses Ban Jo ara, Yesusam, amamkawi owam, gandum kebun ajarfesen. E amamkawi ow ajarfes ara, aram e pok akan eke ametemkokomtawfesen.

²⁴ E Parisi ow masirin, atakam Yesus aotawfesen. “Jakaperey. E ow aemamesas, e Allah Jirmec aopowmes. Ar ucim inimaram?” Inim aefesen.

²⁵ E Yesus masirin, “Car e Daud aemefas, baca bwem opoknew? Aramat ipicam, amamkawi owam, amos pok opok cowok aememfesen. Aram amosto awut arawen.

²⁶ Inimas ara, e Daud, Allah cem afiwefen. Afiwef masirin, aram e Allah bipu atatitamfes amos aemenefen. Wunam ar e wun amos, e amamkawi ow, sey aseyetamefen. E nat, mami ow e amos memen, karow arawen. E Allah atakam mamtaw tugas ow cowok, e amos a memen arawen. Bare e jofayam, Abiyatar, Allah atakam mamtaw tugas ipic awut, tugas aemawirien.”

²⁷ “Allah, asmat ow, Ses Ban Jo bi binip bacomomawar jirmec ajirimef ara, er e asmat ow asan akat bomas ara. E nat, ar e asmat ow e Ses Ban Jo jirmec desen ji bwe pwicaken.

²⁸ Inimas ara, e Asmat Anakat Ajaworemef Ipic, e Ses Ban Jo aramat ipic aememama.” Inim aeefen.