MARKUS 13 - AY ATAYI

Yesus, ow e Allah cem ajumtiwcesas, atakam atawef

¹ Barewen. Yesus e Allah cem afisefen. E wun mamkawi ipicam atakam aramat ipic aotawefen. “Guru. A cem ek awutnakut araperey! A cem mamincopam akatnakut araperey!” Inim aeefen.

² E Yesus masirin, “Car a cem awutnakut mamincop apormokomnew? Bare, asep jofay a cem ek amanapor tonapor memames opok cowok aemcemes. Jewew ow nat, e takas ajumnemkurumcemes.” Inim aeefen.

Ow ajurusumcesas

³ Barewen. Yesus e sikon juwas Saitun op aemapefen. E Allah cem e poman sikon aemamesefen. Inimas Yesus e cem mimin ajiopefen. Er masirin, Petrusam, Yakobusam, Yohanesam, Andreasam, jonow Yesus arop atowporfesen.

⁴ “E atakam ataweremas, ucim jofay emcow? E aemcowas jofay sotop inim asisienawcow, Allah ucim junum bweas aporomtamcow? Bare, eras atakam da otawcarowey.” Inim aefesen.

⁵ E Yesus masirin, “Bare, car pimicima. Ow tot ca botasin.

⁶ Ow arke aenawcemes, wunam, ‘E Allah Aeremtewef Ipic, bare dor ara,’ inim aetotorcemes. Aram tot ow arke aotcemes.

⁷ Car jewew bamo aporcokom, wunam wun capinmi jewew bamo atakam jen ajicokom, caram omar arapok. Bare, ow jewew aamocemes araman. E nat, e asepnak jofay sotopnak opok aemamescema.

⁸ Wun samat arke jewew e wun samat arke aamoa aecemes. Wun pemerintah arke jewew e wun pemerintah arke aamoa aecemes.

⁹ Ca nat, pimicima. Ow car ban akimomceman, wunam ar e atakam mamsakam ow aotasimemtamceman. Aram e sembahyang cem aman omop car aafceman. Ar car do mamkawi ow aporceman. Inimas car kepala ow bipuam, raja ow bipuam aememcomokom. E nat, car e Atakam Akat e owam aotawcomokom.

¹⁰ Bare, ow e Atakam Akat e samatin samatin takas bap acacapiomcemes, wunam e asepnak jofay aenawcema.

¹¹ Ow car ban akimomcan, wunam ar car e salah atakam basakamtiw ow aotasimemtamcan, bare ca atakam e salah atakam basakamtiw ow aotawcokomas, bi binip jirow arapok. Atakam e ow botaw ememcokom, e Roh Kudus e atakam bi binip car atetamceman. E atakam aotawcokomas carop atakam opok. Er e Roh Kudus car atetamcan atakam ara.

¹² Wun owam arepcewesnew, arewcewesnew, kawey ow aotasimemtamcemes. E kawey ow masirin, e ow acatiwcemes. Wun ducur owam e ajiwi kawey ow aotasimemtamcemes. E kawey ow masirin, e jiwiam acatiwcemes. E wun atiperesam arisepes afakayomitcemes, wunam acatiwcemes.

¹³ Ow car do mamkawi ow aporcan, ar takas bifan car afayomceman. E nat, ow e asepnak jofay ajiwar, do mamkawi bakorompim opok aemces, aram ajoremcemes.”

E Pwicak Awutnakutas

¹⁴ “Bare, ‘Pwicak Awutnakutas’ aememcema. Eras, ow daniwis aemtiwcema. (A atakam baca bwem ow, a atakam jen bajikurumces.) E ‘Pwicak Awutnakutas’ e Allah acuw aatef asan aememcema. Car eras aporcokom, e Yudea capinmi aememames ow, e sikon asanpu omar bajisosces.

¹⁵ E aporsipor cemko aemapces ow, e acem aman pok basarimjiwtawpor arapok.

¹⁶ E kebun kerja aemces ow, e acem e abaju bofasitew arapok.

¹⁷ Bare, e jofay e jak epcom cepesam, e jiwi aw anamces cepesam, asan pwicaknakut aememcemes.

¹⁸ Caram janim Allah mamanimey. ‘E bajurusas jofay, e jufu bwi enemtepcow jofay arapok.’ Inim janim mamanimey.

¹⁹ E jofay aenawcow, ow bajurusem awutnakut aemcemes. Allah a capinmi akenemtiwef jofayam, wow ajiwaram, ow inim awutnakut bajurusem opok aemames. Asep jofayam ar inim awutnakut bojurusem opok aemcemes.

²⁰ E nat, Tuhan atakam asakamtiwef. ‘E ow ajurusemcesas, jirownak arapok.’ Inim aeef. Ar inim atakam basakamtiw opok ayaw, ow takas damir aafcemes. E nat, ar e aereremtawef ow, sawes akat aoworporef. Inimas ar e ow ajurusemcesas, jirow arapok, inim atakam asakamtiwef.”

²¹ “Ow atakam car aotawcan, ‘Jakaperey. E Allah Aeremtewef Ipic arasan ara,’ wunam ‘Jakaperey. E Allah Aeremtewef Ipic erasan ara,’ inim aecan, caram aratakam jen baji arapok.

²² Bare, wun ow, ‘Dor e Allah Aeremtewef Ipic awamcey ara,’ inim suw atakam atawtotorcemes. Suw Allah atakam botaw owam aememcemes. E ow tot e Allah aereremtawef ow aotporcemes. Inimas ar junum bweas aemcemes.

²³ Bare, caram pimicima. Dor eras takas atakam bap a takam car aotawmin.”

E Asmat Anakat Ajaworemef Ipic aenawcowas atakam

²⁴ “E jofay ara, ow ajurusemcemes. Ajurusemces masirin, e jopok jiwic acamtiwcema. E piram baneyseremtiw opok aemcema.

²⁵ E bayitam, bayaram, akokoysayneycema. Allaham e onam op sereas akokoromcema.

²⁶ Er masirin, ow e Asmat Anakat Ajaworemef Ipic e onam op jak aman aneycow aporcemes. Aramat ipic e fakas epcom aneycema. Aram akatnakutas epcom aneycema.

²⁷ Aramat ipic e amalaikat e capinmi asanin asanin takas atewosomcema. E malaikat masirin, e Allah asanin asanin aereremtawef ow, aaramsimapomcemes.”

Os juwas “Arā” atakam

²⁸ “Bare, car e os juwas ‘arā’ aemamaras bi binip mamceceremey. E os e jinfas acakuemcow aporcokom. ‘E jusuw bwi sotop ara,’ inim aecomokom.

²⁹ Inimasam ara, car e atakam atawminas aenawcow aporcokom, car e Asmat Anakat Ajaworemef Ipic aenawcow jofay sotopnakap aporcomokom.

³⁰ Atakamnak ara, a capinmi awamces ow damir baf opok ara, e atakam atawminas bap a takam aemkurumcema.

³¹ Bare, e onam opam, a capinmiam, aanioscema. Doratakam nat, inim aatamemamesawarcema.”

Ow e asepnak jofay aenawcowas amsom opok

³² “Asmat ow nat, e aramat ipic aoenawcow jofayam, jamam, amsom opok. E onam op malaikatam, e Allah atiwam, amsom opok. E doricipic cowok amsom ara.

³³ Bare, car pimicima. Manmok faka. Car e aemcowas jofay camsom opok.

³⁴ E atakam atawminas, jipic cowok wun capinmi ajisoscow inim cimin ara. Ar acem bakan ajioscema. Aram e akerja bwemtam ow, e apok takas manmok batiw jirmec ajirimcema. Aram e ow aporsipor kerja bwem jirmec ajirimcema. Aram atakam e cem manmok batiw ipic aotawcema. ‘E cem manmok faka.’ Inim aecema.

³⁵ Bare, caram ara. Caram manmok faka. Car e cem aramat ipic aofasienawcow jofay camsom opok. Ar porow aranew. Iramnak aranew. E ayam atakam akoreycow aranew. Tam aranew. Bare, caram camsom opok.

³⁶ Aramat ipic biin aemsucema. Inimas caram manmok faka. Aram car isi inim cowocamescokom, inim baporasin.

³⁷ E atakam car aotawminas, doram e ow takas aotawcimin. ‘Ca manmok faka,’ inim aecimin.” Yesus inim aeefen.