MARKUS 11 - AY ATAYI

Yesus Yerusalem ajisosef

¹ Barewen. Aramat ow Yerusalem sotop asisiatfes ara, ar kota Betfageam, kota Betaniaam, ajaremfesen. E kota jamnuk e sikon asan juwas Saitun aemamesefen. Er Yerusalem sotop arawen. Yesusam jirmec e amamkawi ipic jamnuk ajirimefen.

² “Car e bap ewames cemsanpu bajarey. E cemsan ajaremcokom, ay keledai manmok apematamcomokom. E keledai cum pok epcom ara. Wow ajiwaram, ow e keledai bak ton batometapporji opok. Caram e cum pok mamsurumey, wunam e keledai arasan mamtowotnawey.

³ Owam jonow car atowporcannew, ‘Car e keledai cum pok ucimas asurumamokom?’ inim aecannew, car masirin, ‘Tuhan e keledai bak ton bajaren. Aramat ipicam e keledai sarim aofasimtamcema.’ Inim mameey.” Yesus inim aeefen.

⁴ Bare, e ipic jamnuk ajisosfesen. Aram e ay keledai apowtewfesen. E keledai e bokotpu aememefen. Ar cem jimasappu cum pok epcom, aememefen. E ipic jamnuk e cum pok basurum aememfes ara,

⁵ wun erasan aememfes ow jonow atowporfesen. “Car e keledai cum pok ucimas asurumamokom?” Inim aefesen.

⁶ E ipic jamnuk masirin, e Yesus atawef atakam jipu cowok e ow aotawfesen. E ow masirin, “Bare. Poknak opok. Inim atewey.” Inim aefesen.

⁷ Aram e ay keledai Yesuspu atowocenfesen. Wunam ar e abaju mamincop e keledai bak ton atometmuwtiwfesen. Yesus masirin, e keledai bak ton atometapefen.

⁸ Ow arkeam e abaju e bokotpu amuwtiwtotorfesen. Wun ow masirin, os ef asesakamtawa aefes, wunam e pok e bokotpu amuwtiwa aefesen.

⁹ Yesusam e ay keledai bak ton ajarefen. Wun owam e bap ajarfesen. Wun ow masirin, e fa asoromfesen. E ow takasam si asifesen. “Dormomo! Tuhan asan akat a atewenamamar ipic baomcow!

¹⁰ E darafas Daud, bare pemerintah akat aemawirien. Awap ipic inim awcawor pemerintah aoemcema. Bare, Allah asan akat awap ipic baomcow. Allah dormomo!” Inim aefesen.

¹¹ Bare, Yesus e Yerusalem ajaremefen. Aram e Allah cem ajiwemefen. Ajiwemef masirin, ar e pok takas manmok apepemefen. Aram jo atief aporefen. Inimas aram, e amamkawi ow dua belas ajiwaram, e Betani ajisosfesen.

E eke opok os atakam

¹² Ajofay ara masirin, ar e Betani ewjisosfesen. Yesusam amosto aememefen.

¹³ Aramat ipic, os juwas “arā” damasan opok inim aporefen. Ar e os, e epcom aporefen. Aramat ipic masirin, e os, eke epen bapor, aapenefen. Aram e os, eke opok cowok aporefen. Ar os e cowokin aporefen. Er arā os eke bapetep bwi opok arawen.

¹⁴ Yesusam atakam e arā os aotawefen. “Ow e oreke boemen opok cowoka.” Inim aeefen. E amamkawi owam inim atakam jen ajifesen.

Yesus Allah cem afiwef

¹⁵ Barewen. Ar Yerusalem ajaremfesen. Yesusam e Allah cem afiwemefen. Afiwemef masirin, ar e cem aman pok juw buwumamtaw ow aotewerisimefen. Aram e uang juw buwumcicirimtaw ow ameja takas bipar ajimirsasamefen. Aram pari juw buwumamtaw ow akursi takas ajimirsasamefen.

¹⁶ Aram ow, pok e Allah cem batowomiwam, batowomisam, acuw aatefen.

¹⁷ Aram atakam e erasan aememfes ow amememtamefen. “E Alkitab atakam, ‘E docem, e samatin samatin janim do manim cem aemamescema.’ Inim aema. Ca nat, a cem osom ow barewsiap asan aemapomfokom.” Yesus inim aeefen.

¹⁸ E ow arke e Yesus amememtamef atakam jen ajifesen. Inimas ar junum awut aefesen. E Allah atakam mamtaw tugas ow awutam, e Allah Jirmec mamememtam owam, e ow junum awut aefesas aporfesen. Inimas aram omar aefesen. Aram Yesus bacatiw at aetiwfesen.

¹⁹ Barewen. Joam atiefen. Inimas Yesusam, amamkawi owam, e kota afisfesen.

Yesus e eke opok os atakam atawef

²⁰ Ajofay tam ara masirin, aram ajarfesen. Ar e os juwas “arā” aoporfesen. Bare, e os sanakut aporfesen.

²¹ Petrusam e Yesus bap aemefas bi binip acomomefen. Aram atakam Yesus aotawefen. “Guru. Or e arā os bajursum jirmec ajirimfem. Bare, e os sanakut ara.” Inim aeefen.

²² Yesusam atakam e ow aotawefen. “Bare, Allah basicim faka.

²³ Atakamnak ara, ow atakam e sikon aotawces, ‘Bare, oram baysosey. E jicupum bwi orma jupuey,’ inim aeces, bare e sikon e aratakam jipu cowok aemcema— e ow bi binip arke opok aememces ara. Aram, ‘E sikon e daratakam jipu cowok aemcema,’ inim atakam asicimtotorces, bare e sikon e jicupum bwi ajupucema.

²⁴ Car janim Allah aanimcokom, caram, ‘Bare, Allah e janim aanimamomas aemtamcemarow,’ inim atakam mamsicimkurumey. Allah masirin, e janim aanimcokomas car aemtamceman.

²⁵ Car janim Allah aanimcokom, e nat car wun ow bifan afayomcokom, bare car e ow e pwicakas aemfanas, binip mamtakamjiwosomey. Allah masirin, e aemfokom dosa, binip ajiwosomcema.” [

²⁶ Car, ow e pwicakas aemfanas, binip biwosom opok aemcokom, Allah e cadosa, binip biwosom opok aemcema.]

E aemamemas, jirmec ca jirimfan?

²⁷ Barewen. Ar Yerusalem aofasifesen. Yesusam e Allah cem aman acowojarefen. Acowojaref ara, e Allah atakam mamtaw tugas ow awutam, e Allah Jirmec mamememtam owam, e Yahudi ownucur owam, aramat ipic ameromfesen.

²⁸ Aram jonow Yesus atowporfesen. “E aemamemas nat, jirmec ca jirimfan?” Inim aefesen.

²⁹ E Yesus masirin, “Doram jonow cowoknakap car botowpormin. Caram atep bajitcan. Dor masirin, e aemaminas jirmec ajirimfan ipic, atakam car aotawcimin.

³⁰ E Yohanes bwi abwimefas, jirmec ca jirimef? Allah aranew? Asmat ow aranew? Bare atakam dor aotawcan.” Inim aeefen.

³¹ Bare, e ow eras aramaman atakam aamtawfesen. “Dar atakam aotawcom, ‘Allah eras jirmec ajirimef,’ inim aecom, aramat ipic masirin, ‘Ca nat, e Yohanes basicim opok ucimaram?’ inim aecema.

³² Da nat, ‘Asmat ow eras jirmec ajirimef.’ Inim aecom, a ow arke atakam dar aotawcemarowos.” Inim aefesen. Bare, ow arke abi binip ara, “E Yohanes, Allah atakam botaw ipic ara,” inim bi binip aceceremfes. Inimas ar e ow arke omar aefesen.

³³ Inimas aram atakam Yesus aotawfesen. “E Yohanes bwi abwimefas jirmec ajirimef camnew? Daram namsom opok.” Inim aefesen. E Yesus masirin, “Bare, doram e aemaminas jirmec ajirimfan ipic, atakam ca bwemotaw asan opok.” Inim aeefen.