EFESUS 2 - AY ATAYI

Yesus, ow mami ajortewma

¹ Bap ara, car Allah atakam aopowawirukum. Caram dosa aemawirukum. Inimas car damir ow inim cimin aemapawirukum.

² Car awames capinmi pwicakas ajamkawiawirukum. Car dat akepala ipic aratakam ji aeawirukum. E ipic, bare e Allah atakam bopow ow aomomamar ipic ara.

³ Bap ara, daram takas e Allah atakam bopow ow akac aemapawirum. Daram e dajak basinom pwicakas jipu aemawirum. Daram e dabi binip jipuas aemawirum. Allaham, jokmenas, dar e wun ow awcawor bwem, aememef.

⁴ E nat, Allah ow serow awutut ajiomama. Aram damos awutut dar ajiomamarow.

⁵ Daram aratakam aopowawirum. Inimas dar damir ow inim cimin aemapawirum. E nat, ar dar Kristus cowkon aojaworomsumutumforow inim cimin ara. Bare, Allah asan akat mami aomforow. Inimas ar dar ajortewforow.

⁶ Dar Kristus Yesus ajamkawifom. Inimas Allah dar Kristus cowkon aojaworomsumutumforow inim cimin ara. Aram dar Kristus cowkon e onam op asan atewapomtamforow inim cimin ara.

⁷ Ar damos ajiomforow. Ar masirin, asan akatnakut mami aomforow. Ar inimas e asep jofayin jofayin takas dar batamporomtamkurum aememef. Inimas ar eras takas aomforow. Bare, e damos ajiomforowas e Kristus Yesus aomforowas ara.

⁸ Car aramat ipic asicimfokom. Aramat ipic masirin, car ajortewfan. Er e Allah asan akat car mami aomfanas ara. E ajoremfokomas ara, carma aemfokomas opok. Er Allah mami atetamfanas ara.

⁹ Er e aemfokomas opok. Inimas car carma bwemtawsicim asan opok.

¹⁰ Allah e wow aememamomas aemapomforow. Aram dar Kristus Yesus cowkon aemapomforow. Inimas aram dar akatas bwemawar aemapomforow. Bare, aram dar e akatas bwemawar bap at aetiwef.

Kristus, Yahudi samat owam, Yahudi opok samat owam, samat cowok aemapomef

¹¹ Caram binip manim arapok. Bap ara, car Yahudi opok samat, inim ajisamesfokom. E Yahudi owam, “Car sunat opok ow ara. Da nat, sunat epcom ow ara,” inim aefes. (E sunat nat, ow e adam picin basakamosomas ara.)

¹² E jofayam car Kristus opok aemapawirukum. Caram Israel samat opok aemapawirukum. E Allah, e arow atayi aeefasam, bare caras opok. Car jirey bweas opokam, Allah opokam, a capinmi desen aemapawirukum.

¹³ Bap ara, car Allah dawon opok aemapawirukum. E nat, Kristus Yesus e ares airimnemef. Caram e Kristus ajamkawifokom. Inimas wow car Allah sotopnakap aemapmokom.

¹⁴ Bare, Kristus e Yahudi samat owam, e Yahudi opok samat owam, samat cowkon aemapomef. Inimas aramat ipic pay aomforow. Bap ara, e Yahudi samat owam, e Yahudi opok samat owam, bifan aamfayomawiris. E bifanas, ciram cimin, e ow wowoc ateremef. E nat, Kristus damir aafef ara, ar e ciram ajumnemef inim cimin ara.

¹⁵ Aram e samat jamnuk, samat cowok bemapom, akat aemef. Aram e samat, a mamkawi, akat aemef. Inimas ar e Yahudi Jirmec ajiwosomef. (E Yahudi Jirmec, bare jirmec arke ara.) Eras aemef ara, ar e samat jamnuk pay aomef.

¹⁶ Kristus e salib op damir aafef ara, ar e samat jamnuk e bifa aamfayomawirisas emejiwosomef. Aram e samat jamnuk, samat cowok aemapomef. Aram e ow Allahpu aofasiomef.

¹⁷ Aram aenawef ara, ar Atakam Akat, ow takas acacapiomef. E Atakam Akat, bare e pay bwe atakam ara. Ar e atakam e car Yahudi opok samat ow acacapiomef. Car e Allah dawon opok aemapawirukum ow ara. Aram e atakam e Yahudi ow acacapiomef. E Yahudi samat ow, e Allah sotopnakap aemapawiris ow ara.

¹⁸ Wow ara, e Yahudi samat owam, e Yahudi opok samat owam, Allah bipu aememamom. Eras e Kristus aemefas ara. (Bare, dar takas janim Allah aanimamom.) E Roh Kudus cowokam dar eras bwem tolong aemamarow.

¹⁹ Inimas ara, car wow jewey ow boemem opok. Caram kawey ow boemem opok. Ca nat, e tarowat ow asamat cowok ow ara. Caram Allah atiperes ara.

²⁰ Bare, car cem os inim cimin ara. E Allah aratakam botaw atewosomef owam, e Allah atakam botaw owam, e cem fasis inim cimin ara. E tiwi os masirin, Kristus Yesus aramat ipic ara.

²¹ Allaham e Kristus ajamkawimes ow takas, cem os inim cimin atawkenemtiwma. Ar e ow e acem akatipic akenemapomama. E cem, e Tuhan ajamkawimes ow ara.

²² Caram aramat ipic ajamkawimokom. Allah, caram, e wun owam, e aramat ipic aemapmar cem, aeapomama. E cem e Roh Kudus aemapmar cem ara.