YESAYA 1 - KITTA KAREBA MADECENG

¹ Iyaé kitta'é mallise'i paseng passalenna Yéhuda sibawa Yérusalém iya nappaitangngé Allataala lao ri Yésaya, ana' Amos, wettunna Uzia, Yotam, Ahas sibawa Hizkia mapparénta ri Yéhuda.

Namparenna Allataala umma'-Na

² Engkalingai éh langi, pénessaiwi éh lino! Makkedai Puwangnge, “Ana'-ana' iya puraé Upiyara maronta'i lao ri Iyya.

³ Sapingngé naisseng puwanna, kaleddé'é naisseng onrong inanré iya napassadiyaé puwanna. Iyakiya umma'-Ku Israélié dé'; dé' mennang napahangngi.”

⁴ Macilakano iko bangsa iya madosaé, sining tau iya dé'é namakessing sipa'na sibawa majaé! Ripapusano ri dosa-dosamu. Purani musampéyang Puwangnge sibawa mabbokoriwi Allataala Pommapaccingngé iya harusu'é musompa.

⁵ Magi mumatteru bawang mabbanta? Maélokoga rihukkung lebbi tane'pa? Pennoni ulummu sibawa sining lettang mannanaé, ati sibawa pikkirammu mapeddini.

⁶ Polé ri ulué lettu ri palakajé dé'gaga madising ri watakkalému. Pennoko boro-boro, mabbalippeng-balippeng sibawa sining malo. Iyaro sining lomu dé'pa naripépaccingi iyaré'ga ribebbe, dé'to nariurai sibawa minnya.

⁷ Purani ripabbinasa wanuwammu; kota-kotamu ritunui gangka cappu. Ri yolona matammu nalai tau laingngé tanamu sibawa mancuru'i sini-sininnaé.

⁸ Banna Yérusalém monro, iyakiya selaku kota takkeppung sibawa dé' pakkullénna, pada-padai kalampangngé ri palla anggoro'é iyaré'ga bola-bolaé ri palla mentimungngé.

⁹ Akkalarapanna Puwang Iya Pommakuwasaé dé' napaleppe'i siyagangngaré tau untu' idi, binasa sisenni, pada-pada Sodom sibawa Gomora.

¹⁰ Yérusalém, sining pamimpingngé sibawa bangsamu mancajini pada-pada tau Sodongngé sibawa Gomoraé. Engkalingai aga napowada Puwangnge lao ri iko; puriyatini aga nappagguruwang Allataalata.

¹¹ Makkedai Puwangnge, “Muwasengngi Upojiwi sininna akkarobangeng iya matteru-terué muwakkasuwiyangeng lao ri Iyya? Nagélléna sibawa sining bimbala akkarobangeng ritunummu sibawa lunra ana' sapimmu. Dara saping laié, bimbala'é sibawa bémbé'é dé' Upojiwi.

¹² Niga suroko tiwii sininna pakkasuwiyangngéro wettummu lao massompa ri Iyya? Niga suroko mallampareng ri Bola Mapaccik-Ku?

^13-14 Paracuma bawang tiwii iyaro pakkasuwiyammu. Najari péneddikku baunna. Ucéccé sibawa dé' utahang mitako ramé-raméiwi Uleng Barué, esso-esso Saba'é sibawa esso-esso marajaé enrengngé addeppu-deppungeng agamamu. Iya manennaro mucarépaiwi sibawa dosa-dosamu sibawa sinrupai tiwié ri alé-Ku; poso-Ka tanggungngi.

¹⁵ Rékko muwakkai limammu untu' massempajang, dé' Umaélo jampangiwi. Dé' Upaduliwi siyaga égana sempajammu, dé' Umaélo méngkalingai, saba' nasibawang limammuro purano mabbuno maéga.

¹⁶ Bissaini alému gangka mapaccing. Pappésauwi sininna ja iya mupogau'éro. Ya, aja'na mupogau'i majaé,

¹⁷ agguruno pogau'i makessingngé. Patettongngi adélékengngé sibawa paccappui patenre'é; wéréngngi ana' béué ha'na mennang sibawa éwaiwi parakarana jandaé.”

¹⁸ Makkedai Puwangnge, “Laono mai tapuraiwi iyaé parakaraé. Namuni malango-langoko nasaba dosa-dosamu, Ubissaiko matu mancaji maputé mapaccing pada-pada ape'é. Namuni maégai dosa-dosamu sibawa matane, Uwaddampengekko matu sibawa sukku.

¹⁹ Rékko mapatoko lao ri Iyya, mupéneddingiwi matu sininna iya makessingngé iya napowassélé'é wanuwammu.

²⁰ Iyakiya rékko muéwa-Ka, matéko matu ri laleng musué. Iyya, Puwang, pura mabbicara.”

Kota madorakaé

²¹ Kota iya matinulué riyolo, makkekkuwangngé pada-padani séddié cakkuribang! Riyolo sininna pabbanuwana adélé sibawa malempu, iyakiya makkekkuwangngé naonroiwi pabbuno-pabbunoé.

²² Yérusalém, riyolo pada-padako péra'é, iyakiya makkekkuwangngé dé'na angke'na. Riyolo pada-padako anggoro iya malunra'é, iyakiya makkekkuwangngé banna uwai simata.

²³ Maronta'i sining pamimpimmu sibawa ripakéi ri pangaé; napoji mennang tarima hadiya sibawa dowi pasoso. Dé' namaélo mennang méwaiwi ana' béué ri pengadilangngé; dé' namaélo méngkalingai papparape'na janda-jandaé.

²⁴ Rimakkuwannanaro Puwang Iya Pommakuwasaé, Allataalana Israélié makkedai: “Eh, sining balik-Ku, maélo-Ka makkabale lao ri iko, angkanna dé'na musussai-Ka paimeng.

²⁵ Maélo-Ka tinda lao ri iko. Pada-pada tauwé patuléngngi bessié, maélo-Ka patulékko; sininna iya macarépaé Upaddésu'i matu polé ri alému.

²⁶ Uwéréssiko matu haking-haking sibawa pappangaja pada-pada riyolo. Na Yérusalém riyasengngi matu kota iya adélé'é sibawa matinulué.”

²⁷ Adélé'i Puwangnge, na-Napassalama'i matu Yérusalém sibawa sining taunna iya massessekalé.

²⁸ Iyakiya sining tau madosa iya maronta'é lao ri Aléna ripaccappui matu, sibawa sininna iya salaiyéngngi Aléna riancuru'i matu.

²⁹ Masirii matu mennang nasaba massompai ajukajung sibawa pallaingngi sining palla untu' déwata-déwataé.

³⁰ Mancajiwi matu pada-pada aju battowa iya makelle'é daunna, sibawa pada-pada palla iya dé'é naripalleki.

³¹ Pada-padai daramé nanré api polé ri tabbessi'na bunga apié, makkuwatoniro sining tau makuwasaé ripabbinasa matu risining pangkaukeng majana mennang, na dé'gaga mulléi pappésauwi ancurukengngéro.