TITUS 3 - KITTA KAREBA MADECENG

Kédo-kédona tau Kristéngngé

¹ Paréngngerangiwi anggota-anggota jema'mu kuwammengngi natunru' mennang lao risining pamimpingngé sibawa tomakuwasana wanuwaé, enrengngé matinulu sibawa sadiya pogau'i tungke' pangkaukeng iya makessingngé.

² Powadangngi mennang kuwammengngi aja' nappétenna iyaré'ga mappangéwang sibawa muwi niga, sangadinna kuwammengngi nasipammasé-masé sibawa mabessa. Sitinajai mennang tuli malemma kininnawa lao ri sininna tauwé.

³ Saba' riyolo idi paimeng madonggoto, pusa sibawa temmatinulu. Ripowataki rimaddupa-rupang napessué sibawa cinna'é, tuwoki sibawa niya'-niya' majaé sibawa mangémpuru, enrengngé sisullé sibenci.

⁴ Iyakiya Allataala Pappassalama'ta nappaitangngi pammasé-Na sibawa akessingeng atin-Na lao ri idi.

⁵ Napassalama'ki, tenniya nasaba puraki pogau'i séuwa iya makessingngé, sangadinna nasaba aléna muto mamaséiki. Napassalama'ki naolai Rohna Allataala, iya mpéréngngékki ajajiyang mabaru sibawa atuwong mabaru ri laleng cara nabissaitta.

⁶ Natiri'i Allataala Roh-Na lao ri idi naolai Yésus Kristus, Arung Pappassalama'ta,

⁷ kuwammengngi napolé ri pammaséna Yésus, simadécéngekki paimeng sibawa Allataala natalolongeng atuwong tongengngé sibawa mannennungengngé iya riyamménasaiyé.

⁸ Tongeng senna' iyaé adaé. Uwéllauwi muteddeki gau'-gau'éwé, kuwammengngi nasining tau iya mateppe'é ri Allataala tonget-tongengngi makkuraga untu' pogau'i jama-jamang iya makessingngé sibawa makkégunaé untu' sininna tauwé.

⁹ Abélaiwi sining addebbakeng iya dé'é nakkéguna, curita-curita appo-appongennaé, appangéwangengngé sibawa allagangngé passalenna hukkunna agamaé. Iya manennaro dé' gaga gunana sibawa dé' gaga sarona.

¹⁰ Tau iya nassabariyé assisalang ri laleng jema'é, sitinajai muwampareng siseng iyaré'ga wékkaduwa; purairo aja'na musiwollompollong sibawa aléna.

¹¹ Muwisseng makkedaé tau pada-padaéro maja sibawa dosa-dosana pabuttiwi makkedaé pasalai.

Panunju-panunju paccappureng

¹² Ukirinna muwa Artémas iyaré'ga Tikhikus lao ri iko, akkurako masitta untu' lao ri iyya ri Nikopolis, saba' manniya'ka monro kuwaro ri wettu keccé'é.

¹³ Akkuragano tonget-tongeng untu' bantui Zénas, ahli hukkungngéro, sibawa Apolos, kuwammengngi naulléi joppa sibawa dé' naakurangeng agi-agi.

¹⁴ Sining tautta harusu'i magguru pogau'i gau'-gau' iya makessingngé kuwammengngi naulléi pennoiwi apparelluwanna iya napparelluwang senna'é; aja' narapii tuwo temmakkéguna.

¹⁵ Sininna Saudara iya sibawangngékka, massellengngi ri iko. Palettukekki selletta lao ri sellao-sellaota iya siyateperengngé. Tennapodo Puwangngé barakkaki manengngi Saudara. Salama, Paulus