MATIUS 28 - KITTA KAREBA MADECENG

Tuwona paimeng Yésus

¹ Wettunna labe'na esso Saba'é, ri esso Aha'é, maélé senna'ni Maria Magdaléna sibawa Maria laingngé lao mitai iyaro tampungngé.

² Tappa mpéwang muni tanaé iya maseroé. Engka séddi malaéka'na Puwangngé nonno polé ri surugaé nanagaléttéi iyaro batu pattongkona, nanatudang ri yasé'na.

³ Tappana iyaro malaéka'é pada-padai billa'é, sibawa pakéyanna maputé senna'.

⁴ Tentara pengawal iya jagaé kuwaro makkumani tauna angkanna ténré mennang, sibawa pada-pada tau maté.

⁵ Nakkeda iyaro malaéka'é lao risining makkunraiéro, “Aja' mumétau! Uwisseng musappai Yésus iya puraé risalliro.

⁶ Dé'ni kuwaé. Moto'ni pada-pada Napowadaé riyolo. Laono mai muwitai onronna ripaléwu.

⁷ Makkekkuwangngé, apperi-perino lao namupowadangngi ana'-ana' gurun-Na, ‘Moto'ni, namakkekkuwangngé laoni lebbi riyolo naiya iko ri Galiléa. Kuwaro muwitai matu!’ Engngerangngi aga pura upowadakko.”

⁸ Mapperi-perini iyaro sining makkunraié salaiwi tampungngé. Nasibawang pappénedding métau sicampuru' marennu; lari-larini mennang untu' powadangngi iyaro gau'é lao ri ana'-ana' gurunna Yésus.

⁹ Tappa polé muni Yésus méwai sita iyaro sining makkunraié, nakkeda, “Salama'!” Napoléna mennang maddeppériwi, nainappa nakaddao ajé-Na sibawa nasompai.

¹⁰ Nakkeda Yésus lao ri mennang, “Aja' mumétau, lao mupowadangngi saudara-saudara-Ku kuwammengngi nalao ri Galiléa; kuwaro naita-Ka matu mennang.”

Laporanna tentara pengawal-é

¹¹ Ri wettu laona iyaro sining makkunraié, siyagangngaré polé ri tentara pengawal iya jagaiyéngngi iyaro tampungngé lisuni ri kotaé, sibawa laporo'i ri kapala-kapala imangngé sininna iya puraé kajajiyang.

¹² Iyaro kapala-kapala imangngé barundinni sibawa sining pamimpinna Yahudié, nainappa nawéréng maéga dowi iyaro tentara pengawal-é,

¹³ nakkeda, “Harusu'ko powadai makkedaé, poléi ana'-ana' gurunna Yésus ri wennié, nanaénnauwi ujuna ri wettu matinromu.

¹⁴ Rékko naéngkalingai gubernur-é, ripalécépi kuwammengngi dé' mulolongeng asukkarakeng.”

¹⁵ Nalani tentara pengawal-é iyaro dowié, nanapogau'i pada-pada iya ripasengengngéngngi lao ri mennang. Rimakkuwannanaro iyaro curitaé tassiya mupi ri yelle'na tau Yahudié lettu essoéwé.

Nappaitanna aléna Yésus lao ri ana'-ana' gurun-Na

¹⁶ Iyaro seppulo séddié ana' gurunna Yésus laoni ri bulu-bulué ri Galiléa situru iya napparéntangngé Yésus lao ri mennang.

¹⁷ Wettunna mennang naita Yésus kuwaro, suju'ni mennang sompai. Iyakiya engka ri yelle'na mennang bata-bata.

¹⁸ Maddeppéni Yésus ri mennang, nakkeda, “Sininna akuwasangngé ri surugaé sibawa ri linoé purani riyabbéréyang ri Iyya.

¹⁹ Rimakkuwannanaro laono ri sininna bangsaé ri sininna linoé, pancajiwi mennang ana'-ana' guruk-Ku. Cemméi mennang sibawa teppui asenna Ambo'é, sibawa Ana'é, enrengngé Rohna Allataala.

²⁰ Paggurui mennang turusiwi sininna iya puraé Uparéntakko. Na éngngerangngi tuli Usibawakko matu lettu paccappurenna linoé.”