AMSAL 1 - KITTA KAREBA MADECENG

Angke'na pangaja-pangajana Salomo

¹ Iyanaé pangaja-pangaja polé ri Salomo ana' worowanéna Daud, arunna Israélié.

² Akkattana iyanaritu untu' tulungngi tauwé pékkugi missengngi mancaji mapanré, sibawa missengngi atorenna atuwongngé enrengngé mulléi pahangngi warékkada-warékkada iya tampu'é bettuwang iya malamungngé.

³ Iyaé sining pangajaé nappagguruwangngi pékkugi tauwé naulléi tuwo sibawa mapanré, malempu, adélé sibawa tongeng.

⁴ Tau iya dé'é namappangalamang napaggurui angkanna mappunnai pikkirang iya matarengngé, sibawa tau maloloé napaggurui mancaji tau iya maccaé sibawa naulléi mappikkiri secara tau battowa.

⁵ Nasibawang iyaé sining pangajaé tattamba toni matu pangissengenna tau mapanré, sibawa tau iya engkaénna aggurunna lolongengngi matu pappimping.

⁶ Nanallalengiwi naulléi mennang wellungiwi bettuwanna iya tassubbué ri laleng pasengngé sibawa pahangngi ada-adanna tau mapanré enrengngé parakara-parakara iya napangoloé mennang.

Pangaja untu' tau maloloé

⁷ Untu' lolongengngi pangissengeng tongengngé, lebbi riyolo harusu'i tauwé mappunnai perasaang mappakalebbi sibawa métau lao ri Puwangnge. Tau madonggoé dé' naangke'i pangissengengngé sibawa dé' namaélo ripagguru.

⁸ Puriyatiwi aga iya napowadaé ambo' indo'mu lao ri iko, ana'ku,

⁹ saba' sining pappagguruwanna mennang natambaiwi akkaleng makessimmu pada-pada bélo-bélo ulué sibawa ranté pagelloriyéngngi tappamu.

¹⁰ Rékko napalécéko tau madosaé, ana'ku, aja' muwaccowériwi pappalécéna mennang.

¹¹ Ebara'na makkedai mennang, “Ayo, laono mai tasappa tau sibawa taborongngi. Untu' assennas-sennangeng, laono mai tagasai tau iya dé'é napasala.

¹² Tuwoi mennang makkekkuwangngé masennang sibawa madising, iyakiya matti mancajiwi matu pada-pada tau iya sitengnga maté.

¹³ Taalai barab-baranna mennang iya mangke'é, kuwammengngi napenno bolata sibawa barang rampasa.

¹⁴ Accowéno mai! Ritawa ratapi wassélé énnaunna!”

¹⁵ Aja' muwaccowé sibawa sining tau makkuwaéro, ana'ku! Abélaiwi mennang.

¹⁶ Dé' naulléi mennang monro mammekko rékko dé'pa napogau'i majaé. Macinnai mennang mapperi-peri pauno.

¹⁷ Sedangkang muwi manu'-manu'é dé' namaélo muttama ri laleng jala iya ripallebba'é ri yolona matanna,

¹⁸ iyakiya iyaro sining tau majaé mala pasangngi siyo untu' aléna muto – siyo iya cilakaéngngi matu mennang.

¹⁹ Mémeng, tau iya sappaé dallé sibawa makkégunang ateddekeng nawajai matu sibawa nyawana muto.

Saddanna pangissengengngé

²⁰ Engkalingai! Mangobbii pangissengengngé risining lalengngé sibawa gora-gora risining lapangangngé!

²¹ Mangobbii ri pintu-pintu gerbangngé sibawa ri onrong-ngonrong iya marowaé:

²² “Eh sining tau donggoé! Gangka kégiko maélo tette makkuwaro? Uppanna narapi wettunna mappésauko pakariyawai pangissengengngé sibawa sampéyangngi pappagguruwangngé?

²³ Engkalingaka rékko uwamparekko, naupannessangekko matu lise atimmu sibawa upagguruwakko pangissengekku.

²⁴ Purano uwobbi, iyakiya massampéyakko sibawa dé' mumaélo bati-batiwi.

²⁵ Sininna pangajaku dé' mubati-batiwi sibawa pakkamparekku musampéyangngi.

²⁶ Rimakkuwannanaro, rékko macilakako, ucawa-cawaiko matu. Rékko métauko, uwéllé-kéllé'ko matu.

²⁷ Ya, uwéllé-kéllé'ko matu rékko manennekko sibawa manrasa-rasa nasaba nageppako abala iya polé pada-pada anginrajaé.

²⁸ Iyaro wettué muwobbika matu, iyakiya dé' matu umetté. Musappaka matu kégi-kégi iyakiya dé' matu muruntu'ka.

²⁹ Pada-padako tau iya dé'é naengka napojiwi lolongeng pangissengeng, sibawa bata-bata turusiwi Puwangnge.

³⁰ Dé' naengka mumaélo tarimai pangaja-pangajaku iyaré'ga puriyatiwi pakkampareng-pakkamparekku.

³¹ Rimakkuwannanaro, mupéneddingiwi matu addimonrinna sining pangkaukemmu sibawa sining rancanamu iya majaé.

³² Tau dé'é namappangalamang matéi matu nasaba dé' najampangika, sibawa tau donggoé ancuru'i matu nasaba dé' nabati-batika.

³³ Iyakiya tau iya méngkalingaékka ripiyarai matu. Tuwoi sibawa amang enrengngé dé' naparellu métau.”