Obaja 1 - LAPIHEN SIMBADIA DEUTEROKANONIKA

Ihukum Jahowa mo Edom

¹ Enda mo ramalen si Obaja; ipesakat ia mo tennah Jahowa Pergegoh Sisotercodi i tersèngèt bangsa Edom: Enggo ngo ipasulak Jahowa suruhenNa mendahi karina bangsa, janah enggo ngo sidengkohken tennah siniembahna bagè sinidokkenna i sèn, “Kebbas mo lako mergeraha! Ita kè mo kita berkat menjuhap Edom.”

² Janah idokken Jahowa mo taba Edom, “Gabè ndalmeh mo ko Kubaing, gabè ilèai karina bangsa.

³ Kenna akkal-akkalen mo ko ibaing perukurenmu gegah idi. Delleng batu sintegguh ngo gia induk kutamu; bekkasmu merian pè i pucuk delleng sindates. Kerna i dok atèmu mo sendah, ‘Mèter isè nola mo ndorok mendabuhken Aku?’

⁴ Tukasi nola pè ibakin kono bagesmu nasa dates bintang sini langit, kennah ngo ko dabuhenKu.

⁵ Pellin memuat sèkel bai kalak i ngo kessa, penangko barang pè penamun siroh tikan berngin. Kalak simemotiki anggur i pekken, dak iahanken ngo barang piga-piga ngkabuah. Tapi ukum kono kerri ngo isalpuni musuh-musuhmu.

⁶ Alè pemparen si Esau, iongkasi ngo silot bamu janah kerri ngo ibantun ugasen sinibonikenmu.

⁷ Iakkal-akkali denganmu sada taki ngo ko janah ipuari i nagerrimu nai. Italuken dengngan-dengnganmu ngo ko, itogong-togongi kalak si rebbak mangan dekket ko. Kuso-kuso mo kalak ibagasen penarihenna, ‘Apaina ma mo kaltu bagèndari karina kepandèenna idi?’

⁸ Ipas arinkenna Kuhukum Edom, Kusalpuni mo karina kalak bijak. Janah mago mo karina kepantasen kalak i, èlepna poda nè lot.

⁹ Buradan mo karina pertaki kan Teman nai, janah mermatèen mo karina soridadu Edom.”

Alaenkenna Edom ihukum

¹⁰ “Enggo mposisu pemahanmu meradepken kaka-anggimu pemparen si Jakob. Kernana i salpunenna mo ko, janah icèdurken dèba soh mi sidekkah-dekkahna.

¹¹ Cènder ngo ko i bekkas sindaoh, ipas arinkenna itumbur musuh pèntu Jerusalem dekket menaluken kuta i. Sip sambing ngo ko tikan ibantun kalak i karina kinibèak Jerusalem janah kipella-pellaken i tengah-tengah kalak i. Dos ngo jahatna kono dekket musuh idi.

¹² Oda ngo patut nemmuken sennang janah merlolo atè kono kumernaken nasip sial kalak Juda ipas arinkenna mermatèen dengngan sibeltekmu idi. Oda ngo patutna nemmuken ko dak merkatoi tikanna susah ia.

¹³ Oda patutna kono kibengketti kuta bangsangKu, dekket menuraki kalak i tupung mersitahanen, baliksa nola mo mengerampasi ugasenna ipas ari persindanggelna i!

¹⁴ Oda ngo nemmuken kennah ko nola cènder i penirpangen dalan, lako mengambat kalak simperrus kan musuhna nai, barang pè menohken kalak i taba musuh ipas arinkenna sempa bai kalak i kepersuken.”

Iadili Dèbata mo karina bangsa

¹⁵ “Situhuna, enggo ndessing arina, Aku, Jahowa, mengadili karina bangsa. Kadè kin ibaingken Edom bagi ma mo balesenken bana. Akapenna mo kadè sienggo nibahanna.

¹⁶ Enggo iènum bangsangKu ènumen i babo dellengKu simbadia i menggombarken hukumen bana. Tapi mpagiten dèng ngo ènumen bai bangsa-bangsa sini tanoh èn. Oda ndorok terpesisi kalak i hukumen idi. Kennah ngo ènumen kalak idi sampè kerri, nai kessa i salpun mo kalak i oda nè lot èlepna.”

Kemenangen Israel

¹⁷ “Tapi lot mo kalak maluah, i Delleng Sion, janah gabè bekkas merkedekoen baku mo delleng i. Nai balik nola mo pinempar si Jakob mersidasaken tanoh pusakka kalak i.

¹⁸ Codi bagè api mo bangsangKu Israel menutung kerri pinempar si Esau, bakunè kin api kerri mengelekkup nggala i juma. Sada kalak poda lot mpellut ibas pemparen si Esau nai. Aku, Jahowa ngo mendokken i!

¹⁹ Irajai kalak Juda Selatan nola mo Edom. Italuken kalak siroh i delleng kan kesunduten nai nola mo aur kalak Palistin. Irajai marga Benjamin mo Gilead, janah irajai bangsangKu Israel mo karina Efraim dekket Samaria.

²⁰ Balik nola mo kalak Israel Utara kan kebuangen nai janah mengerajai Penesia soh mi Zarfat. Karina kalak Jerusalem sinibuang mi Sardis, merbaliken janah mengiani karina kuta kettan selatan Juda.

²¹ Ialo janah italuken pengisi Jerusalem simahantu i mo Edom. Nai Aku Jahowa mo memerèntah sikira raja.”