Mika 1 - LAPIHEN SIMBADIA DEUTEROKANONIKA

¹ Ukum asal si Mika imo i sada kuta kèdèk nai mergerar Moresyet. Tikanna merudut nagerri Juda iperèntah Raja Jotam, Ahas dekket Hizkia, ijalo si Mika mo tennah Jahowa tersèngèt Samaria dekket Jerusalem.

Tangis milangi bai Samaria dekket Jerusalem

² Dengkohken mo, alè bangsa-bangsa! Perdimata mo, alè pengisi suberri dunia! Roh ngo Jahowa Pergegoh Sisotercodi sikira saksi mengalo kè karina! Dengkohken mo Ia mengerana i BagesNa simbadia nai i sorga.

³ Susur ngo ia i bekkasNa simbadia i nai janah merdalan i babo pucuk-pucuk delleng i tanoh èn.

⁴ Melala ngo delleng-delleng i terruh tapak-tapakNa tosè bagè lilin ibagasen api njolah; tanohna mertelbaken mi lembeng-lembeng, tosè bagè laè i babo ndelleng menjarir mi jèhè.

⁵ Masa pè karinana idi kerna merdosa ngo kalak Israel janah mengalo taba Dèbata. Isè ngo memaing Israel merdosa? Otang Samaria induk kutana i sendiri ngo? Isè ngo memaingken Juda menembah Dèbata si- dèban? Otang Jerusalem sendiri ngo?

⁶ Kerna i ngo asa idokken Jahowa, “Kubakin mo Samaria gabè rumpak-rumpak mertènjun i juma, dekket bekkas ndèba menuan anggur. Kupengambongken mo rumpak-rumpak kuta i mi lembeng, janah Kubungkar batu-batu cèndina.

⁷ Kureppuki mo gana-ganana simaharga i, janah kututung karina ugasen siniberrèkenna taba daberru-daberru simerkebbas i bages pemèlèen dèbata siso tuhu, dekket karina gana-gana ibinasaken. Ugasen-ugasen idi imo hasil pemèlèen kalak i bai dèbata kegabèen. Bagendari karinana idi ibantun musuh-musuhna mahan pèlèen lias atè bai dèbata kalak i.”

⁸ Kumerna i mo aku, si Mika, merbonek atè janah kekelsohen. Merdalan mo aku mak meroles bak oda mercipatu lako pacidahken sondel bonek ukurku. Mengaungi mo aku tosè bagè biang rambah janah muo-uo bagè manuk-manuk uo.

⁹ Kerna mak nèngè terpemalum ugah-ugah Samaria, janah Juda pe isempa nasip sibagidi ma. Enggo sakat olpek mi Jerusalem, pèntu pengkeruhen lebbuh bangsangku.

Enggo naing soh musuh mi Jerusalem

¹⁰ Ulang mo bagahken taba musuh-musuhta i Gat tersèngèt olpek simasa banta; ulang duè kalak i mengidah kènè tangis. Kènè alè pengisi Bet-Le-Afra, mergoling-goling mo kè ipas abu tandana mendellè!

¹¹ Kènè pengisi Safir, berkat mo mi buangen ningan lubus janah ibagasen perasat malu! Oda pang mendarat kalak Zaanam i kuta kalak i nai. Derko-derko pengisi Bet-Haezel peteridahken bai ndènè magahken oda lot nè i sidi percilendungen.

¹² Enggo soh mi pèntu pengkeruhen Jerusalem olpek siroh bai Jahowa nai! Kerna i, oda datina kalak Marot mengharapken pengurupien.

¹³ Kènè pengisi Lakhis, berretken mo kuda mi kurèta perang! Iosih kè ngo dosa-dosa siniulaken i Israel memaingken Jerusalem pè gabè merdosa.

¹⁴ Bagèndari pè, alè kalak Juda kembalangen kuta Moresyet-Gat mo kènè. Oda nè terolih pengurupien raja-raja Israel i kuta Akhzib nai.

¹⁵ Alè kènè kalak Maresya, isohken Jahowa mo kènè taba musuh simertaki naing menaban kuta ndènè. Pengulu-pengulu Israel simerkuasa ciboni mo mi bagasen liang i Adulam.

¹⁶ Alè kènè kalak Juda, gettap kènè mo buk ndènè mahan tanda bonek taba dukak-dukak sinikekelengen ndènè. Cukkur mo takal ndènè soh gundul bagè manuk-manuk sikipangan bangkè, kerna ibantun ne mo dukak-dukak ndènè mi buangen.