Junus 3 - LAPIHEN SIMBADIA DEUTEROKANONIKA

Iuèi si Junus Jahowa

¹ Peduakaliken mengerana nola mo Jahowa taba si Junus.

² Nina mo, “Berkat mo ko mi Niniwe, kuta simbellen i, janah dokken mo taba sinigemgemna, tennah siKupesakat bamu.”

³ Nai iuèi si Junus mo Jahowa janah berkat mi Niniwe, sada kuta simbelgah kalohon; sanga ngo tellu ari iperluken lako mendalani kuta i.

⁴ Ibengketti si Junus mo kuta i janah enggo kessa merdalan terrus ari, ipungkah mo merjamita, nina mo, “Empatpuluh ari nai, mago mo kuta Niniwe!”

⁵ Tok ngo ukur pengisi kuta Niniwe taba tennah Dèbata idi. Karina mo jelma nterrem mersada taki lako merpuasa, janah karina kalak, agia simbelgah barang pè anak kèdèk, menelluk abit goni lako peteridahkan iselselli kalak i ngo karina dosa kalak i.

⁶ Tikan idengkoh raja Niniwe berita idi, mènter mo ia susur ibas kundulen kerajaenna nai. Italkasi ia mo jubah kerajaenna janah iselluk mo kaèn karung, nai dogok mo ia i babo cirabun.

⁷ Ikaruarken mo boa-boa ènda, “Ibaingken ngo perèntah ènda i Niniwe merkitèken keputusen raja dekket karina menteri: Karina jelma, lembu, biri-biri bak pinakan sidèbanna irarang mangan dekket mènum.

⁸ Kennah mo jelma dekket binatang menelluk kaèn karung. Sikira tanda penelsellen karina kalak kennah mersodip mertuhu-tuhu taba Dèbata. Kennah mo kalak i kipemendè pekilakona si jahat i deket pemahanna si dom dosa i.

⁹ Tah bakunè uè Dèbata lako menondati niatNa janah oda nè melaga gabè oda mo saut kita mago!”

¹⁰ Idah Dèbata mo pemaing kalak i; idah mo enggo itadingken kalak i pekilako kalak i si jahat i. Nai isondati nola mo keputusenNa, janah oda saut menghukum kalak i.