Ester 9 - LAPIHEN SIMBADIA DEUTEROKANONIKA

Kebbas kalak Jahudi mengalo musuh-musuhna

¹ Nai dapet mo ari tellu bellas bulan Adar, imo ari sienggo itentuken pesautken perèntah raja taba kalak Jahudi. Enggo kin ma ngo ipèma-pèma musuh kalak Jahudi ari i, asa dok atèna ikuasai kalak i bangsa i. Keppè kalak Jahudi nola ngo menaluken kalak i.

² I gennep kuta, merpulung mo kalak Jahudi janah rebbakken menjuhap karina kalak simerniat jahat taba kalak i. Karina bangsa i dikè sambing pè gabè buradan midah kalak i, gabè sada poda berrani mengalo kalak i.

³ Gabè karina nola tupèh perpangkat propinsi, gubèrnur, bupati dekket simersangap kerajaen i menumpaki kalak Jahudi kumarna karina kalak mbiar midah si Mordekhai.

⁴ Ibettoh karina jelma sinikerajaen i ngo, ukum si Mordekhai merpengaruh kalohon ngo i istana janah makin merkuasa.

⁵ Bagi mo ndorok kalak Jahudi memaing barang bakunè sambing taba musuh kalak i, juhap mo kalak i merkitè pedang asa mermatèen musuhna i.

⁶ I Susan induk kuta kerajaen, ibunuh kalak Jahudi ngo lot lima ratus kalak.

^7-10 Dekket mo enggo i sipuluh kalak anak si Haman, anak si Hamedata, musuh mbellen kalak Jahudi. Imo kalak simergerar: Si Parsandata, si Dalfon, si Aspata, si Porata, si Adalya, si Aridata, si Parmasta, si Arisai, si Aridai, dekket si Waizata. Tapi oda uè kalak Jahudi menaban harta.

¹¹ Sidarinkenna i ma mo ibagahken kalak taba raja i buè jelma sienggo terbunuh i Susan.

¹² Nina raja i mo taba bindohara Ester, “Pellin i Susan sambing enggo ibunuh kalak Jahudi 500 kalak enggo mo dekket i sidi anak si Haman sisipuluh kalak i. Makinsa nola mo i propinsi-propinsi. Tah enggo bakunè ibaing kalak i i sidi. Jadi kadè dèng ipergeddo ukurmu bagèndari? Dokken sambing mo, kennah dapet kono ngo i!”

¹³ Ialoi si Ester mo, “Mula tuju atè Rajai naing mo nemmu iulaki kalak Jahudi silot i Susan èn baremben bagè sienggo ibaing ari èn. Janah dèng ma naing mo nemmu igantung bangkè dukak si Haman i tihang penggantungen.”

¹⁴ Nai iperèntahken raja i mo asa ibaing sinipergeddo si Ester i; ibahan mo surat perèntah mi kuta Susan janah igantung mo sipuluh kalakna bangkè anak si Haman.

¹⁵ Jadi ari 14 bulan Adar, merpulung ma mo kalak Jahudi i Susan janah ibunuh kalak i mo 300 kalak nai i kuta i. Sikali èn pè oda ngo uè kalak i menaban harta.

¹⁶ Kalak Jahudi simerian i propinsi pè merpulung ma ngo janah mempebèlai dirina. Italuken kalak i mo musuhna janah memunuh 75.000 kalak simernggogo atè midah kalak i. Tapi oda uè kalak i menaban harta.

¹⁷ Masa karina i tupung ari sipuluh tellu bulan Adar. Sibarembenkenna nola imo ari sipuluh empat, oda nè ngo lot ibunuh kalak i barang isè pè, tapi ipèstaken kalak i mo ari i ari mersampang atè.

¹⁸ Tapi ukum kalak Jahudi sini Susan, ari sipuluh lima ngo ipèstaken gabè ari mbellen, kumarna ibunuhi kalak i dèng ngo musuhna ari sipuluh tellu dekket ari sipuluh empat, nai mentadi mo ari sipuluh lima.

¹⁹ Kemulihken i ngo kalak Jahudi simerian i kuta kèdèk maing pernèngèten ari sipuluh empat bulan Adar ari sampang atè, ari merpès- ta meroang-oang ninganna mersipiringen pangaen.

Perayaan Purim

²⁰ Enggo kessa i isurat si Mordekhai ngo karina simasa i janah itengesken mo surat i taba karina kalak Jahudi mi suberri kerajaen Persia, ndaoh barang ndessing pè.

²¹ Ukum kata surat i imo memerèntahken asa irayaken ari sipuluh empat dekket ari sipuluh lima bulan Adar gennep tahun.

²² Kumarna tupung ari i mo enggo italuken kalak i musuhna, gabè tukar mo arsak bak bonek gabè sampang atè dekket kesennangen. Kemulihkenna i kennah ipèstaken kalak i ngo ari i merkitè pèsta pertamuèen ninganna mersipiringen pangaen dekket merèken cudekkah taba kalak sincor.

²³ Iulaken kalak Jahudi ngo perèntah si Mordekhai i, janah gabè adat kecemmalen nola mo pèsta i gennep tahun.

Rèmpun

²⁴ Si Haman anak si Hamedata pemparen si Agag musuh mbellen kalak Jahudi, enggo mertendung sinigerarenna “Purim” lako memilih ari lako mengeripasken kalak Jahudi, ai enggo isura-surai lako menumpatken kalak i.

²⁵ Tapi ihadep si Ester mo raja, janah ibaing raja i mo surat perèntah memaing sura-sura si Haman jahat i gabè terbalik kettak mi dirina sendiri, gabè ia dekket dukak-dukakna nola ngo igantung mi tihang gantungen.

²⁶ Kemulihkenna i mo ari mbellen i igerari Purim. Surat si Mordekhai dekket karina sienggo ialami kalak Jahudi ngo,

²⁷ memaing ibahan kalak i sada hatoren bai kalak i sendiri, bai pemparenna dekket bai karina kalak sienggo gabè bangsa Jahudi. Mengèkutken hatoren i, kennah gennep tahun ngo kalak i memèstaken sidua ari i sienggo itetapken si Mordekhai i.

²⁸ Itetapken ma ngo kennah ièngèt janah irayaken gennep jabu kalak Jahudi ngo Purim i soh mi sidekkah-dekkahna, i gennep cundut i karina propinsi dekket karina kuta.

²⁹ Adumna i isurat bindohara Ester berru si Abihail ma ngo surat peduaken rebbak dekket surat si Mordekhai i, lako menuhu-nuhui surat si Mordekhai i tersèngèt Purim i.

³⁰ Itengesken ngo surat i taba karina kalak Jahudi, janah isalin ma ngo i janah itengesken mendahi 127 propinsi kerajaen Persia. Merdengan sodip ngo surat i asa dak tong njuah-njuah janah mènak kalak Jahudi.

³¹ Ianjurken ma ngo ipas surat i asa ièngèt kalak i dekket pemparen kalak i ari Purim i tupung arina, tosè bagè pemaing kalak i tupung dapet tikki puasa bak tikki bonek. Bagidi mo kata surat si Mordekhai dekket Bindohara Ester.

³² Isurat ngo ibas bukku perèntah ketetapen hatoren si Ester i.