Ester 2 - LAPIHEN SIMBADIA DEUTEROKANONIKA

Si Ester gabè bindohara

¹ Daoh-daoh arien, tukasi pè oda nè melaga raja i, dak ngo merkalimesso i ukur raja i pemaing bindohara Wasti i dekket hukum sienggo idabuh bana.

² Kumerna i penasèhat sikaripna dekket raja i maing usul bagèen, “Merandalen ngo itulusi simerbaju simberruna bai Rajai.

³ Naing mo ipebangkit Rajai pugabè i gennep propinsi kerajaen èn, asa itulusi kalak i simerbaju mberru-mberru nai iarahken mo kalak i karina mi istana daberru i Susan èn. Si Hegai imo naposo èkuten mengkebasi siperlu i istana daberru imo mengkebasi kalak i dekket mengurus kinimberru bai kalak i.

⁴ Enggo kessa bagi naing mo ipilih Rajai simerbaju sinikekelengen atè Rajai kaloon, janah memaingsa gabè bindohara singkat bindohara Wasti.” Iuèi raja i ngo peddah i janah iulaken.

⁵ Lot ngo sada kalak Jahudi mergerar si Mordekhai i kuta Susan i, imo anak si Jair. Pemparen si Kis bak si Simei i marga Benjamin nai.

⁶ Tertaban ngo si Mordekhai tikan italuken si Nebukadnezar raja Babel Jerusalem. Ibuang ngo si Mordekhai mi Babel rebbak dekket si Joyakhin raja Juda bak nterrem dèng tabanen sidèbanna i.

⁷ Lot ngo turangna sibeltek bapa simerbaju dèng mberru kalohon janah merandal perdagingna, mergerar si Ester, ukum gerar Heberna imo si Hadasa. Ukum partua si Ester enggo ngo matè. Gabè iabin si Mordekhai mo ia janah ipehèdu-hèdu dosken dukakna kalohon.

⁸ Enggo kessa itingtingken perèntah raja i, nterrem ngo simerbaju ipepulung mi Susan, dekket mo si Ester. Iarahken mo ia mi istana raja janah isohken bai si Hegai èkuten perkebbas istana daberru.

⁹ Lengang mo si Hegai midah si Ester janah lemmo atèna midahsa. Mèter isudu mo memangirisa dekket mengkebasi panganna. Ilompat mo si Ester mi bekkas sisellohna i istana daberru i janah idokken mo pitu kalak simerbaju singkasahna lako mengkebasisa.

¹⁰ Itennahi si Mordekhai kin ngo enggo si Ester, asa ulang ibagahken berru Jahudi ia.

¹¹ Gennep ari ngo dak roh si Mordekhai merdalan-dalan i kasèan lebbè istana daberru i lako mengkusoken bakunè si Ester janah kadè sinaing masa bana.

¹² Mengèkutken hatoren, ipangiri ngo simerbaju i sidekkah sada tahun asa mberru; sidekkah ennem bulan merpangir merkitè minak campur kemènjen, janah ennem bulan nai nola ipangiri dekket minak sienggo icampur dekket sibaungkus sidèbankenna i. Enggo kessa i, gennep simerbaju terolih gèlèren lako menghadep Raja Ahasweros.

¹³ Tikan menghadep sada simerbaju taba raja, ndorok ngo ipakkè barang oles kadè sambing ngkelleng atèna.

¹⁴ Iarahken mo ia tikan berngin mi istana raja, janah sibarembenkenna, iembah nola mo ia mi istana sidèban, janah ikebbasi si Saasgas, imo sada kalak naposo simengkebasi siterbuang raja. Oda nèngè mo pella ia menghadep raja, laèn mo mula lemmo atè raja i dekket menenggoisa merkitè idokken gerarna.

¹⁵ Nai dapet mo gèlèren si Ester menghadep raja. – Si Ester imo berru si Abihail bak turang sibeltek bapa si Mordekhai sienggo mengabinsa dosken berruna; ngkelleng ngo atè kalak barang isè mengidah si Ester. Tikan menghadep raja i si Ester, ipakkè mo pakkèen mengèkutken peddah si Hegai èkuten istana daberru.

¹⁶ Bagi mo tupung i tahun pepituken pemerèntahen si Ahasweros i ibulan sipuluh imo bulan Tebet, iarahken mo si Ester menghadep Raja Ahasweros i istana raja.

¹⁷ Ipesampang janah ipesennang ngo ukur raja i, lebih daripada simerbaju sidèban i. Kemulihken i, ngkelleng kalohoen ngo atè raja i midahsa. Nai mèter ibaing raja i mo rudang kerajaen mi takal si Ester janah ibaing mo ia gabè bindohara singkat bindohara Wasti.

¹⁸ Nai merpèsta mbellen mo raja i pesangapken si Ester janah idilo mo karina perpangkat dekket kalak simersangap. Itingtingken mo ari pentadien i suberri kerajaen janah ibagi-bagiken mo hadiah mbuè kalohon.

Ipaluahi si Mordekhai kessah raja i

¹⁹ Sinderrangna i enggo ipebangkit raja i si Mordekhai gabè pugabè nagerri.

²⁰ Laju dèng ngo oda ibagahken si Ester berru Jahudi ia, kumerna igerra si Mordekhai. Iuèi si Ester ngo si Mordekhai, tosè bagè tikanna kèdèk dèng sinderrang ipehèdu-hèdu turangna sibeltek bapa i ia.

²¹ Tikan sidari, tikan mengula si Mordekhai i istana, lot mo dua kalak pugabè raja, imo si Bigtan dekket si Teres, mertaki naing memunuh Raja Ahasweros, kumerna nggogo atèna midahsa.

²² Terbettoh ngo taki-taki i bai si Mordekhai, janah ndor mo ibagahken taba si Ester. Oda pella merkellang, ibagahken si Ester mo taba raja sinibagahken si Mordekhai i.

²³ Iselidik mo simasa i, keppè tuhu ngo berita i. Ihukum gantung mo sidua kalak i. Rembang mi perèntah raja isurat mo simasa i mi bukku tori-torien kerajaen.