Esra 1 - LAPIHEN SIMBADIA DEUTEROKANONIKA

Iduè si Kores kalak Jahudi balik mi nagerri kalak i

¹ I tahun perlebbè pemerèntahen si Kores, raja Persia, ipesaut Jahowa mo kadè sienggo iruapken merkitè Nabi Jeremia. Ijujui Jahowa ngo perukuren si Kores lako memaingken sada perèntah sijakaenken i suberri kerajaenna. Bagèen mo pendokkenna:

² “Enda mo perèntah si Kores, raja Persia. Enggo ibaing Jahowa, Dèbata simerkuasa i sorga i aku gabè raja mi suberri dunia, janah mendokken taba aku memajek bages baNa i Jerusalem i tanoh Juda.

³ Katerra pè ijamoti Dèbata mo kènè karina sienggo gabè bangsaNa. Kennah balik ngo kènè mi Jerusalem janah memajek balik Bages Jahowa, Dèbata Israel, Dèbata simerian i Jerusalem.

⁴ Mula lot sada kalak ibas bangsaNa nai i bekkas buangen èn simemerluken pengurupien asa ndorok balik, kennah iurupi gembar sapona ngo. Kennah mo iberèken kalak i tabasa pirak dekket emmas, bekkel i dalan bak pinakan merembah boban, dekket bagima pèlèen mi Bages Jahowa i Jerusalem.”

⁵ Nai nola dèng ma pengulu-pengulu kaum i marga Juda dekket Benjamin nai, dekket imam bak kalak Lewi, bak karina kalak sinigerekken Dèbata perukurenna, merkebbas lako balik mi Jerusalem janah pejengjengken Bages Jahowa.

⁶ Karina sincelket kalak i dekket ngo mengurupi merkitè memerèken ugasen-ugasen, umpamana bagè perkekkas-perkekkas pirak dekket emmas, bekkel i dalan, pinakan merembah boban, ugasen sidèbanna dekket pèlèen mi keperluen Bages Jahowa.

⁷ Ipendarati si Kores mo karina mangkuk bak caban sinipakè sinderrangna ibagasen Bages Jahowa i Jerusalem. Ugasen idi enggo kin ibantun Raja Nebukadnezar janah ibakin mi bages sembahenna sendiri.

⁸ Isohken si Kores ngo menjamoti haliu i taba si Mitredat, èkuten simemennep harta kerajaen. Nai ibakin si Mitredat mo gerar-gerar ugasen idi lako bai si Sesbazar, gubèrnur Juda.

^9-10 Enda mo gerar-gerarna: mangkuk emmas sipakkèen tupung kerja pemèlèen 30 mangkuk pirak sipakkèen tupung kerja pemèlèen 1.000 Mangkuk-mangkuk sidèbanna 29 Mangkuk-mangkuk kèdèk ipas emmas nai 30 Mangkuk-mangkuk kèdèk ipas pirak nai 410 Perkekkas sidèbanna 1.000

¹¹ Pulung karina 5.400 mangkuk emmas dekket pirak bagi bak ugas-ugasen sidèbanna. Karinana idi iembah si Sesbazar tikan berkat ia dekket kalak sibuangen sidèbanna i i Babel nai mi Jerusalem.