Daniel 5 - LAPIHEN SIMBADIA DEUTEROKANONIKA

Raja Belsyazar anak si Nebukadnezar memaing kerja

¹ Ipas sidari idilo Raja Belsyazar mo seribu kalak simersangap lako mendekketti kerjana mbellen kalohon, dekket mènum-mènum anggur.

² Sintorna mènum-mènum kalak i, iperèntahken si Belsyazar mo lako memuat mangkuk emmas dekket pirak, sienggo irampasi si Nebukadnezar, bapana i, i Bages Jahowa i Jerusalem nai. Dok atè Raja Belsyazar imo asa karina simerpangkat, bak sinibagesna, siterbuangna dekket ia sendiri, mènum ibas perènumen idi nai.

³ Mèter iembah mo perènumen idi mendahisa, nai mènum mo kalak i karina ibas alat-alat perènumen idi nai.

⁴ Ninganna mènum ipepoji-poji kalak i mo dèbata sinibahan ipas emmas, pirak, tembaga, kayu dekket batu nai.

⁵ Nai sintempu mènter taridah mo tangan jelma menuratken ipas dingding istana i bekkas sinterrang kalohon kenna cuhaya lampu, gabè ndorok tangkas kalohon idah raja i.

⁶ Gabè melangan mo ia janah buradan kalohon sanga menggirgir tèunna.

⁷ Pingko-pingko mo ia mendokken asa idiloi sipandè mertendung, sipandè mertabas dekket sipandè merketika. Roh kessa kalak i, idokken raja i mo, “Barang isè ndorok menjaka surat idi, janah memagahken lapatenna baku, berènkenku mo bana pakkèen kerajaen merumangken jubah meharbu dekket borgot emmas tanda kesangapen. Laènkenna i dèng pebangkitenku mo ia gabè perkuasa nomor tellu ibas kerajaenku.”

⁸ Mi lebbè mo tolè sipandè-pandè i, tapi sada kalak poda bai kalak i nai ndorok menjaka surat idi bang memagahken lapatenna taba raja i.

⁹ Makin mi melangan janah mbettakna mo Raja Belsyazar; bang pengulu-penguluna bingung.

¹⁰ Mendengkoh pingko-pingko raja i dekket pengulu-penguluna, mbengket mo inang raja i mi bagasen bilik perpèstaen idi. Ninganna idokken mo, “Njuah-njuah mo Rajai soh mi sidekkah-dekkahna! Pemènak kènè mo ukur ndènè raja nami janah ulang mo pella gabè melangan kènè.

¹¹ Kerna lot ngo sada kalak anak laki ibas kerajaen Rajai nai sinidomen tendi dèbata simbadia. Tikan ibas pemerèntahen bapa Rajai, terbukti ngo lot kepandèenna, pemettohna dekket kebijakenna, bagè kebijaken sembahen. Pertua Rajai pè Raja Nebukadnezar enggo ngo pebangkitkensa gabè huntuen karina sipandè mertendung, sipandè tabas, kalak simerhèlmu dekket sipandè merketika.

¹² Luar biasa ngo kepandèen dekket kebijakenna janah pandè kalohon peterangken nipi, memukaken rusia dekket pekadèken nasa sisulit. Gerarna imo si Daniel, tapi igerari Rajai ngo ia si Beltsazar. Dilo mo ia. Bagahenkenna i ngo bai raja i barang kadè lapaten surat èn.”

Si Daniel peterangken lapaten surat idi

¹³ Mènter mo ndor si Daniel iembah menghadep raja. Nai mengkuso mo raja i tabasa, “Kono ngo si Daniel, kalak Jahudi si kenna buang, sienggo itaban bapangku i tanoh Judea nai?

¹⁴ Kudengkoh idomi tendi simbadia i ngo kono, janah lot ngo kepandèen, pemettoh, dekket kebijakenmu mahantu kalohon.

¹⁵ Ka- rina sipandè dekket simemettoh mertabas enggo mencuba menjaka surat èn dekket memagahken lapatenna baku. Tapi oda ibettoh kalak i.

¹⁶ Rembaru deng ngo kudengkoh ukum kono ndorok memukaken karina rusia dekket peliasken persoalen simahal kalohon. Mula ndorok ngo kono menjaka surat èn dekket memagahken lapatenna baku, kuberrèken mo bamu pakèen kerajaen merumangken jubah meharbu dekket emmas borgot tanda kesangapen. Laènkenna idi pebangkitenku mo kono gabè perkuasa nomor tellu i kerajaenku.”

¹⁷ Ialoi si Daniel mo, “Oda perlu Rajai memerèken upah sibagidi baku, bai kalak sidèban mo idi berrèken. Kujaka pè surat idi janah memagahken lapatna bai Rajai.

¹⁸ Ibaingken Dèbata Sintèmbul kalohon i ngo si Nebukadnezar, partua Rajai gabè raja sitermurmur dekket memerèken bana kinisangap bak kinilia.

¹⁹ Bagidi mo sa- ngapna ia, gabè karina jelma i segala bangsa, suku bangsa, dekket perkataen nai, buradan janah mbiar tabasa. Mula naing dok atèna ia memunuh jelma, bagi sambing ngo ibunuh jelma i. Mula naing dok atèna ia paluahken sada kalak jelma, ipaluah mo jelma i. Ipebangkit janah ipesusur ngo barang isè sambing mengèkutken lemmo atèna.

²⁰ Tapi tekka kessa mo tunggang ia, mpihir ukurna janah kejam, idabuh mo ia i kundulen kerajaenna nai gabè mago mo kehangganna.

²¹ Iliplip ngo ia i tengah jelma mbellang nai janah perukurenna pè codi mo bagè perukuren binatang. Rebbak merian mo ia dekket kalodè sinirambah, menggagat dukut tosè bagè lembu janah meddem i jampalen mersaongken langit gabè ntaptap mo ibaing hembun. Dungna ipertuhu mo magahken Dèbata Sintèmbul kalohon idi ngo merkuasa meradepken kerajaen jelma janah iberrèken ngo kerajaen idi bai barang isè sambing sinipilihNa.

²² Tapi anakna, imo Rajai sendiri, oda uè kènè peterruhken diri ndènè, tukasi pè ibettoh Rajai ngo karinana idi.

²³ Ipedates Rajai ngo dirina meradepken Jahowa sinisorga janah pang kè mendokken merembah masuk perènumen sienggo irampasi i Bages Jahowa nai. Nai mènum mo Rajai bak pengulu-pe- ngulu, sinibages, dekket nasa siterbuang Rajai tarap perènumen idi nai. Ipepoji-poji Rajai mo dèbata sinibahan ipas emmas, pirak, tembaga, bessi, kayu, dekket batu nai, dèbata siso ndorok merpendidah barang pè merpendengkoh barang mengantusi barang kadè. Oda ngo ipesangap Rajai Dèbata simenentuken nggelluh dekket permatè Rajai, dekket simenentuken dalan pernggelluh Rajai.

²⁴ Kernana idi mo Dèbata menengesken tangan idi lako menuratken tennahNa.

²⁵ Bagèen ngo sitersurat idi, ‘Ibilang, ibilang, itimbang, ibagi.’

²⁶ Janah ènda mo lapatna: Ibilang, enggo ibilangi Dèbata tikki pemerèntahen Rajai, janah merenggoisa;

²⁷ itimbang, enggo itimbang Rajai janah oda memuasken;

²⁸ ibagi, ibagi ngo kerajaen Rajai janah iberrèken bai kalak Media dekket Persia.”

²⁹ Mènter kejapkenna i mo idokken si Belsyazar taba pugabè-pugabèna asa isellukken bai si Daniel jubah meharbu janah menangketken borgot emmas i kerahongna. Nai ipebangkit mo si Daniel gabè perkuasa nomor tellu i kerajaenna.

³⁰ I bernginkenna idi kenna bunuh mo si Belsyazar raja Babel idi.