Daniel 2 - LAPIHEN SIMBADIA DEUTEROKANONIKA

Nipi si Nebukadnezar

¹ Tikan i sada berngin, dua tahun enggo kessa bangkit Raja si Nebukadnezar, datang mo nipina. Bulisah kalohon ngo ukurna ibaing nipina idi, gabè ndorok nè poda ia terpeddem.

² Kernana i idilo mo sipandè meralaten, sipandè mertabas, datu dekket kalak simerhelmu, lako peterangken nipina idi.

³ Sinderrang cènder kalak i i hadeppenna, nina raja i mo, “Datang ngo nipingku, janah bulisah ukurku kerna naing ngo dok atèngku bettohenku lapatna!”

⁴ Ialoi kalak i mo ibagasen kata Aram, “Njuah-njuah mo Raja i soh mi sidekkah-dekkahna! Sukutken kè mo nipi ndènè i taba kami, asa kubagahken kami lapatenna.”

⁵ Ialoi raja i mo, “Enggo kubaing keputusen bagèen: Kennah ngo bagahenken ndènè nipi idi taba aku, bagi ma dekket lapatna. Mula oda tellap kènè, gat-gaten mo kènè janah bages ndènè pe kennah rumpakenken.

⁶ Tapi mula ndorok ngo ibagahken kènè, kuberèken mo bai ndènè upah merandal dekket kesangapen mbellen. En pè bagahken kènè mo bagèndari nipingku idi bak lapatna!”

⁷ Ialoi kalak i nola mo, “Naing mo lebbèen ibagahken Rajai nipi idi bai nami, kessa i pè asa kupeterang kami lapatna.”

⁸ Mendengkoh i nina raja i mo mengaloi, “Tuhu ngo bagè sikusura. Pellin pegeddang-geddangken ari sambing ngo kessa kènè, kerna ibettoh kènè aku mertaki

⁹ lako menghukum kènè karina mula oda kènè ndorok memagahken nipi i taba aku. Mersada taki ngo kènè lako pukpuk kiluapi aku dekket kipergait-gaitken aku dekket pengharapen asa obahenku keputusenku. En pè bagahken kènè mo nipi idi, nai bettohenku mo barang ndorok ma kènè peterangken lapatna.”

¹⁰ Ialoi sipandè idi mo, “Sada kalak poda lot i suberri dunia èn sindorok memagahken kadè sinipido Raja idi. Janah oda nung dèng sada kalak raja, agia nola bakunè belgah dekket sangapna, mengidoken bagidi bai pengeramal, sipandè mertabas, dekket bai kalak simerhèlmu i istanana.

¹¹ Mahalsu ngo sinipido Rajai. Sada kalak poda ndorok mendomi pengidoen i laènken dèbata sembahen, tapi oda i tengah-tengah jelma kalak i merian.”

¹² Mendengkoh i gabè melaga kalohon mo raja i janah memerèntahken asa ibunuh karina simpantasniasè silot i Babel.

¹³ Nai imongmongken mo perèntah idi, janah karina simpantasniasè, termasuk si Daniel bak dengan-denganna itulusi mo lako bunuhen.

Ibagahken Dèbata nipi i bak lapatenna bai si Daniel

¹⁴ Nai idapetken si Daniel mo si Ariokh, èkuten pengabal raja, sienggo kebbas pedalanken perèntah hukumen matè idi. Ikusoken si Daniel mo hanjar tabasa,

¹⁵ kasa enggo iruapken raja i perèntah bagidi mposina. Ibagahken si Ariokh mo bai si Daniel kadè sienggo masa.

¹⁶ Mènter isudu si Daniel mo menghadep raja i janah mengidoken asa iberrè tikki lako peterangken lapaten nipi idi.

¹⁷ Iuèi mo pengidonna idi, nai balik mo si Daniel mi bagesna janah memagahken karina simasa i bai si Hananya, si Misael, dekket si Azarya.

¹⁸ Idokken mo kalak i mersodip taba Dèbata i sorga asa masèh atèna taba kalak i janah memagahken rusia nipi idi. Mula enggo bagi oda nè mo ihukum matè kalak i rebbak dekket simpantas niasè sidèbanna.

¹⁹ Ipas bernginkenna idi ma ibagahken Dèbata mo rusia idi bai si Daniel ibagasen sada alaten. Nai ipoji si Daniel mo Dèbata sini sorga,

²⁰ nina mo, “Bijak ngo Dèbata janah mergegoh, nipoji mo Ia soh sidekkah-dekkahna!

²¹ Ia ngo menettapken mosin bak tikki, Ia ngo mendabuhken bak pebangkitken perkuasa. Ia ma ngo memerèken kebijaken, bak memasu-masuken pengantusien.

²² Ia ngo simemukaken rusia simbages kalohon. Ibettoh ngo karina simasa ibagasen kegellapen. Idomi cuhaya sinterrang ngo ia.

²³ Alè, Dèbata sinisembah empungku, kupoji janah kupesangap ngo ko. Kerna iberèken kono ngo baku kebijaken dekket kegegohen. Enggo iuèi kono pengidoen nami. Janah jabab taba raja i enggo ibagahken kono.”

Ibagahken janah ipeterrang si Daniel nipi i

²⁴ Enggo kessa i laus mo si Daniel mendahi si Ariokh sienggo ipasulak lako memunuh simpantasniasè i Babel. Nina si Daniel mo tabasa, “Ulang mo bunuh simpantasniasè idi. Babai mo aku mendahi raja i, kerna naing ngo aku memagahken taba raja i lapaten nipina idi.”

²⁵ Mènter mo si Ariokh memabai si Daniel menghadep Raja Nebukadnezar ninganna mendokken, “Enggo jupa naposomèn i tengah-tengah kalak Jahudi si buangen idi nai sada kalak sindorok memagahken lapaten nipi Rajai.”

²⁶ Nai idokken raja i mo taba si Daniel sinigeraren ma si Beltsazar, “Ndorok ma ngo ko memagahken baku nipingku dekket lapatna?”

²⁷ Ialoi si Daniel mo, “Alè Raja nami, oda lot kalak simerhèlmu, sipandè mertabas, pengeramal, barang pè sipandè merketika ndorok memagahken tersèngèt idi taba Rajai.

²⁸ Tapi lot ngo Dèbata sinisorga sindorok memukaken karina rusia, janah enggo ibagahken taba Rajai kadè sinaing masa i podi ari. Bagèndari pè, duè mo naposomèn peterangken nipi dekket alaten sinijalo Rajai tikan meddem idi.

²⁹ Tikan sidang meddem Rajai, i ipi Rajai mo pana tersèngèt jaman silako roh. Dèbata simemukaken karina rusia peteridahken taba Rajai kadè sinaing masa.

³⁰ Ibagahken pè rusia ènda taba aku oda ngo kumernaken pandèen aku daripada barang isè pè, tapi asa bettohen Rajai ngo lapaten nipi raja idi dekket asa ibettoh Rajai ma tersèngèt isi perukuren Rajai.

³¹ Bagèen mo alaten siniidah Rajai: Lot mo sada mèjan i lebbè Rajai! Mbelgah kalohon ngo mèjan idi, janah merkillok-killok tapi ntengam kalohon ngo rupana.

³² Ipas emmas tulèn nai ngo takalna, tenten dekket bettekenna ipas pirak nai, abak dekket omba-ombana ipas tembaga nai,

³³ pahana ipas bessi nai janah nèhèna dèba ipas bessi nai janah dèba ipas tanoh dendang nai.

³⁴ Tikan inelnelli Rajai mèjan i, nggulang mo sada batu mbellen i lingling nai, oda kerna lot menjamah, ninganna mendulpang mèjan i serrang nènèhna ipas bessi dekket tanoh dendang idi nai gabè mereppuk mo.

³⁵ Ibas karangkenna i merentuh mo mèjan i janah gabè pulguken bessi, tanoh dendang, tembaga, pirak, dekket emmas sienggo mereppuk codi bagè abu i bekkas penutuen pagè i mosin leggo. Merkabangen mo pulguken i isempulken angin, dungna èlepna poda lotnè tading i sidi. Tapi gabè nasa delleng mo belgah batu simengerumpakken mèjan idi janah mendomi suberri tanoh èn.

³⁶ Bagidi mo nipi Rajai, janah bagèndari pè bagahenkenku mo lapatna.

³⁷ Ukum kènè Raja nami, raja ni karina raja ngo kè; Raja simerkuasana kalohon. Enggo iberrèken Dèbata sinisorga bai Rajai kerajaen ènda, kuasa, gegoh dekket kinihangga.

³⁸ Rajai ngo ipebangkit gabè perkuasa meradepken dunia siniianen jelma dekket nasa manuk-manuk bak binatang sidèbanna. Rajai sendiri ngo takal emmas ipas mèjan idi.

³⁹ Tapi enggo kessa merpunca kuasa Rajai, kèkè nola mo kerajaen sidèbaen tapi oda pella bagè belgah kerajaen Rajai. Kessa i kèkè nola mo kerajaen petelluken imo sinigombarken gombaren tembaga ipas mèjan idi, sinaing mengerajai suberri dunia èn.

⁴⁰ Ipodi nai nola roh mo kerajaen pe-empatken, bagè gegoh bessi. Janah codi bagè bessi mengeremukken dekket menggeppui barang kadè sambing, bagi ma mo kerajaen sipe-empatken ènda mengeremukken dekket menaluken kerajaen sidèbanna i.

⁴¹ Nènèh dekket jari-jari nènèh mèjan sini tanoh dendang idi nai dekket dèba ipas bessi nai, imo memagahken i podi ari merbagi-bagi nola mo kerajaen idi. Mergegoh ngo kerajaen idi kerna mercampur bessi tanoh liat idi.

⁴² Jari-jari nèhè dèba bessi dekket dèba tanoh liat merlapaten ngo i lot ngo dèba kerajaen idi mergegoh lot dèba ndalmeh.

⁴³ Campuren bessi dekket tanoh dendang i memagahken ma ukum kerajaen idi merusaha ngo bakunè asa mergegoh merkitè mersiberruen, tapi magosia ngo sinibaing kalak i, codi bagè bessi i ma ngo oda ndorok mersada dekket tanoh dendang.

⁴⁴ Tikan ipas pemerèntahen raja-raja idi, ipejengjeng Dèbata sinisorga mo sada kerajaen si menengteng soh mi amman sumendah janah oda tertaluken barang bangsa apaina pè. Kerajaen idi mo menggeppui karina kerajaen sidèbanna i.

⁴⁵ Otang enggo idah Rajai oda pella lot isè mendegges, nggulang ngo sada batu i lingling nai ninganna mendulpang janah mengerepuk mèjan bessi tembaga, tanoh liat, pirak dekket emmas idi? Dèbata sintèmbul i ngo petararken taba Rajai kadè sinaing masa i podi ari. Kettoken ngo nipi idi janah tuhu ngo keterangenku idi.”

Si Daniel menjalo upah bai raja nai

⁴⁶ Nai sujud mo Raja Nebukadnezar i lebbè si Daniel janah memerèntahken asa ipesangap si Daniel janah ipèlèken bana pèlèen situtungen bak pèlèen-pèlèen sidèbanna.

⁴⁷ Nina Raja i mo, “Tuhu-tuhu ngo, alè Daniel, Dèbatamu idi ngo simbelgahna kalohon ibas karina Dèbata silot idi nai. Ia ngo raja karina raja, janah simemukaken karina rusia. Kubettoh i kerna ndorok kono peterangken tersèngèt rusia ènda.”

⁴⁸ Kessa i iberrèken mo bai si Daniel pangkat ndates, ibasa-basaken mo bana mbuè upah merandal-merandal, janah ipebangkit mo ia gabè gubèrnur Babel, janah ibakinken mo ia gabè èkuten karina pemernoi istana.

⁴⁹ Tapi merkitè pengidoen si Daniel, iberrèken raja i mo pemerèntahen propinsi Babel idi taba si Sadrakh, si Mesakh, dekket si Abednego, ukum si Daniel merian i istana raja i ngo ia.