Daniel 12 - LAPIHEN SIMBADIA DEUTEROKANONIKA

Punca jaman

¹ Idokken malaèkat simerpakèen kaèn linen idi nola mo, “Tupung katika i taridah mo roh malaèkat mbellen Mikhael simenjamoti bangsamu. Nai lot mo masa kepersuken siso lot codina kessa nai lot bangsa-bangsa. Tapi ipaluah ngo karina kalak ibas bangsamu nai, sienggo tersurat gerarna ibas bukku Dèbata.

² Mèduk ngo ibas kalak sienggo matè bai kalak i nai gabè nggelluh nola; dèba iakapi mo nggelluh simenettap, janah dèba nai iakapi mo kinilèa bak kinipersah soh sidekkah-dekkahna.

³ Mercuhaya mo abè karina pemimpin simpantas codi bagè cuhaya langit. Janah mercuhaya mo abè kalak i sienggo memeddahi nterrem kalak lako mengulaken selloh dekket ntèger codi bagè bintang-bintang soh mi sidekkah-dekkahna.”

⁴ Nai nina malaèkat idi nola dèng ma mo taba aku, “Alè Daniel, tutup mo bukku idi bagèndari, janah bakin mo capna asa dak tong tertutup soh seggen. Mèduk ngo kalak mencuba lako memerèso kadè simasa. Tapi magosia ngo karina kelejaen kalak i.”

⁵ Nai kuidah nola mo dua kalak anak laki. Sada kalak cènder i biding laè kettan èn, janah sisada nai i biding laè kettan adonang.

⁶ Mengkuso mo sada kalak taba sicènder terjolmiten kan takal laè, “Ndigan ngo asa merpunca karina kelengangen simasa èn?”

⁷ Ipekèkè kalak sidèban sisada nai imo tanganna mi langit. Kudengkoh ngo ia merbulaban merkitè gerar Dèbata simenettap i janah mendokken, “Merdalan ngo karina simasa i sidekkah tellu sitengah tahun. Enggo kessa pul tikki pedersa-dersaken bangsa Dèbata mentadi ma mo kelengangen-kele- ngangen lègan simasa idi.”

⁸ Kudengkoh ngo karina sinidokkenna i, tapi laju oda kuantusi. Nai kukusoken mo, “Tuan nami, bakunè ngo persalpunna ènda karina?”

⁹ Ialoi ia mo, “Laus mo ko bagèndari, Daniel, kerna kennah boninken janah rusiaenken ngo karina rana ènda soh punca jaman.

¹⁰ Mèduk ngo kalak ioji janah itingtingi. Laju ngo oda satdar ukum kalak jahat janah dak pukpuk mengulaken jahat; pellin kalak bijak ngo kessa mengantusi.

¹¹ Mulai ipettadi pèlèen sigennep ari i nai janah ipajek nola simemaing mengerri-ngerri kalohon sinigeraren Kejahaten memaing kememago, masa mo i 1.290 ari.

¹² Sayurntua ngo kalak i si dak merukur setia soh mi ari pe 1.335 ken.

¹³ Kono pe Daniel, bujur mo ko soh mi puncana. Matè ngo ko, tapi kèkè nola ngo lako menjalo upahmu i ari punca jaman.”