Daniel 11 - LAPIHEN SIMBADIA DEUTEROKANONIKA

¹ Ia ngo ipasulak lako mengurupi dekket mempebèlai aku i tahun perlebbè pemerèntahen si Darius kalak Media idi.

² Janah kadè sinaing kubagahken bamu tuhu ngo i.” Nina malaèkat idi mo, “Tellu raja sidèban nola memerèntah Persia, iuduti raja si peempatken terbèaken daripada sidèbankenna i. I kinitondel kuasana bak kinibèakna, mersiasangen gegoh mo ia dekket kerajaen Junani.

Kerajaen Mesir bak Kerajaen Siria

³ Nai kessa i kèkè nola mo sada raja simergegoh kalohon. Iperèntah ngo sada kerajaen mbellang kalohon janah ibaingken ia mo guru dokna.

⁴ Tapi i kinitondel ketermurmurenna, mpustak mo kerajaenna janah terbagi-bagi gabè empat kerajaen. Raja-raja siso pemparenna nola mo memerèntah singkatna, janah oda ngo bagèsa gegoh kalak i.

⁵ Makin mergegohna mo Raja nagerri Selatan. Tapi lot mo sada kalak ibas pakalima-pakalimana nai mergegohen daripada ia, janah ia mo memerentah kerajaen simbelgahna nola dèng.

⁶ Enggo kessa barang piga-piga tahun nola mersada taki mo raja nagerri selatan dekket raja nagerri utara janah pejahèken berruna dekket raja nagerri Utara i. Tapi oda ngo ndekkah peralè-alèen kalak idi, janah ibunuh mo berru raja i, bagi ma sinibalèna dekket dukak-dukakna dekket karina hamba simenaruhkensa.

⁷ Oda ndekkah kessa salpun i gabè raja mo sada kalak ibas sisimpangaen dekket berru raja i. Juhapenna mo tenterra raja nagerri utara, mengelentem bèntèngna janah menaluken kalak i.

⁸ Tikan balik ia mi Mesir, iembah mo gana-gana sembahen musuhna dekket perkekkas emmas bak pirak sienggo ipèlèken bai sembahen idi. Lot ngo barang piga-piga tahun dekkahna oda nè ijuhap raja nagerri utara.

⁹ Nai kessa i nola ilentem raja nagerri utara mo nagerri selatan, tapi talu ngo ia ibakin janah balik mi nagerrina sendiri.

¹⁰ Nai ikebbasi dukak-dukak raja nagerri utara nola ma mo lako mergeraha janah lako memaing bala pergunggung nterrem kalohon. Kebbas mo sada kalak ibas kalak idi nai merjuhap codi bagè laè mengeraja. I perjuhapen pedua kaliken ilentem mo bèntèng musuh.

¹¹ Nai melaga mo raja nagerri selatan, janah kebbas mo ia berkat mi pergerahaen mengalo raja nagerri utara. Merhasil ngo ia menaluken tenterra mbuè kalohon siniuluken raja nagerri utara.

¹² Nai gegah mo ia kumerna kemenangenna idi dekket kerna enggo ipatèken ia mbuè musuh, tapi oda ngo terrus ia merkuasa.

¹³ Pedua kaliken ipepulung raja nagerri utara nola ma mo nuhnuhen nterrem kalohon, janah nterremen dèng daripada siperlebbè. Mula dapet kessa katikana, kèkè mo ia merdalan rebbak dekket tenterrana simbuè i dekket bekkel mbuè kalohon.

¹⁴ Nai mèduk mo jelma memberontak taba raja nagerri selatan. Janah lot mo barang piga-piga kalak kejam i bangsamu nai, alè Daniel, memberontak ma kerna enggo idah kalak idi sada alaten. Tapi sondat ngo taki kalak i.

¹⁵ Kessa i nola ikubu raja nagerri utara mo sada kuta merbèntèng janah mengerampas kuta i. Oda ngo tellap tenterra nagerri Selatan mertahan, janah soridadu-soridadu sinipilihna pè oda terbaingsa nèngè mengalo.

¹⁶ Guru dok raja nagerri utara ngo ibahanken oda lot peraloen cituk pè. Irajai mo tanoh simerandal i janah ikuasai.

¹⁷ Nai ikebbasi raja kan nagerri utara nai nola mo karina soridaduna lako menjuhap nagerri selatan. Nai dok atèna merkitè mengerajai karina kerajaen musuhna, bakinenna mo dos arih dekketsa janah ipejahèken mo berruna taba raja Mesir idi; tapi sondat ngo takina idi.

¹⁸ Enggo kessa bagi ijuhap mo bangsa-bangsa sinibiding laut, janah mèduk ngo italuken. Tapi ipettadi sada kalak huntuen nagerri sidèban mo pengelèai sinibakinna idi, nai gabè ibalesken mo pengeleaenna idi mendahisa.

¹⁹ Mermulaken mo raja nagerri utara idi mi bèntèng-bèntèng nagerrina sendiri, tapi italuken ngo ia janah oda lot nè berita tersèngèt mi dirina.

²⁰ Isingkat sada kalak raja nola mo ia sipasulakken pugabèna kejam lako pepulungken belasting merkitè paksa lako menambahi kinibèak kerajaenna. Ibas katika terudu, kenna bunuh mo raja i, mboni-mboni janah oda ma tupung geraha.”

Raja nagerri utara jahat i

²¹ Nina malaèkat i nola dèng ma, “Raja sidèbanna nola mengerajai nagerri utara imo sada kalak simerlèa siso merhak gabè raja. Tapi roh ngo ia siso èdep janah mengerampasi kuasa raja merkitè akkal-akkalna.

²² Nasa tenterra simengalosa, uè, salang Imam Huntuen pè, ilentem mbersih janah isalpuni.

²³ Iselbuh ngo karina perpadanen sirembaru dèng ibakin meradepken bangsa-bangsa sidèban. Janah makin mergegohna mo ia, tukasi pè pellin nagerri kèdèk sambing sinirajaenna.

²⁴ Merkitè kebècukenna ijuhap mo karina ladang nggabur tanohna tikan ibagasen mènak pengakap jelma sinisidi. Ibakinken ngo kadè siso nung dèng ibaing empungna. Nai ipempellaken mo taba kalak simenoatsa karina ugasen sinirampasna dekket kinibèak sidapetsa ibas pergerahaen. Ibakin mo siasat lako menjuhap bekkas-bekkas si merbèntèng, tapi ndor nè mo salpun tikkina.

²⁵ Nai ibagasen keberanien ipepulung ia mo tenterrana mbuè kalohon lako menjuhap raja nagerri Selatan sienggo kebbas ma naing mengalosa merdengngan tenterra mergegoh janah nterrem kalohon. Tapi oda ngo ndorok mertahan raja nagerri selatan kerna iselbuh ngo ia.

²⁶ Pemernoina sinjolmitna kalohon bana ngo mendabuhkensa. Mèduk kalohon ngo soridaduna terbunuh, janah kerri ngo isapu soridaduna.

²⁷ Nai rebbak kundul mo raja sidua i i sada meja janah rebbak mangan, tapi jahat ngo taki kalak i, janah mersiakkalen ngo kalak i kacimbang mbellahna. Tapi sontar ngo taki kalak idi, kerna mak dèng jupa katikana.

²⁸ Nai balik mo raja i nagerri utara nai mi nagerrina merembah karina ugasen sinitabanna. Mertaki ngo ia lako pepatèken agama sinièkutken bangsa Dèbata. Guru dokna ngo ibahanken nai balik mo ia mi nagerrina sendiri.

²⁹ Nai kessa barang sadikè dekkah ijuhap nola ma mo nagerri selatan, tapi laèn ngo pengkerohkenna daripada siperlebbè i nai.

³⁰ Kerna roh ngo kalak Rom merdengngan keppel kalak i i Siprus nai janah menjuhapsa, nai gabè buradan mo ia. Nai naing balik nola ngo ia merdengngan seggat kalohon janah merusaha mematèi agama bangsa Dèbata. Peddah kalak sienggo murtad ibas agama idi nai nola mo ièkutken.

³¹ Nai ipasulak mo nuhnuhen tenterrana lako mengelamuni gerar Bages Jahowa. Naing ipatèi kalak i ngo pèlèen si gennep ari janah pecèndekken nola simaing mengerri-ngerri sinigeraren Kejahaten memaing kememago.

³² Nai merkitè akkal-akkal raja i iendik-endik mo kalak sienggo menadingken agamana i, asa uè mengurupisa. Tapi kalak simerpenguèi taba Dèbata pang ngo mengalosa.

³³ Mèduk ngo kalak gabè satdar ibaing kalak si bijak menguluken jelma nterrem. Tapi barang sadikè dekkahna, kenna bunuh ngo tah piga-piga kalak bai kalak idi nai kumerna geraha barang kerna api, janah barang piga-piga kalak nai isamun ngo janah itaban.

³⁴ Sinderrang masa pemunuhen idi, dapet pengurupien mo cituk bangsa Dèbata, tapi mèduk ngo kalak pedemuken dirina bai kalak i pellin menarihken keperluenna sendiri.

³⁵ Kenna bunuh mo dèba ibas èkuten simpantas idi nai, tapi merumangken pengojien ngo idi bai bangsa i asa gabè mpanting kalak i. Masa ngo bagi soh mi punca jaman, imo tikki sienggo itentuken Dèbata.

³⁶ Guru dokna ngo ibahanken raja nagerri utara. Merdengngan ndates ukur ngo ia mendokken belgahen ngo ia daripada dèbata apaina sambing pè, janah dèng belgahen daripada Dèbata Pergegoh Sisotercodi i. Terbaingsa ngo memaingken bagidi soh merujung laga Dèbata. Kerna kadè kin sienggo itentuken Dèbata kennah ngo i lebbèken saut merdalan.

³⁷ Oda isuihken raja i barang sembahen paina pe sinisembah empungna simengusurkensa bang sinisembah daberru pè. Karina dèbata-dèbata idi oda ipaduliken kerna iètong ngo dirina belgahen daripada kalak idi nai.

³⁸ Baliksa, dèbata siso nung isembah empungna nola ngo ipesangap, imo dèbata pengondingi bèntèng-bèntèng. Ipèlèken ngo emmas, pirak, permata bak pèlèen simaharga sidèbanna taba dèbata siso nung dèng isembah empungna.

³⁹ Ipilih ma mo kalak simenembah dèbata sidèban i, lako mengkubu bèntèng-bèntèng si ntegguh. Barang isè kalak simengakui dèbata idi iberèken mo bana kesangapen mbellen dekket pangkat ndates bak tanoh sikira upah.

⁴⁰ Mula enggo kessa naing jupa punca kuasa raja nagerri utara, ijuhap raja nagerri selatan mo ia. Nai ibales raja nagerri utara ma mo geraha idi mertuhu-tuhu. Ipasulak ia mo kurèta perang mbuè kalohon, kuda dekket keppel. Juhap mo ia bagè perroh laè mengeraja, janah menaluken mbuè nagerri ndèba.

⁴¹ Baliksa tanoh simerandal i pè ilentem ngo, janah merpuluh ribu ngo jelma ibunuh. Tapi ukum kerajaen-kerajaen Edom, Moab, dekket bekkas siperluna ibas kerajaen Amon maluah ngo.

⁴² Tikan italuken karina kerajaen idi, kerajaen Mesir pè oda ngo mpellut.

⁴³ Irampasi mo harta kalak Mesir merrumangken emmas, pirak bak harta sidèban simaharga kalohon. Iurupi kalak Libia bak Sudan ngo ia.

⁴⁴ Nai tersengget mo ia ibaing berita i kebincaren dekket utara nai, nai gabè mergeraha tuhu-tuhu mo ia janah memunuh mèduk jelma.

⁴⁵ Baliksa ipajek mo undung-undung kerajaenna i kellang-kellang laut dekket delleng bekkas Bages Jahowa. Tapi enggo kessa i nola matè mo ia janah sada kalak poda lot mengurupisa.”