Daniel 10 - LAPIHEN SIMBADIA DEUTEROKANONIKA

Alaten si Daniel i Laè Tigris

¹ I tahun petelluken pemerèntahen Raja Kores mi aur Persia, roh mo sada tennah mendahi si Daniel sinigeraren si Beltsazar. Tuhu ngo tennah i, tapi mahal kalohon antusen. Tikan itaki lako mengeradum-radumisa ijalo si Daniel mo keterangen tersèngèt lapaten tennah idi ibagasen sada alaten.

² Ipas katika i tupung ngo aku mertapa suntuk tellu minggu.

³ Sidekkahna i oda ngo aku mangan pangaen merasa barang pè gulè; oda kuènum anggur, janah oda ma mersori.

⁴ I ari duapuluh empat bulan perlebbè tahun idi, tupung ngo aku cènder i biding Laè Tigris si mbellen i.

⁵ Dorgak mo aku, nai kuidah mo sada kalak memakè oles linnen dekket tali abak ibas emmas tulèn nai.

⁶ Merkillok-killok ngo dagingna codi bagè permata, abèna bagè nterrang cuhaya pellian, janah matana merbendella bagè api. Betekken bak nèhèna merlinang codi bagè tembaga siniogos, janah sorana terbeggè bagè sora jelma nterrem.

⁷ Pellin aku sadaku ngo kessa mengidah alaten idi. Kalak si rebbak dekket aku pè oda ngo idah, tapi buradan ngo kalak i gabè mperrus janah ciboni.

⁸ Itadingken kalak i ngo aku i sidi sadaku, ninganna mendatèken alaten simemaing tersengget idi. Enggo ngo oda nè aku mergoldè janah abèngku pè gabè melangan.

⁹ Tikan kudengkoh sorana, jemba mo aku pangsan sanga tangkep mi tanoh.

¹⁰ Nai lot mo tangan menjamah aku janah memaingken aku kèkè ninganna tutongkel mi tangan bak tèunku.

¹¹ Idokken malaèkat i mo taba aku, “Alè Daniel, ikekelengi Dèbata ngo ko. Kèkè mo kono janah cènder mo ninganna dengkohken mo ranangku ènda selloh. Enggo ipasulak aku mendahi kono.” Tikan idokken ia bagidi, cènder mo aku ninganna menggirgir.

¹² Nai nina mo taba aku, “Alè Daniel, ulang ko mbiar. Enggo idengkohken Dèbata sodipmu mungkah ari perlebbè ibaingken kono keputusen lako pecerepken dirimu asa gabè bijak. Enggo roh aku mengaloi sodipmu i.

¹³ Ialo malaèkat pengondingi kerajaen Persia ngo aku sidekkah duapuluh sada ari. Nai roh mo si Mikhael, sada ibas pengulu malaèkat idi nai mengurupi aku. Kutadingken ngo ia i sidi, i Persia.

¹⁴ Roh ngo aku lako memaingken asa ibettoh kono kadè sinaing masa seggen bai bangsamu. Alaten ènda imo tersèngèt ari sinaing roh.”

¹⁵ Tikanna idokken bagidi, tungkuk mo aku janah oda ndorok mongkam.

¹⁶ Nai kessa i idoroken malaèkat sibagè rupa jelma i mo tanganna janah mendegges bibirku. Ningku mo mbangsa, “Tuan nami, posek ngo kuakap ibaing alaten ènda gabè maknè kuakap aku mergoldè.

¹⁷ Codi bagè sada kalak hamba ngo aku sicènder i hadeppen tuanna. Bakunè kin mo perndorokna aku mengerana taba Tuan i? Kerri ngo gegohku janah posek kessahku.”

¹⁸ Nai ijamah mo aku sikali nai, nai kuakapken mo makin tambah gegohku.

¹⁹ Nina mo, “Masèh ngo atè Dèbata bamu, kerna i ulang mo ko mbiar janah buradan, ita, gegohi mo!” Sinderrang idokken ia bagidi, kuakapken mo muat mergegohna nola aku janah ningku, “Mengerana mo ko, Tuan. Enggo itambahi Tuan i gegohku.”

^20-21 Nai ialoi mo, “Ibettoh kono ma ngo kasa aku roh mendahi ko? Maksudna imo lako memagahken bamu kadè sitersurat ibagasen Bukku Kesèntengen. Bagèndari pè kennah ngo aku balik lako mergeraha mengalo malaèkat pengondingi Persia. Enggo kessa i roh nola mo malaèkat pengondingi Junani. Oda lot simengurupi aku laènken si Mikhael, malaèkat pengondingi Israel, negaramu.