Rasul 19 - Taterisi Uwa Sanbagirmana Ibirmiserem

Paulus kota Efesus je jep nasowena.

¹ Apolos jei kota Korintus je jep nwini. Ane Paulus jei ga aa sofwa jei fistamer jam sofweyan, jamere kota Efesus je aa forna. Jepga angtane Yesus aa jei ne tebanaram afweraiserem ga damtabili.

² Paulus jei angtane jeiserem ga aa tenebaabili, “Mafnana Uwa Sanbagirmana ke mes jela imnibe, aamei Taterisi Uwa Sanbagirmana igalaba taayibenerem?” Jei enggam ga aane tamawolbana, “Gemerje. Ai ajama sarbiyen, Mafnana Uwa Sanbagirmana afa ba aare.”

³ Jepga Paulus ga tenebaabili, “Ke gam, aamei ibasa taabili aamei is galap ne baptistababilirim?” Ga aane tamawolbana, “Ai taterisi Yohanes aa jes nasbilirim ga jes aya taabili.”

⁴ Paulus ga balbabili, “Angtane Yohanes aa jes baptistababilirim, jei ga jam ne gwerauwulf enggame angtane jeiserem mes ge tikwebili etam-etama kapkaiserem jewer. Jes galapserem Yohanes jei angtane Israelmana gamjon enggam ga balbabili, ‘Aamei bunarsusfer Angtane am amnuwer aa Jei fortyaram, Jei ga jam isa tebana. Angtane jeiserem ga Yesus.’ ”

⁵ Jame aa galap ne sarbilirim taterisi jeiserem, jei ga aane baptistababili bosna Tuhan Yesusmanaiserem jeme.

⁶ Paulus tafna jame aa galap tosonswenaram jem sagabe, Mafnana Uwa Sanbagirmana ga iretya jem sagabe. Jepga jei aa ge nasbawena ula jei jener jam ne towaswebiyeneiserem jeme, ane taterisi Uwa Sanbagirmana ga aane nasbili.

⁷ Angtane jeiserem unggwanfer engbar ga enggammer dua belas.

⁸ Muara ga nawer-ningna Paulus jei jeber-jeber gwiwena jena angtane Yahudimana aa jep ge betwebuwefaram jebe, jei jam ereyen angtanefar jam ge nasowefe. Jei uskambar enggam ga balbabili, “Seyafter ai ibe isa agemer towas-towasulminirim nunu aaiserem jem temawer, nunu Uwa Sanbagiri Jei aa jem nwiniserem anggwabura seyafter gemerserem jem Sanbakfe, seyafter jeiserem ba bunaram.”

⁹ Angtane afwer imwana jemna mat, jei bai Yesus jam ne tebafe, ane jei syefer ge nasbawena nele Tuhanmanaiserem jem temawer angtane unggwanfer jem nwenap. Jega jem temawer, Paulus angtane jeiserem ga mirtebitefala, ane angtane aa jei ne tikwebaatinennerem jebar ga aa ge sofobili. Ane nunu jeber-jeber jei ga aa ge nasbawena jena unggwandusa Tiranusmanaiserem jebe.

¹⁰ Jei taterisi jeiserem jamer nasbuwelabe tahunu ga naura. Jepga angtane aa jei ge nwinbenerem propinsi Asya je seyafter gemerserem, jei ga aane sarbili taterisi Tuhanmanaiserem, angtane Yahudimana mese ane angtane Yahudimanyan.

Eskewam tanen mesna

¹¹ Paulus ga bwembwema waakena ga jem eyebaabili baabeta Uwa Sanbagirmanaiserem jeme.

¹² Jepga angtane lenson afa sof ambona jem taamuwiliserem Paulus gwanan aa jes gwelaawilirim, jei fene jeiserem angtane bwernabaraiserem jep ga aane eripmuwena, ane bwerna ga aa ge barweipmini, ane bwat kapkaiserem ga aa ge toyipmititye angtaneminiwer.

¹³ Ane angtane Yahudimana unggwanferyan ona jeiserem jep ge wofebili, ane jei bwat kapkaiserem ga aane surbobili. Jepga jei enggam ga aa ge gubili bosna Tuhan Yesusmana jes sa bilibene, ane bwat kapkaiserem gase totintye. Angtane Yahudimana jei bwat kapkaiserem ga aane balbabili enggame, “Ai imsa balbabili, bosna Yesusmanaiserem jem Paulus aa jes nasbanaram, sa totinye!”

¹⁴ Imam sanbagiriserem bosna jemna Eskewa, ane tane jemna ga tuju. Tantantane tuju jeiserem jei bwat kapkaiserem jam ne surbobif jes gemerserem.

¹⁵ Jengga bwata kapkaiserem ga enggam gunu. “Yesusba amsam towaswebana Jei baabetabara, ane Paulus amsam sarbana jei mese jei baabetabara, jengga aamei ai teisyena aamei baabeta fas.”

¹⁶ Ane angtane bwat kapka aa jei kabwanaram jei ga aa fagawa, ane tantantane tuju jeiserem ga aa saftabana seyafter. Jewer ga jei ga aa ge nunggirbene jenawer, jei ilyak-ilyaksamer ga aa ge nunggirbene, tifni jemna bubwana ga anesus.

¹⁷ Angtane Yahudimana ane angtane Yahudimanyan kota Efesus aa jei ge nwinbenerem, taterisi jeiserem jam aane sarbilirim, jei seyafter ga aa ge erebili, ane bosna Tuhan Yesusmanaiserem unggwanfer ga aane gulbatena.

¹⁸ Angtane unggwanfer Yesus aa jei ne tebanaram, jei ga aa ge jalbuwena angtane unggwanfer jepserem jem tarnabe. Ane etam-etama kapka jei gwanan aa jes ne eyebuwenantam, jei ga aane balbabitowena.

¹⁹ Angtane faatrewabaraiserem jei bukunu jemna ga aane erebuwena, ga aane giranbaabisini angtane unggwanfer jem nwenabe. Buku hargana jeiserem ga enggammer 50.000 doi perak.

²⁰ Jega jem temawer taterisi Tuhanmana ga aane nasibenenne ona seyafter gemerserem jebe. Ane angtane unggwanfer gamjon Yesus ga aane tebana.

Angtane unggwansusfer kota Efesus je kakalmer ga aa ge tetenbuwena.

²¹ Seyafter jeiserem taban, Paulus ga gunu “Ai ajam sofwef kota Yerusalemwer, propinsi Makedonya ane Akaya ga jeter as ayenni.” Jei ga gamjon gunu, “Sofwera jewer taban, ai kota Romawer mese jewer ajam sofwef.”

²² Angtane naura bosna Timotiuso Erastus, Paulus aa jei ge batobanaram, Paulus ga jes bafsona propinsi Makedonyaminip ge sofwefe, ane jena ga propinsi Asya ga jep nwini.

²³ Jes galapserem kota Efesus je ula jebe ga kabwakfersus ga fala Nele Yesusmanaiserem jem temawer.

²⁴ Angtane bosna Demetrius, jei apgal jigala perakawer ga jei eyebaabuwena. Jei ja tantane ga perakawer eyebaabili, jam domolabe ga jena unggwandusa galserem patung Artemis ga jem mwonap fiton. Awelna jei aa jes gwebilirim jemna doini ga anesus, ane angtane awelna aa jebar ne gwebilirim, jei mese doini unggwanfer ne tebabili.

²⁵ Jei angtane nafsi ga jenbebili, angtane apgal jigala perakawer aa jei ne eyebaabuwenaram. Jei ga balbabili, “Am afelen mesna, aamei imsa towaswena nei doini uskambar neya damtabuwena awelna aaiserem jewer.

²⁶ Aamei samfer iner isa sarbili ane ga isa domola, Paulus aa jes eyebilirim. Paulus jei angtane mes towas-towastababili, ane angtane unggwanfer ini jemnaiserem jes gwebaipmini, aaf kota Efesus je, ane propinsi Asya seyafter jebe. Jei enggam gunu angtane perak apgal jigal tafam eyebiliserem, jeba anggwafwaryan.

²⁷ Aaiserem kapka, afa awelna nemnaiserem bosna kapka jam se domolaram. Ane gam ke awelna nemanfenna tefner, jengga jena anggwafwar Artemismanaiserem jes mese bosna kapka se domola. Ane angtane jei gamjon jam ge gubiyen enggame, ‘Jena jeiserem unggwandusam.’ Anggwabura Asya ane angtane ogiri seyafter gemerserem jei Artemis ga aane pujitene. Galap jemna unggwan-gwanaiserem je gase barwebana.”

²⁸ Angtane unggwanfer jepmanaiserem jei taterisi jeiserem jame aa galap ne sarbilirim, witifini jemna uskam-uskamsusfer ga aa ge folbamini, ane jei ga aa ge tetenbuwena enggame, “Angtane Efesusmana jemna anggwafwar Artemis unggwandwasusu.”

²⁹ Jepga angtane seyafter kotana jepmanaiserem kakalmer ga aa ge tetenbuwena. Ane angtane uskambar jeiserem jei Gayus ane Aristarkus, ga aane taamini. Jei nawersamer propinsi Makedonyawer ge jela. Ane angtane naura jeiserem jem afelna ga Paulus jei aa jebar ge wofobuwenaram. Angtane uskambar jeiserem jei angtane naura jeiserem ga aane afsofala angtane kakala unggwanfer aa jep betwenaram jebe.

³⁰ Paulus jei jam gwif angtane unggwanfer jepserem jem tarnabe enggalfe, jelem afelna nauna jeiserem jam batomif. Jengga angtane Yesus aa jei ne tebanaram jei enggam ne bala, “Wowo, aamei jewer ijam gwiyan.”

³¹ Angtane sanbak-sanbaka propinsi Asyamana, Paulusem afelen mesnaiserem, jei angtane ga aane nasbabisiwena enggame, “Paulus sa bal, jei angtane unggwanfersus aa jep ge betwebilirim tampata jeiserem jebe, jei jena jep jam gweretayan.”

³² Jes jepserem angtane uskambar aa jei ge betwebilirim jebe, jei ga aa ge tetenbuwena unggwanfer. Jei seyafter nafis-nafismer ge tetenbuwena. Ane angtane afweraiserem jei teisyena jei bas ne betwebili.

³³ Jepga angtane bosna Aleksander, angtane Yahudimana ga jes ne taatwebana enggalfe gam jalf, angtane uskambar jepserem jem mukanap gam nasowef. Jepga Aleksander jei mukanap ga fyatena, ane tafna ga tetena, ane jei angtane unggwanfer jeiserem ga balbabili enggame, “Angtane Yahudimana jei kapkaiserem fas gam jam ne eyebiyen jega angtane unggwanfer aaiserem ini jemna uskamer jam ge folbamife jeber-jeber jam ge tetenbuwefe.”

³⁴ Jengga jei jame aa galap ge towaswebilirim enggame Aleksander jeiba angtane Yahudimanam, jei engbar jema naura jamer ge tetenbuwelabe enggame, “Angtane Efesusmana jemna anggwafwar Artemis unggwandwasusu.”

³⁵ Jepga pegawai kota jei angtane unggwanfer jeiserem ga balbabili, “Sa tikwe!” Jepga jei ga aa ge tikwebili. Jei ga balbabili, “Wai angtane kota Efesusmana! Angtane seyafter mes ge towaswebili jena anggwafwar Artemismana je kota Efesus aaiserem jep fina. Ane patunga Artemismana jeiserem winsiwer aa jei iretyaram nei nejesa gerabisnenewenaram.

³⁶ Angtane afa jam guyon taterisi aaiserem je ol kabwak. Ane aas jepserem ipsama tetenwenaram! Etam-etam syefer afa tatarmer ijama eyebiyen, gwanan jam isa sarbisnenne.

³⁷ Aamei angtane naura aaiserem imsa afsoyala aafe, jengga jei apgal jigala afa jei jam ge komkomulsiyen jena anggwafwarmanaiserem jewer, ane ula kabwakfer jam ge bilyen anggwafwarmanaiserem jem temawer.

³⁸ Afa Demetrius ane angtane awelna jebar aa jei ne gwebilirim, afa jei ula aaiserem angtane nafsiserem jep jam ne nasipmife, safnant, aas jepserem aafe jam ne nasbiyen. Jei ula aaiserem angtane sanbakaiserem jemnip sene gwirinfele, angtane aa jei gam balaram angtane afa waakenfer eyebiliserem afa kabwakfer eyebiliserem jemnibe. Angtane sanbaka jei jelem kantorap nwinwena nunu jeber-jeber. Jep ga jei jebar ga sene nasbili.

³⁹ Afa ula nafsi ijama nasbife, ula jeiserem ga enggalap isa nasbili, angtane seyafter jam aa jep ge betwebilirim ula nafis-nafsiserem jam nasbabife jamer bar.

⁴⁰ Ula aaiserem jem temawer namwer aas jepserem nei nes namwer engbar sene tamtamtababili, aam temawer angtane pemerinta Romamana enggam galap sege gubili, nei nunu namwer aaiserem jeme nei ne kapkaiserem nejesa eyebili. Ane nei waakenfer nejama tamawolbiyen.”

⁴¹ Jei jam aa galap tabanwenaram jam nasowelabe, pegawai kota jeiserem jei angtane uskambar jeiserem gamjon ga balbabili, “Aamei jasa sofwe!”