YUDAS 1 - KITAB SUCI INJIL

¹ Cina ra angi rawa'u ou ro d̄imeci ra ca'u poda b̄a Ruma Hatalla Ama ndaita, ro d̄i jaga d̄i ru'u Ruma Isa Al Masih. Kai Ada Ruma Isa Al Masih, nahu – Yudas – ari la Yakub,

² mapamao: Raho-raho to'impa Ruma Hatalla mbeina bareka, rahama ro taho ra ntai d̄i nggomid̄oho kai maremba poda.

Guru-guru palasu

³ Cina ra angi ma meci b̄a nahu! Nahu poda-poda ne'eku tunti sura d̄i nggomid̄oho mab̄oha mori salama rasama-sama iu b̄a ndai. Pala ake nahu iuku weki rarundu d̄imangoa ra tei kataho d̄i ru'u b̄a nggomid̄oho kai sura ake loakud̄u nggomid̄oho karawi kapoda ade ntuwumu d̄i ru'u b̄a imbi rambei b̄a Ruma Hatalla sakalimpa d̄i ru'u santoi-ntoina d̄i ela-Na.

⁴ B̄ara kai wati kawara weki b̄a ndai, wara dou-dou ma lu'u kai nari-nari d̄i woha ndai. Siad̄oho dou-dou ma'ipi dab̄ae ma rungkana haba mab̄oha rahama Ruma Hatalla ndaita, d̄i rakakaina ncai d̄i karakakaina ne'e hawa nawasu siad̄oho. Ro siad̄oho tulana Ruma Isa Al Masih, sab̄ua edempa menana Makuasa ro Ruma ndaita. Ra'aipu ntoi wa'una hukuma d̄i ru'u b̄a siad̄oho wa'ura nggahi d̄i ade Alkitab.

⁵ Sara'ana ede nggomid̄oho wa'ura b̄ademu. Pala nahu mane'e ngoa ra kawara nggomid̄oho mab̄oha b̄uneku Ruma Hatalla kasalamana ela Israel rad̄i dana ra rasa Mesir, pala edempara kalelina dou-dou ma wati imbi d̄i woha siad̄oho.

⁶ Kawara raupu mala'eka-mala'eka ma kalalo rakahampa kai hid̄i kuasakai b̄a siad̄oho, ndad̄ina lao tu'u wi'ina hid̄i ngge'ekai siad̄oho. Ruma Hatalla mandantena mala'eka-mala'eka ede kai rante ma'ederahid̄i, d̄i ade hid̄i ma rindi ta awa mai dana. Ta aka siad̄oho rabui santoi-ntoina sampe kamab̄u kai hukuma d̄i siad̄oho d̄i Ainaina ma heba ede peade.

⁷ Kawara raupu kota Sodom ro Gomora ro kota-kota d̄i kompe ra peina, ma ela ra douna makarawi lampa rawi-lampa rawi b̄une rakarawi b̄a mala'eka-mala'eka ede. Siad̄oho karawina lampa rawi-lampa rawi madab̄ae ro masampu ra nggele, ndad̄ina siad̄oho kancoki kai hukuma afi ma ederahid̄i, d̄i kandad̄i kai conto d̄iru'u b̄a samenana dou.

⁸ Ndede rauku dou-dou ede makananu kalao ade sampe siad̄oho karawina dosa d̄i sarumbu ndaina. Siad̄oho ntanda ka'awana kuasa Ruma Hatalla ro kab̄awa ra katunana ma d̄ese ra ntasa mahluk d̄i saroga.

⁹ Ndai Mikhael, ma na'ekaina mala'eka-mala'eka, wati paranana karawi b̄une ede. Aipu wakatu sia cencena lab̄o Ibilis d̄i ade cence ncihina mab̄oha couku d̄imarakana timba la Musa, Mikhael wati disana b̄ab̄ukai hukuma d̄i Ibilis kai nggahi ra eli makab̄awa ra katuna. Mikhael cuma nggahina, ”Ruma d̄imab̄akana nggomi!”

¹⁰ Pala kai nggahi d̄i kab̄awa ra katunakai, dou-dou ede deina sara'a au-au ma wati d̄i loa ka'ao b̄a siad̄oho. Siad̄oho sama b̄une binata-binata ma wati ntau aka, ma b̄ade lampa rawi-lampa rawikai b̄a iuna. Pala b̄ara kai lampa rawi-lampa rawi edeku ma kamaikaina iha leli siad̄oho.

¹¹ Ihara siad̄oho! Siad̄oho wa'ura lampa b̄atuna ncai ralampakai b̄a la Kain. D̄i loakaina raka piti siad̄oho kalu'una weki ndaina d̄i ade hid̄i santudakai, sama b̄une la Bileam. Ro siad̄oho d̄ikaleli rau b̄a one barontana b̄une la Korah.

¹² Wakatu nggomid̄oho katu'umu ngaha ndiha, ruku ra rawi dou-dou ede d̄i ni'ikai ade d̄i woha nggomid̄oho. B̄ara siad̄oho na'e ngaha ra nonana kai wati majana, ro nakapentiku d̄i ru'u ndai mpoana. Siad̄oho b̄une apu ra'ewu b̄a angi, pala wati kalondona ura. Siad̄oho rau b̄une fu'u haju ma wati mbua kone oru wua haju; fu'u-fu'u haju rawa'u wonto amuna ro wa'ura made poda.

¹³ Sama b̄une balumba ma mbani d̄i moti makamaina wob̄ona, ndede rau siad̄oho nakawob̄oku ruku ra rawi d̄i majakai. Siad̄oho eded̄u b̄une ntara ma rai rero ro marawa'u sadia wea hid̄ina b̄a Ruma Hatalla d̄i ade rindikaina ma ipi poda d̄iru'u santoi-ntoina.

¹⁴ Henokh, londo ra mai makapidukaina rad̄i la Adam, ntoina wa'ura karonggana nggahi ra eli Ruma mab̄oha dou-dou ede. Nggahi la Henokh, ”Tiopu, Ruma d̄imamai lab̄o riwu-riwuna mala'eka-Na ma raso

¹⁵ d̄i paresakai ncihi ra ncara sara'ana dou. Ruma d̄imahukumna dou-dou madab̄ae b̄ara ruku ra rawi siad̄oho ma dab̄ae. Ro Sia d̄imahukumna dou-dou madosa ro durhaka b̄ara samenana nggahi ra eli makab̄awa ra katuna rarentana.”

¹⁶ Dou-dou ede naca'u bada red̄e ro nakancaraku dou makalai. Siad̄oho mori b̄atu rakane'e siad̄oho ma dosa. Siad̄oho nanuntu piko b̄oko mab̄oha weki ndaina, ro gisina dou loakud̄u rakakaina laba.

Ngoa ra kawara ro ngoa ra tei kataho

¹⁷ Pala cina ra angi ma meci b̄a nahu, kawarapu, au rantoina ranggahi b̄a rasu-rasu Ruma ndai Isa Al Masih.

¹⁸ Siad̄oho ngoa ulu wa'una d̄i nggomid̄oho b̄a one d̄eni cumpukai jamana d̄imawontu dou-dou d̄imakasungge-sunggena nggomid̄oho, eded̄u dou-dou ma mori b̄atu ne'e siad̄oho ma dosa.

¹⁹ Siad̄oho edeku dou-dou ma kamaikaina ncengga ra mbi'a. Siad̄oho wati kuasakai b̄a Roh Allah, malaisi b̄ara kane'e tabe'a dunia.

²⁰ Pala nggomid̄oho, cina ra angiku, kataho ncaupu morimu kai dasa imbimu d̄i Ruma Isa Al Masih. Imbimu ede nawancuku rasona. Wunga mbuipu ede do'apu kai kuasa Roh Allah,

²¹ ro mori ncaupu d̄i ade d̄ende ra wa'a b̄a Ruma Hatalla salama nggomid̄oho ngenamu rahama Ruma Isa Al Masih Ruma ndaita, d̄imambeina nggomid̄oho mori masapodakaina ro ma'ederahid̄i.

²² D̄iru'u b̄a dou-dou ma mbali mbua adena, pab̄uaku nggomid̄oho katadamu kasi ade.

²³ Hinti kalosapu dou rad̄i ade afi d̄i kasalamakaimu siad̄oho. D̄i ru'u b̄a dou-dou makalaina pab̄uapu nggomid̄oho katadamu kasi ade lab̄o kai iu dahu, pala aina ca'umu kone kani ro lombo siad̄oho rau ma wa'ura kasampu kai rakane'e b̄a siad̄oho ma dosa.

Do'a roi ra wadi

²⁴ Ruma Hatalla ma sanggo jaga loakud̄u nggomid̄oho aina mab̄umu, ro ma wa'una wa'a nggomid̄oho d̄i tando-Na ma d̄ese ra ntasa kai neo ade lab̄o wati wara ma'iha,

²⁵ Sia sab̄uampa menana Ruma Hatalla, Makasalamana ndaita kai ncai Isa Al Masih Ruma ndaita. Siaku Ruma Hatalla ma d̄ese ra ntasa, mana'e ra ntoru, tau kuasa ro mawibawa ra'aipu ntoi wa'una sampe ake ro d̄i ru'u b̄a santoi-ntoina. Amin.