MATIUS 16 - KITAB SUCI INJIL

Dou-dou Farisi rahona Ruma Isa karawi lampa rawi mab̄isa ra guna

¹ Wara pila-pila dou Farisi ro dou Saduki maina d̄i Ruma Isa b̄a ne'ena b̄ab̄u Sia. Siad̄oho narahoku Sia karawi lampa rawi mab̄isa ra guna d̄ibukutikaina b̄a one Sia ramaina ta Ruma Hatalla.

² Cambe b̄a Ruma Isa, [”Nggara liro mawunga nci'i, nggomid̄oho manggahiku, ’Taho ai ra liro, b̄ara kala langi.’

³ Ro d̄i aimasid̄i, nggomid̄oho manggahiku, ’Ainaina ake namai ura, b̄ara kala langi ro had̄i ai.’ Io, nggomid̄oho maloaku takasi ai ra liro kai edamu ka'ada'ana langi, sapodakaina tanda-tanda jamana wati loamu takasi b̄a nggomid̄oho!”]

⁴ ”Nawancuku dab̄ae ra duruhakana dou-dou jamana ake. Nggomid̄oho marahoku Nahu karawi lampa rawi ma b̄isa ra guna. Nggomid̄oho wati d̄i mbei kone sab̄ua b̄isa ra guna rau: selasi b̄isa ra guna Nabi Yunus.” Sawa'u b̄a nggahi ndedena Ruma Isa lao tu'u wi'ina siad̄oho.

B̄uha dou-dou Farisi ro dou-dou Saduki

⁵ Wakatu anamori-anamori Ruma Isa ronggana ipa b̄ae b̄a ndano, ampona b̄ade b̄a siad̄oho b̄a one siad̄oho nefana wa'a roti.

⁶ Nggahi Ruma Isa d̄i siad̄oho, ”Aina kabare d̄i b̄uha dou-dou Farisi ro dou-dou Saduki.”

⁷ Ringana nggahi ra eli ndede Ruma Isa, anamorid̄oho-Na tampu'ura nggahina sab̄ua lab̄o sab̄ua dou, ”Sia nggahi ndedekaina b̄ara ndai wati wa'ata roti.”

⁸ Ruma Isa nab̄adeku au ranuntu b̄a siad̄oho. Ndad̄i Sia nggahina, ”B̄ab̄auku nggomid̄oho d̄imasa'alakaimu mab̄oha b̄a wati ntaumu roti? Nggomid̄oho kura imbimu!

⁹ Wati ngge'epu loamu ka'ao b̄a nggomid̄oho? Sab̄ua wati kawaramu b̄a nggomid̄oho lima mbua roti ratob̄e-tob̄e b̄a Nahu d̄i ru'u lima riwu dou? Pila wonca roti ma ncewi rakab̄oro b̄a nggomid̄oho?

¹⁰ Ro b̄uneku lab̄o pidu mbua roti ru'u upa riwu dou ede? Pila wonca mancewi ngaha ra nono rakab̄oro b̄a nggomid̄oho?

¹¹ B̄ab̄auku nggomid̄oho sampe wati loakaimu ka'ao b̄a one Nahu manuntu lab̄o nggomid̄oho laina mab̄oha roti? Aina kabare d̄i b̄uha dou-dou Farisi ro dou-dou Saduki!”

¹² Cumpukaina anamori Ruma Isa loana ka'ao b̄a one Ruma Isa kauna siad̄oho aina kabare d̄i b̄uha laina b̄uha d̄i ndawikai roti; pala mab̄oha rangoa ra tei b̄a dou-dou Farisi ro dou-dou Saduki.

Mangaku la Petrus mab̄oha Ruma Isa

¹³ Ruma Isa laona d̄i dana ra rasa d̄eni lab̄o kota Kaisarea Filipi. Ta ede Sia sod̄ina d̄i anamorid̄oho-Na, ”Ranggahi dou, Ana Manusia ede couku?”

¹⁴ Cambe b̄a anamorid̄oho-Na, ”Wara manggahi la Yahya Mataki kandeu karaso dou. Wara rau manggahi la Elia. Ma kalai wali manggahi la Yeremia, atao sab̄ua dou nabi.”

¹⁵ ”Pala nggahi ndai nggomid̄oho, Nahu ake couku?” sod̄i b̄a Ruma Isa d̄i siad̄oho.

¹⁶ Cambe b̄a la Simon Petrus, ”Ita eded̄u Sangaji Mambei salama, Ana Ruma Hatalla Ma Mori.”

¹⁷ ”Malaba podaku nggomi, Simon ana la Yona!” nggahi Ruma Isa. ”B̄ara laina manusia ma rangoa nggahi ede d̄i nggomi, malaisi Ama-Ku ma d̄i saroga.

¹⁸ B̄ara ndedena b̄adepu, nggomi eded̄u la Petrus, wadu ma tenggo. Ro ese wawo wadu akeku Nahu d̄imatu'u gereja-Ku, ma wati wa'u d̄ikakoa; konena b̄a made!

¹⁹ Nahu d̄imambei d̄i nggomi kunci rad̄i Karaja'an Saroga. Au rakantakai b̄a nggomi ara dunia, d̄ikanta rau aka saroga. Ro au rakancihi b̄a nggomi ara dunia, d̄ikancihi rau aka saroga.”

²⁰ Sawa'u b̄a ede Ruma Isa ngoa ra kawarana anamorid̄oho-Na loakud̄u siad̄oho wati ngoana cou-cou b̄a one Siaku Sangaji Mambei salama.

Ruma Isa nuntu ra nggahina mab̄oha susa ra ncoki ro made-Na

²¹ Ratampu'u aipu ede, Ruma Isa nuntu ntirina d̄i anamorid̄oho-Na, b̄a one Sia pab̄uaku laona aka Yerusalem ro d̄ima'iu mboto susa ra ncoki rad̄i dou-dou mana'ekaina, dou-dou mana'ekai imam, ro guru-guru agama. Sia d̄ihade, pala d̄i ainaina katolukaina Sia d̄ikamori mbali.

²² Edempara la Petrus rab̄ina Ruma Isa wa'ana d̄ikompena ro rojona Sia, nggahina, ”Raho-raho to'impa Ruma Hatalla kad̄o'o lab̄ona lampa rawi ede, Ruma! Ai to'impa sampe ndad̄ikaina lampa rawi ede d̄i Ita Ruma!”

²³ Ruma Isa tambarina edempara nggahina d̄i la Petrus, ”Lao aina wara ta ake, Magoda! Nggomi tapa-tapa ncaumu Nahu. Fiki ra kananumu ede fiki ra kananu manusia; laina fiki ra kananu Ruma Hatalla!”

²⁴ Sawa'u b̄a ede Ruma Isa nggahina d̄i anamorid̄oho-Na, ”Dou ma ne'e b̄atu Nahu, pab̄uaku nefana au ramapenti d̄i ru'u weki ndaina, natundu salibna, ro b̄atuna Nahu.

²⁵ B̄ara dou ma ne'e taha morina, d̄imambora morina. Pala dou ma koroba morina ru'u b̄a Nahu, d̄imarakana.

²⁶ Auku labana d̄i ru'u b̄a sab̄ua dou, nggara sara'a dunia ake ndad̄i ntau sia pala sia mbora morina? Loasi mori ede cepe kai au-au?

²⁷ Wati ntoi walina Ana Manusia, d̄imamai sama lab̄o mala'eka-mala'eka-Na kai kuasa Ama-Na. D̄iwakatu ede Sia d̄imacola ra cepe d̄i sanikina dou mancihi ncao lab̄o rakarawina.

²⁸ D̄ib̄ademu! Rad̄i woha weki nggomid̄oho ta ake wara ma wati d̄imamade, sawatipu b̄a edana Ana Manusia mamai katada weki-Na kai Sangaji kaina d̄i ade d̄ese ra ntasa Ruma Hatalla.”