MARKUS 14 - KITAB SUCI INJIL

Nia ne'e hade Ruma Isa

¹ D̄i d̄ua nai walipu Ainaina Paskah ro Aruraja Roti Mawati ntau B̄uha. Dou-dou mana'ekai imam ro guru-guru agama wunga ngupana ncai d̄iwa'u ra letokaina Ruma Isa kai nari-nari, ro d̄ihadekaina Sia.

² ”Pala aina karawi b̄a ndai lampa rawi ede d̄i wakatu aruraja,” nggahi siad̄oho, ”b̄ara nakamaiku ngango ra ngora.”

Ruma Isa luakai mina mengi

³ Wakatu Ruma Isa warana aka Betania, d̄i uma la Simon ma ntoina ma rasupu ncola, sab̄ua dou siwe maina d̄i Sia. Sia wa'ana sab̄ua boto marmar ma'isi mina mengi ma nggali, randawi kai amu mamengi. Wakatu Ruma Isa wunga doho ngahana, dou siwe ede b̄i'ana boto ede ro luana mina mengi ede ese wawo tuta Ruma Isa.

⁴ Pila-pila dou ma wara ta ede ndad̄i mbani ro nggahina d̄i sab̄ua lab̄o sab̄ua dou, ”Au onena mina mengi ede d̄i paki-paki?

⁵ Mina ede loa d̄ilanda kai co'i ncewi tolu ratu piti salaka, ro pitina mbei d̄i ru'u b̄a dou mancoki mori!” Ndad̄i siad̄oho nggahikaina dou siwe ede.

⁶ Pala nggahi Ruma Isa, ”Co'opu sia! B̄ab̄auku nggomid̄oho kasusakaimu sia? Sia karawina ma taho d̄i ru'u b̄a Nahu.

⁷ Dou mancoki mori ngge'empa warana d̄i woha nggomid̄oho. Sanikina wakatu nggara ne'esi b̄a nggomid̄oho, nggomid̄oho maloaku bantu siad̄oho. Pala Nahu wati d̄imangge'e impi sama-sama lab̄o nggomid̄oho.

⁸ Dou siwe ake nawa'ura karawi b̄a sia au d̄i loana karawi. Sia wa'ura sadia weana Nahu kai mina mengi ru'u d̄i umbukai Nahu sawatipu b̄a raka wakatuna.

⁹ Imbipu! D̄isara'a dunia, tab̄e-b̄e Haba Mataho ma ramai ta Ruma Hatalla d̄i ngoa ra kahaba, rawi dou siwe ake d̄i nuntu ra nggahi rau d̄i ru'u kawarakai sia.”

La Yudas nasatuju d̄onggo Ruma Isa d̄i dou-dou ma musu-Na

¹⁰ Edempara la Yudas Iskariot, sab̄ua dou ade sampuru d̄ua weki anamori Ruma Isa, laona aka dou-dou mana'ekai imam kai ne'ena d̄onggo Ruma Isa d̄i siad̄oho.

¹¹ Siad̄oho nawancuku neo adena ringa nggahi ede, ro sakena d̄imambei piti d̄i ru'u b̄a la Yudas. Edempara la Yudas tampu'ura ngupana ncai d̄i d̄onggokaina Ruma Isa d̄i dou-dou ma musu Ruma Isa.

Ruma Isa ngahana ngaha ra nono Paskah lab̄o Anamorid̄oho-Na

¹² D̄iwakatu sarambana ade Aruraja Roti Mawati ntau B̄uha – d̄iwakatu dou sambelena jimba Paskah – anamori-anamori Ruma Isa sod̄ina d̄i Sia, ”Tab̄eku ne'e b̄a Ita d̄i sadiakai b̄a madad̄oho ngaha ra nono Paskah d̄i ru'u b̄a Ita?”

¹³ Edempara kau b̄a Ruma Isa d̄ua dou rad̄i weki siad̄oho, ”Laopu aka kota, ta aka sab̄ua dou mone ma wunga wa'a sab̄ua gandi mawara isi oi, d̄ima'eda angi lab̄o nggomid̄oho. B̄atupu sia

¹⁴ d̄i uma lu'ukai sia ro nggahipu d̄i dou mantau uma ede, ’Sod̄i b̄a Pa Guru, tab̄eku hid̄i ru'u Pa Guru ro anamorid̄oho-Na d̄i ngahakaina ngaha ra nono Paskah.’

¹⁵ Dou ede d̄imaturu teina nggomid̄oho sab̄ua b̄ili ta ese ma na'e. B̄ili ede wa'ura ato, lengka lab̄o isina. Sadiapu sara'ana ta aka d̄i ru'u ndaita.”

¹⁶ Edempara anamori Ruma Isa d̄ua dou ede laona aka kota. Ta aka siad̄oho edana sara'ana ncihi b̄une ranggahi b̄a Ruma Isa. Edempara sadia b̄a siad̄oho ngaha ra nono Paskah.

¹⁷ Aimangad̄ina, mai Ruma Isa lab̄o anamorid̄oho-Na sampuru d̄ua.

¹⁸ Ro siad̄oho wunga doho ngahana, nggahi Ruma Isa, ”Ringa ra kade'epu: sab̄ua dou ade weki nggomid̄oho, ma ngaha sama lab̄o Nahu ake d̄imad̄onggo Nahu d̄i dou-dou ma musu Nahu.”

¹⁹ Ringana ede, anamori-anamori Ruma Isa ndad̄i ncoki poda adena. Edempara sab̄ua-b̄ua dou tampu'u sod̄ina d̄i Ruma Isa, ”Tantu laina mada ranggahi b̄a Ita?”

²⁰ Cambe b̄a Ruma Isa, ”Sia eded̄u sab̄ua dou ade weki nggomid̄oho ma sampuru d̄ua ake, ma ngaha sapingga lab̄o Nahu.

²¹ Poda Ana Manusia d̄imamade b̄une ratunti ade Alkitab. Pala nawancuku ihana dou mad̄onggo Ana Manusia ede! Nancewi tahopu nggara dou ede wati parana ranggana b̄a inana!”

Do'a Jamu Ruma

²² Wakatu siad̄oho wunga ngahana, Ruma Isa wehana roti ro do'a syukuna d̄i Ruma Hatalla. Edempara b̄i'a-b̄i'a b̄a Sia roti ede kai rima-Na, edempara mbeina d̄i anamorid̄oho-Na ro nggahina, ”Weha ro ngahara, ake sarumbu Nahu.”

²³ Sawa'u b̄a ede weha b̄a Sia sab̄ua mo anggo. Do'a syuku b̄a Sia d̄i Ruma Hatalla, edempara mbeina mo ede d̄i anamorid̄oho-Na. Sawa'u b̄a ede sara'a siad̄oho nonona anggo ede.

²⁴ Sawa'u b̄a ede nggahi Ruma Isa, ”Akeku ra'a Nahu ma kasahana rasake Ruma Hatalla, ra'a rab̄oho d̄i ru'u dou mamboto.

²⁵ Imbipu: Nahu wati d̄imanono anggo ake wali, sampe d̄i wakatu Nahu nonoku anggo ma b̄ou sama-sama lab̄o nggomid̄oho d̄i Karaja'an Allah.”

²⁶ Edempara siad̄oho rawana sab̄ua rawa roi ra wadi. Ro sawa'u b̄a ede siad̄oho laona aka Doro to'i Zaitun.

Ngoa b̄a Ruma b̄a one la Petrus d̄imarungka sake d̄i Ruma Isa

²⁷ Sawa'u b̄a ede Ruma Isa nggahina d̄i siad̄oho, ”Nggomid̄oho sara'a d̄imarai tu'u wi'i Nahu. B̄ara ade Alkitab ratunti, ’Ruma Hatalla d̄imahade ompu jimba-Na, ro jimba-jimbana d̄imarai ncengga-ncengga weki.

²⁸ Pala sawa'u b̄a Nahu d̄i kamori mbali, Nahu d̄imalao ulu aka Galilea.”

²⁹ ”Wati,” cambe b̄a la Petrus, ”co'opu siad̄oho sara'a tu'u wi'ina Ita, pala mada wati.”

³⁰ ”Kawarapu,” nggahi Ruma Isa, ”Aimangad̄i ake wa'u, sawatipu b̄a koko janga d̄ua kali, nggomi tolu kali rungkamu sake d̄i Nahu.”

³¹ Cambe kapoda b̄a la Petrus, ”Co'opu mada pab̄uaku made sama-sama lab̄o Ita, mada wati d̄imanggahi b̄a one mada wati pataku Ita!” Ro anamori-Na ma kalai nggahi ndede rauna.

Ruma Isa do'ana d̄i Getsemani

³² Siad̄oho rongga aka sab̄ua hid̄i ngarana Getsemani, ro Ruma Isa nggahina d̄i anamorid̄oho-Na, ”Dohopu ta ake, Nahu malao do'a wa'u.”

³³ Edempara rece b̄a Ruma Isa la Petrus, la Yakub, ro la Yahya lao sama-sama lab̄o Sia. Sia tampu'ura iuna lalai ade ro darura adena.

³⁴ ”Lalai poda ade-Ku,” nggahi Ruma Isa d̄i siad̄oho, ”b̄une dou mane'e made iu-Ku. Midipu ta ake ro b̄olapu!”

³⁵ Ruma Isa lao d̄o'o walina sato'i edempara sujuna awa dana ro do'ana. Ade do'ana raho b̄a Sia nggara loasi aina iu b̄a Sia wakatu susa ra ncoki ede.

³⁶ ”Ama, io Ama,” nggahi-Na, ”wati wara ma daloa ndad̄i d̄i ru'u b̄a Ita Ama. Wehapu ncoki ra darura ake d̄i weki Mada. Pala aina b̄atu-Mu ne'e Mada malaisi rakane'e Ita, Ama.”

³⁷ Sawa'u b̄a ede lao mbali Ruma Isa ro edana anamorid̄oho-Na wunga maruna. Nggahi Sia d̄i la Petrus, ”Simon, mamaru nggomi? Kone sajam mpoampa, nggomi wati wa'umu b̄ola?”

³⁸ Edempara Ruma Isa nggahi-Na d̄i siad̄oho, ”Aina maru, ro do'apu loakud̄u nggomid̄oho wati iumu coba'a. Poda rohmu nane'eku karawi ma taho, pala nggomid̄oho wati sanggomu b̄ara tabe'a manusia ede namapu.”

³⁹ Sakali wali Ruma Isa lao do'ana kai nggahi ma sama.

⁴⁰ Sawa'u b̄a ede mbali wali Sia d̄i anamorid̄oho-Na ro edana siad̄oho mambui ngge'epu maruna, b̄ara siad̄oho na'ipiku eina. Edempara siad̄oho wati b̄adena auku d̄i pab̄ua nggahina d̄i Ruma Isa.

⁴¹ Wakatu Ruma Isa mbalina d̄i siad̄oho katolu kalikaina, nggahi Sia, ”Mbui ngge'epu maru ro sanawamu nggomid̄oho? Ncihira! Wa'ura raka wakatuna Ana Manusia d̄i d̄onggo d̄i rima dou-dou madosa.

⁴² Tu'ura, mai ndai talao. Tiopu! Dou ma d̄onggo Nahu d̄i dou-dou ma musu-Ku wa'ura mai!”

Ruma Isa d̄i wa'u ra leto

⁴³ Wakatu Ruma Isa mbuipu nuntuna, mai la Yudas, sab̄ua dou d̄i ade weki anamori-Na sampuru d̄ua ede. Masama-sama lab̄o sia mai rau mboto dou ma wa'a peda ro kapodo. Siad̄oho rakakai b̄a dou-dou mana'ekai imam, guru-guru agama, ro dou-dou mana'ekai Yahudi.

⁴⁴ La Yudas mad̄onggo Ruma Isa d̄i dou-dou ma musu Ruma Isa ede nawa'ura katantu sab̄ua tanda d̄i ru'u b̄a doud̄oho ede. ”Dou rangilu b̄a mada,” nggahina d̄i doud̄oho ede, ”Sia edeku dou-Na. Wa'u ra letopu Sia ro wa'apu Sia kai jaga katahopu.”

⁴⁵ Wakatu mai la Yudas, sia lao raka lalona Ruma Isa ro nggahina, ”Pa Guru!” edempara ngilu b̄a sia Ruma Isa.

⁴⁶ Edempara dou-dou ma mai sama lab̄o la Yudas ede wa'u ra letona Ruma Isa.

⁴⁷ Pala sab̄ua dou d̄i ade weki dou ma wara ta ede olona pedana ro fatina ada mana'ekai imam-imam sampe kompo fikona.

⁴⁸ Edempara Ruma Isa nggahina d̄i doud̄oho ede, ”Sab̄ua Nahu ake dou madab̄ae, sampe nggomid̄oho mai lab̄omu peda ro kapodo d̄i ne'emu wa'u ra leto Nahu?

⁴⁹ Sanai-nai Nahu mangoa ra tei d̄i Bait Allah d̄i tando nggomid̄oho, ro nggomid̄oho wati wa'u ra letomu Nahu. Pala poda nawa'ura pab̄ua ndad̄i b̄une ede, loakud̄u ndad̄ina au ratunti ade Alkitab.”

⁵⁰ Sara'a anamori-Na rai tu'u wi'ina Ruma Isa.

⁵¹ Sab̄ua dou sampela, ma cuma kani tembe d̄i b̄ontokaina sarumbuna, b̄atuna Ruma Isa. Dou-dou nane'eku wa'u ra leto sia,

⁵² pala hori b̄a sia tembena ede, edempara rai rondana.

Ruma Isa d̄i tando Mahkama Agama

⁵³ Ruma Isa wa'a aka uma dou mana'ekai imam-imam. Ta aka sara'a dou mana'ekai imam, dou-dou mana'ekai Yahudi, ro guru agama wunga kab̄orona weki.

⁵⁴ La Petrus b̄atu slandona Ruma Isa sampe lu'una d̄ei sarei uma dou mana'ekai imam-imam. Ta aka siad̄oho niruna afi sama-sama lab̄o dou-dou majaga.

⁵⁵ Dou-dou mana'ekai imam ro samenana Mahkama Agama na'usahaku raka bukuti-bukuti ma kancara Ruma Isa loakud̄u b̄ab̄ukaina hukuma made d̄i weki Ruma Isa. Pala siad̄oho wati rakana kone sab̄ua bukuti rau.

⁵⁶ Mboto dou sakasi ra'ou d̄imambei sakasi cowa d̄i ru'u b̄a Ruma Isa, pala sakasi rambei b̄a siad̄oho wati samana sab̄ua lab̄o makalaina.

⁵⁷ Edempara pila-pila dou sakasi tu'u kid̄i ro mbeina sakasi cowa ake mab̄oha Ruma Isa,

⁵⁸ ”Madad̄oho ringamu dou ake manggahi, ’Nahu d̄imad̄umba Bait Allah ake randawi b̄a manusia, ro sawa'u b̄a tolu nai, Nahu d̄imatu'u makalai ma laina randawi b̄a manusia.’ ”

⁵⁹ Pala nggahi ra eli ranggahi b̄a dou-dou ede wati samana sab̄ua lab̄o makalai.

⁶⁰ Edempara tu'u kid̄i dou mana'ekai imam-imam d̄i tando siad̄oho sara'a ro sod̄ina d̄i Ruma Isa, ”Sab̄ua Nggomi wati cambemu menana ralo'o ranggahi d̄i ru'u b̄a Nggomi?”

⁶¹ Pala Ruma Isa namidimpa. Sia wati cambena kone sampu'u. Edempara dou mana'ekai imam-imam ede sod̄ina sakali wali d̄i Ruma Isa, ”Sab̄ua Nggomi Sangaji Mambei salama, Ana Ruma Hatalla Mawancu Raso?”

⁶² ”Nahura Sia,” cambe b̄a Ruma Isa, ”ro nggomid̄oho sara'a d̄ima'eda Ana Manusia madoho tasab̄ae wana Ruma Hatalla Mawancu Kuasa ro namai d̄i ade apu rad̄i langi!”

⁶³ Ndad̄i si'i-si'i b̄a dou mana'ekai imam-imam kani ra lombo ndaina ro nggahina, ”Wati paralu walina sakasi!

⁶⁴ Nggomid̄oho mawa'ura ringa b̄a ndaimu nggahi ra eli-Na ma b̄a'a Ruma Hatalla. Ake auku kaputusamu?” Kaputusa siad̄oho sara'a b̄a one Ruma Isa mancara, ro patu d̄i hukum made.

⁶⁵ Edempara pila-pila dou tampu'ura katufena Ruma Isa, ro b̄onto b̄a siad̄oho mada-Na ro b̄oena Sia, edempara nggahina, ”Pehejapu, cou ma b̄oe-Mu?” Dou-dou majaga rau topa rauna Ruma Isa.

La Petrus rungkana sake d̄i Ruma Isa

⁶⁶ Wakatu la Petrus mbuipu warana d̄i sarei, sab̄ua dou ada siwe dou mana'ekai imam-imam maina d̄i sarei ede.

⁶⁷ Wakatu edana la Petrus mawunga niru afi, tio kab̄ae b̄a sia pahu la Petrus ro nggahina, ”Sab̄ua laina nggomi rau masama-sama lab̄o Isa dou Nazaret ede?”

⁶⁸ Pala wati mangaku b̄a la Petrus, ”Nahu wati b̄adeku ro wati loaku ka'ao auku aona nggahi nggomi,” nggahina d̄i ada dou ede. Edempara la Petrus laona aka tad̄a ncai na'e uma dou mana'ekai imam-imam ede. [Wakatu ede koko lalo janga.]

⁶⁹ Eda wali b̄a ada siwe ede la Petrus, ro nggahi walina d̄i dou-dou ta ede, ”Sia romo sab̄ua dou ade weki siad̄oho!”

⁷⁰ Pala wati mangaku wali b̄a la Petrus. Wati ntoina sawa'u b̄a ede, dou-dou ta ede nggahi walina d̄i la Petrus, ”Wati loana wati nggomi eded̄u sab̄ua dou ade weki siad̄oho, b̄ara nggomi dou Galilea!”

⁷¹ Edempara la Petrus tampu'ura badared̄ena ro nggahina, ”Nahu wati pataku dou ranggahi b̄a nggomid̄oho ede!”

⁷² Wakatu ede wa'u koko janga kad̄ua kalikaina. Ro la Petrus kawarana b̄a one Ruma Isa wa'ura nggahina d̄i sia, ”Sawatipu b̄a koko janga d̄ua kali, nggomi tolu kali rungkamu sake d̄i Nahu.” Edempara la Petrus nangi sanced̄i-nced̄ina.