LUKAS 24 - KITAB SUCI INJIL

Ruma Isa mori mbalina

¹ D̄i ainaina minggu, sid̄i-sid̄i poda, dou-dou siwe ede lao aka rade wa'a marakani rasadia b̄a siad̄oho.

² D̄i rade, siad̄oho edana wadu rab̄ontokai rade wa'ura kiri weki.

³ Edempara siad̄oho lu'una d̄i ade rade ede, pala wati rakana eda timba Ruma Isa ta ede.

⁴ Wunga mbuipu siad̄oho kid̄ina ta ede ro darura adena kananu lampa rawi ede, wed̄i lalompa d̄ua dou lab̄o kani ra lombona kakila-kila makid̄i d̄eni lab̄o siad̄oho.

⁵ Siad̄oho na'ipiku dahuna, edempara sujuna salalo awa dana, nggahi b̄a d̄ua dou ede d̄i siad̄oho, ”B̄ab̄auku nggomid̄oho ngupakaimu dou mamori ade woha dou made?

⁶ Sia wati warana ta ake. Sia wa'ura mori mbali! Kawarapu au rawa'ura nggahi-Na d̄i nggomid̄oho wakatu Sia mbuipu d̄i Galilea,

⁷ b̄a one ’Ana Manusia pab̄uaku d̄i d̄onggo mbei d̄i dou madosa, edempara d̄i salib, ro d̄i ainaina katolukaina Sia d̄imamori mbali.’ ”

⁸ Ndad̄i kawara b̄a dou siwed̄oho ede ranggahi ra eli Ruma Isa.

⁹ Sawa'u b̄a dula d̄i rade ede, siad̄oho carita sara'ana mandad̄i ede d̄isampuru sab̄ua rasu ro d̄isara'ana anamori Ruma Isa ma kalaina.

¹⁰ Dou-dou siwe ma ngoa sara'ana ede d̄i anamori Ruma Isa eded̄u: la Maria Magdalena, la Yohana ro la Maria ina la Yakub, ro dou-dou siwe makalaina ma sama-sama lab̄o siad̄oho.

¹¹ Pala rasu-rasu ede kacaina dou-dou siwe ede carita cowana. Siad̄oho wati imbina racarita b̄a dou-dou siwe ede.

¹² Pala la Petrus tu'u ro raina lao aka rade. Sia oko tio cad̄eina, edempara edana cuma salolompa mawara ta aka. La Petrus midi poda adena, edempara dulana kai mboto sod̄i d̄i adena mab̄oha au ma wa'ura ndad̄i.

D̄iwoha ncai lao aka Emaus

¹³ D̄i ainaina ede wa'u, d̄ua dou anamori Ruma Isa wunga lampa lao aka sab̄ua kampo mangara Emaus, kira-kira sampuru sakilo mete d̄o'ona lab̄o Yerusalem.

¹⁴ Wunga ade lampa siad̄oho nuntu salahona mab̄oha sara'a lampa rawi ma wa'ura ndad̄i ede.

¹⁵ Wunga ade nuntu kai siad̄oho ede, ro sod̄i kali cempe angi, mai ndai Ruma Isa ro lampa sama-samana lab̄o siad̄oho.

¹⁶ Siad̄oho edana Ruma Isa, pala wara makahampana ma kandad̄ina siad̄oho wati patana Sia.

¹⁷ Edempara nggahi Ruma Isa, ”Ausi nuntu ra nggahi nggomid̄oho d̄iwoha ncai ake?” Siad̄oho midina kai pahu mamale.

¹⁸ Edempara sab̄ua dou d̄i ade weki siad̄oho, ma ngara la Kleopas, sod̄ina d̄i Ruma Isa, ”Sab̄ua ndai kese Ita dou lai rasa d̄i Yerusalem ma wati b̄ade au ma ndad̄i ta aka b̄ou-b̄ou ake?”

¹⁹ ”Au mandad̄i?” sod̄i b̄a Ruma Isa. ”Lampa rawi ma ndad̄i lab̄o Ruma Isa, dou Nazaret ede,” cambe b̄a siad̄oho. ”Sia nabi. Nggahi ra eli-Na ro ruku ra rawi-Na nantau poda kuasa – nataho d̄i eda b̄a Ruma Hatalla ro d̄intanda b̄a sara'ana dou.

²⁰ Dou-dou mana'ekai imam ro dou-dou mana'ekai bangsa ndaita, mad̄onggona Sia d̄i hukum made, ro siad̄oho salibna Sia!

²¹ Sapodakaina ne'e b̄a madad̄oho b̄a one Sia edeku d̄imahorina Israel! Ro ainaina ake ainaina katolukaina sawa'u b̄a ndad̄ina lampa rawi ede.

²² Wara rau pila-pila dou siwe, lenga madad̄oho kawed̄ina madad̄oho. Sid̄i-sid̄i poda siad̄oho laona aka rade,

²³ pala wati rakana eda timba-Na ta aka. Edempara siad̄oho dula mbalina ro nggahina b̄a one siad̄oho edana mala'eka, ro mala'eka-mala'eka ede manggahi b̄a one Ruma Isa wa'ura mori.

²⁴ Pila-pila dou d̄i ade weki madad̄oho edempara laona aka rade ro edana au ranggahi dou-dou siwe ede napodaku, cuma siad̄oho wati edana Ruma Isa.”

²⁵ Edempara nggahi Ruma Isa d̄i siad̄oho, ”Nggomid̄oho sampula poda! Na'ipiku ahona nggomid̄oho d̄i imbikaimu sara'ana ra nggahi b̄a nabi-nabi!

²⁶ Sab̄ua laina Sangaji Mambei salama pab̄uaku iu wa'una susa ra ncoki ede, ede ampona raka d̄ese ra ntasa-Na?”

²⁷ Edempara Ruma Isa ngoa kab̄aena d̄i siad̄oho au ratunti d̄i ade sara'ana Alkitab mab̄oha ndai-Na, ratampu'u d̄i buku-buku Musa ro buku nabi-nabi.

²⁸ Wakatu ede siad̄oho d̄enira lab̄o kampo d̄i laokai ede. Ruma Isa ndawina weki-Na coro-coro ne'e lampa ntuwu,

²⁹ pala siad̄oho matapana Sia. ”Ngge'e wa'upu d̄i hid̄i madad̄oho,” nggahi siad̄oho d̄i Sia, ”ake wa'u ne'era ngad̄i ai ro wa'ura rindi ai rau.” Edempara Ruma Isa lu'una ne'e maru sai d̄i hid̄i siad̄oho.

³⁰ Wunga wakatu doho ngaha sama lab̄o siad̄oho, Ruma Isa wehana roti, do'a syukuna d̄i Ruma Hatalla, tob̄e-tob̄ena roti ede kai rima-Na, edempara mbeina d̄i siad̄oho.

³¹ Edempara siad̄oho kawarana weki b̄a one ede eded̄u Ruma Isa. Pala Sia mbora lalona d̄i tando mada siad̄oho.

³² Nggahi siad̄oho d̄i sab̄ua lab̄o sab̄ua dou, ”Sab̄ua laina iu b̄a ade ndai b̄une mane'e losa, wakatu Sia nuntu ra nggahi-Na lab̄o ndaita d̄i woha ncai, ro ngoa ra tei kab̄aena isi Alkitab d̄i ndai?”

³³ Wakatu ede wa'u siad̄oho tu'una edempara lao mbalina aka Yerusalem. Ta aka siad̄oho eda angi lab̄ona sampuru sab̄ua anamori Ruma Isa mawunga kab̄oro weki lab̄o ma kalaina.

³⁴ Nggahi siad̄oho ede, ”Ncihi romo Ruma ndai wa'ura mori mbali! Sia wa'ura katadana weki-Na d̄i la Simon!”

³⁵ D̄ua dou anamori Ruma Isa ma b̄oupu mai ede carita mbalina ra iu b̄a siad̄oho d̄i woha ncai, ro rab̄unena siad̄oho patana Ruma wakatu Sia tob̄e-tob̄ena roti.

Ruma Isa katadana weki-Na d̄i anamorid̄oho-Na

³⁶ Wunga mbuipu siad̄oho carita menana, wed̄i lalompa ndai Ruma Isa kid̄ina d̄i woha siad̄oho ro nggahi-Na, ”Taho ra ntai d̄i ru'u b̄a nggomid̄oho!”

³⁷ Siad̄oho wed̄ina ro dahu, b̄ara kacai b̄a siad̄oho edana henca.

³⁸ Pala nggahi Ruma Isa, ”B̄ab̄auku nggomid̄oho dahukaimu? B̄ab̄auku mbalimbuakai ademu?

³⁹ Tiopu rima Nahu ro tiopu ed̄i Nahu. D̄ib̄ademu, b̄a one ndai Nahu ake! D̄amapu ro tio kab̄aepu, b̄ara henca wati ntauna hi'i atao peke, b̄une ra'eda b̄a nggomid̄oho d̄i Nahu.”

⁴⁰ Ruma Isa nggahi ndedena ro teina rima ra ed̄i-Na d̄i siad̄oho.

⁴¹ Ro wunga mbuipu wati imbina, b̄ara ipi lalo neo ade ro midi adena, sod̄i b̄a Ruma Isa d̄i siad̄oho, ”Sab̄ua nggomid̄oho wara ntaumu ngaha ra nono ta ake?”

⁴² Mbei b̄a siad̄oho Sia sadompo uta ncango.

⁴³ Weha b̄a Ruma Isa uta ede, edempara ngahana d̄i tando siad̄oho.

⁴⁴ Sawa'u b̄a ede nggahi Sia d̄i siad̄oho, ”Akeku lampa rawi-lampa rawi rawa'u ngoa b̄a Nahu d̄i nggomid̄oho wakatu Nahu mbuipu sama-sama lab̄o nggomid̄oho: b̄a one sanikina lampa rawi ratunti mab̄oha Nahu d̄i ade buku-buku la Musa, Nabi-nabi, ro Zabur, pab̄uaku d̄imandad̄i.”

⁴⁵ Edempara Ruma Isa henggana fiki ra kananu siad̄oho d̄i loakaina ka'ao isi Alkitab.

⁴⁶ Edempara nggahi Sia d̄i siad̄oho, ”D̄i ade Alkitab ra tunti b̄a one Sangaji Mambei salama pab̄uaku iuna susa ra ncoki, ro pab̄uaku mori mbalina rad̄i madena d̄i ainaina katolukaina.

⁴⁷ Ro b̄a one kai ngara Sangaji Mambei salama ede pab̄uaku d̄ingoa ra kahaba d̄i samenana bangsa b̄a one manusia pab̄uaku tobana, ro b̄a one Ruma Hatalla makangampu wea dosa. Ro haba ede pab̄uaku d̄ingoa ra kahaba tampu'u d̄i Yerusalem.

⁴⁸ Nggomid̄ohoku sakasi-sakasi d̄isamenana ede.

⁴⁹ Ro ndai Nahu d̄imanggaduna d̄i nggomid̄oho au rasake b̄a Ama. Pala nggomid̄oho pab̄uapu ngena ntuwumu d̄i kota ake sampe kuasa rad̄i Ruma Hatalla kuasakaina nggomid̄oho.”

Ruma Isa hanta lao ese saroga

⁵⁰ Sawa'u b̄a ede Ruma Isa wa'ana siad̄oho ari mai b̄a kota sampe aka Betania. Ta ede Sia hantana rima-Na, edempara mbeina bareka d̄i siad̄oho.

⁵¹ Wunga mbuipu Sia karawina ede, Sia hanta weki lao ese saroga, edempara ncenggana lab̄o siad̄oho.

⁵² Siad̄oho suju nembana Sia, edempara dula mbalina lao aka Yerusalem kai neo poda adena,

⁵³ ro roi ra wadi ncauna Ruma Hatalla d̄i Bait Allah.