ROMA 1 - ALLAH AKOT ATAKAM

Paulus ROMA Yesus Basitim Bajarisiap Owe Ataejirime Surat

¹ Dere Paulus. Dere Kristus Yesus bambi karai baetam ipit. Allah, Yesus atakam bakoretam bamirimemom ipit ataemomen. Are, Yesus Akot Atakam bakoretam, aeremtaeren.

² Bonaknak ere, Allah, Yesus Akot Atakam, aatakam bakoretam owe, aesimtamen. Era owerawa, era atakam, Alkitab bomon, aeapomesen.

³ Era atakam, Allah Andep atakam are. Are Yesus Kristus, daTuhan. Armat Ipit asamot ipit aememe, Are Daut wurpis ajisamsen.

⁴ Emesare, era atakam, Yesus Kristus atakam. Armat Ipit, daTuhan. Are Allah. Me Armat Ipit, ere turunak. Allah afiaknak pak, Armat Ipit ajaoromwasumtumen. Erarawa Allah, Yesus Kristus Andep, emes aporomtamen.

⁵ Me Kristus aeme pak, asan akot aemapomen. Emesamare, Allah, dere Yesus atakam bakoretam bamirimemom karai ataemomen. Ere karai Kristus baetam are. Era karai ere, samaniin samaniin takes Kristus eemnak bamesemkoromam, aatakam ji baeam, emes atakam bakore are.

⁶ Tanom ara atakam jane ajiekem wan saman taka tarare. Allah, ere, tare Yesus Kristus aowe baemem ajaten.

⁷ Emesare, dere ara surat, tare Roma baemap owe, atetammin. Allah ere, tara afaimman. Are tare aowe baemem ajaten. Emesare, Daritipit Allaham, Tuhan Yesus Kristusam, asan akot tara baemtan. Are ji baem jak tara batetamtan.

Paulus, Roma jaki jak aseserome atakam

⁸ Ara bonak akoremin atakam emes are: Tare takes Yesus Kristus eemnak ambesemkorommakam. Era tapirmiin tapirmiin oweam emes atakam jane ajies. Emesare, dere Yesus Kristus bipu ambarommin wanam terima kasih atakam deAllah akorommin.

^9-10 Dere atakam Allah ajanimemin, dere ta atakam Allah ajanimtamemin. Allaham emes amsam. Dere Armat Ipit Andep Akot Atakam akoretammin. Erarawa dere Allah karai fiaknak aetammin. Emesare, tarainak, dere jaki jak tara aseseromaaru. Allah akot aporto, denom era pak aemtemin. Denom emes atakam Armat Ipit ajanimemin.

¹¹ Dere Allah Jip, bambi tara atetamtan pak, tara batetam akot. Tararawa, jak fiak aememtemakam. Emesare, dere tabi bapor, jak aseserommin.

¹² Era akoremin atakam ere, tare dere Yesus eemnak bamesemkorom aportakam, jak fiak aememtemakam. Denom, tare Yesus eemnak bamesemkorom aportey, jak fiak aememtemin.

¹³ Dejoo owe akotnak! Tare era akoretey atakam baporkorom, akot ajimin. Dere jaki tara bajit, atakam asakamtiia ajaio. Dere ere, waa aemansa jaki bajit tara baemejinaopor asan apok. Emesare, denom tare wan owe Yesus bajamkai baemapom akot ajimin— wan Yahudi apok saman aemo tamen are.

¹⁴ Tuhanam atakam asakamtamen. Emesare, dere, Allah Akot Atakam, owe takes abakoretamnak. Kota oweam are. Wasen aemapmas oweam are. Daytu sekolah aeaaris oweam are. Sekolah apok oweam are.

¹⁵ Emesare, dere Yesus Akot Atakam, Roma aemapakam oweam bakoretam jak aseserommin.

Yesus Akot Atakam, ere fiaknak atakam

¹⁶ Emesare, dere Yesus Akot Atakam eemnak ambesemkorommin. Era Akot Atakam, ere Allah fiaknak pak are. Erarawa Allah, Yesus Akot Atakam eemnak bamesemkorom owe ajortaerem. Are Yahudi owe bonak ajortaerem. Wanam, Are Yahudi apok oweam ajortaerem.

¹⁷ Allah, wan owe, turunak owe, emes atakam asakamtiim. Ere Allah eemnak ambesemkorommas owe taka are, Yesus Akot Atakam ere, era atakam are. Ere Alkitab atakam jipu: “Allah eemnak ambesemkorommas owe, turunak owe atakam asakamtiim. Era owe, ere jiine owe erare.” Alkitab emes atakam akorem.

Asamot owe takes beak sos Allah asotamteteres atakam

¹⁸ Emesare, owe dosa aememas. Are jaos pak aememas. Erarawa are wan owe Allah atakamnak jane bajiekorom akekememas. Allaham era aememas pak bifane afeomem. Erarawa Are bajurusum pak era owepu ataendaemum. Are era pak aporomtamum.

¹⁹ Owe, Allah aoememe, takes baso aporemas. Allaham, era pak, era owe bimak binip emetetame.

²⁰ Me Allah ara tapirmi akenemapome baream, waa ara aemansaram, owe, Allah afiak pak bakari apoknak, emes aporaaris. Anom, Allah aoememe tayieakot, emes aporaaris. Owe, Allah aoememe, baemepor asan apok. Me, owe Allah akenemapome pak aportas, are aoememe bapor asan erare. Emesare, era owe, era aemaaris dosa, baemepatimtii asan apok.

²¹ Era oweam Allah amsam. Me, are, Armat Ipit basitim potan. Are, “Wore Allah anakot,” emes bajie apok. Are, terima kasih atakam Allah bakorom apok. Abimak binip ere, pota. Abimak binip jaos anama jiitinak.

²² Era oweam, “Damsamnak,” Emes atakamam aesimemas. Me, are jandanak.

²³ Are jiinenak Allah basitim ambompimes, wanam eto asitimes. Era eto, jiine apok asamot owe apaye, sakao apaye, bai ajiejaremas pak apaye, tupuni ajiejaremas pak apaye, emes tamen are.

²⁴ Emesare, Allah, era owe ajak aseseromes pota pak baemaar, ambompime. Era owe ere, pota pak aemamemas.

²⁵ Are anakotnak Allah bamesem potan. Me, are wan pote fiak pak asitimes. Are Allah akenemapome pak asitimes. Are era pak atakam ji aees. Are ere, era pak akenemapome Ipit basitim apok. Are aatakam ji bae apok. Owe ere, Armat Ipit tere baeomaartas. Emesare, ara atakam, ere atakamnak.

²⁶ Emesare, Allah era owe era pota pak baem apore. Ararawa, era owe, pota pak aseseromes asan pota pak baemaar, ambompime. Emesare, era owe atapesti ambiis damo bajukun apok. Tapes ere, armamon asan pota pak aemes.

²⁷ Ambiisam emes taka aemes. Are atapesti damo bajukun apok. Oorey, armamon jak ajamsenamemes. Are asan pota pak ajamemames. Emesare, Allah, era owe ajurusume. Era ajurusume pak, era owe aemes potanak dosa jipu.

²⁸ Era owe, Allah atakamnak, bimak binip bajanimomem potan. Emesare, Allah era owe asan pota pak bimak binip batetaramaar ambompime. Are era owe asan pota pak baemaar ambompime.

²⁹ Era owe, ere dosa kupis aememas. Are jaos pak aememas. Are owe pak asenomemas. Are owe bifane afeomememas. Are itim akememas. Are owe atatiiemas. Are owentakam aememas. Are pote atakam akoremas. Are, owe, pota owe, emes bimak binip atetaramemas. Are owe aemes pak, pote atakam akoromatemas.

³⁰ Are owe pota atakam akoromemas. Are Allah bifane afeomememas. Are amba aemetemtememas. Are ai dosa baem bimak binip daytu atetaramemas. Are arisare atakam aooemas.

³¹ Are bimak binip apok. Are era ataaji aees pak jipu batawejom apok. Are owe asan akot baemomem apoknak. Are owe seekot bajie apoknak. Emesare, are emes owe.

³² Allah ere, atakam asakamtiie. “Emes pak baem owe, dambir baemtas.” Emes atakam aesime. Era oweam emes atakam amsam. Me, are emes pak baem bamompim apok. Are, wan owe emes pak baem, akot ajiemas.