MATIUS 7 - ALLAH AKOT ATAKAM

Owe pota pak atakam basakamtii atakam

¹ “Tanom owe apota pak atakam basakamtii bas. Allah tapota pak atakam basakamtii-ombar.

² Tare owe apota pak atakam asakamtiitakam, Allah tapota pakam emes taka asakamtiitem. Tare owe apota pak atakam daytu akoretakam, Allaham tapota pak atakam daytu aokoretem.

³ Tare pano kope, tajoo ipit banamek bomon apormakam. Me, tabanamek bomon balok aapeta. Tanom era balok bapor apok aemmakam. Wama tamenem?

⁴ Tabanamek bomon balok aapeta. Me, tare atakam tajoo ipit akoremakam, ‘Dere wobanamek pano baeremosomtam.’ Tare emes atakam bakore wama tamenem?

⁵ Tare pir bae owe. Tabanamek bomon balok ato takamemosomay. Wanam tajoo ipit banamek panokope baereemosomtam, akot aportemarem.

⁶ Akot pak, juuri batetam bas. Tabarmani akotnakam wo bipu bakoromtiitam bas. Are, era pak, bai bambi aipipirjartem, wanam sisi tara aofiromemteman.”

Atakam surga oup Taritipit bajanim atakam

⁷ “Atakam Allah ajanimay. Allah ere, era atakam ajanimtakam pak aemtamteman. Bandimarporay. Tararawa, era andimarportakam pak andimartaertemakam. Jimsap bakokomay. Allah ere, jimsap tara apaimtamteman.

⁸ Me atakam ajanimemas owe takes era atakam ajanimemas pak ataeremas. Era andimaremas owe, andimarporemas pak andimartaeremas. Allah era jimsap bakokom owe, jimsap apaimtamum.

⁹ Tare jii aptam owe, tajii amos atakam tara ajanimtan apaye, tare eka tajii batetam ape?

¹⁰ Are enamo atakam tara ajanimtan apaye, tare amber tajii batetam ape?

¹¹ Emesare, tare takes jokoman owe. Tare ere, tajii akot pak batetam tamsam. Emesare, Taritipit Surga oup aapeta. Armat Ipitam akot pak atakam ajanimtas owe atetamtem.

¹² Tare, owe, asan akot, tara baem akot ajimakam apaye, tanom asan akot era owe aemomay. Me Musa aeapome Basakamtam Atakam atakam feam, Allah atakam bakoretam owe aeapomes atakam feam, ere emes atakam are.”

Sata jimsap atakam

¹³ “Tare sata jimsap ajiiay. Me neraka bokot jimsap, ere afo. Era bokotam basu. Era bokot ajaremas owe ere, tanane.

¹⁴ Era jiine baemapaar asan bokot jimsap ere, sata. Era bokot ajaremas oweam ajirisememas. Era bokot andimartaeremas owe, tanane apok.”

Tare era pote atakam baememtam owe turuar atakam

¹⁵ “Tare Allah atakam bakoretam pote owe turuar. Are domba tamen tara ajinaomemteman. Me, ajak bomon ere jokomannak wasen ju uri tamen are.

¹⁶ Tare ere, era owe aememas pak aportakam, tare are pote owe aportemakam. Owe, anggur eek, fa aptam wus kari bakomtaerpor ape? Are, wus eek juas ‘ara,’ fa aptam wus kari bakomtaerpor ape?

¹⁷ Era akot wus akene takes, eek akot apem. Era kasu wus akene ere, eek pota apem.

¹⁸ Emesare, akot wus akene, eek pota baemepeomtep asan apok. Kasu wus akeneam, eek akot baemepeomtep asan apok.

¹⁹ Owe, wus, akot eek bape apok aportas, are era wus ambatiiemas. Ararawa, era wus jisimak akoromtukumemas.

²⁰ Emesare, tare era owe era aememas pak aportakam, are Allah atakam bakoretam pote owe aportemakam.”

“Tare demsam apoknak” atakam

²¹ “Wan owe atakam dera akoromemanis, ‘Tuhan! Tuhan!’ Emes atakam aesimemas. Me, era owe takes, Allah aobaomep owe baemeemem asan apok. Surga oup Daritipit atakam ji bae owe taka are.

²² Era Ju Ajiire aemamesto, owe tananeam atakam Dera akoromtemanis, ‘Tuhan! Tuhan! Dare wojuas ajietaerom, wanam dare woatakam owe akoretamom, owe ajak bomon bii ambirimjisimom, jinim bae pak tanane aemom.’ Emes atakam aesimtemas.

²³ Derarawa, atakam era owe akoromtemin, ‘Tare demsam apoknak. Tare pota pak baemaar owe. Tanom doememey asan baemem bas. Tanom baesosay!’ Emes atakam aesimtemin.”

Tame baeapom ipit jamnuk atakam

²⁴ “Wan owe deatakam jane ajiemas, wanam era atakam ji aemas. Era owe, bimak binip baso ipit taka emes tamen are. Era ipit tame aeapome, are fesis sekumkum ajiire andaejirimapomen.

²⁵ Terawa, andaen. Te eombwi daytinak aemesen. Kuur daytuam era tame ambaperemen. Era tame ere, bandaepakamtii apoken. Emesare, era tame fesis sekumkum bomon aememen.

²⁶ Wan oweam deatakam jane ajiemas. Era owe ere, era atakam ji bae apok aemas. Era owe, bimak binip apok ipitnak emes tamen are. Era ipit atame bisin ten bambi aeapomen.

²⁷ Terawa, andaen. Te eombwiam daytinak aemesen. Kuur daytuam era tame ajumen. Era tamerawa, andaepakamtiien. Are danaisnak aemansen.” Yesus emes atakam aesimen.

Yesus atakam fiak akore atakam

²⁸ Emesare, Yesus atakam akorekoromen. Era owe tananeam era aememtame atakam, jinim daytu aeesen.

²⁹ Me Yesus atakam aememtame ere, Are atakam fiaknak akoren. Era oweam emes aporesen. Are Yesus era owe aMusa Basakamtam Atakam baememtam owe emes tamen atakam baememtam apok aporesen.