MATIUS 4 - ALLAH AKOT ATAKAM

Bii Kapar Ipit, Yesus aempore atakam

¹ Allah Jip arawa, Yesus, tame apok asan ajanetomasen. Are Bii Kapar Ipit Armat Ipit baempor era asan ajanetomasen.

² Ise 40, Yesus amos ambasemaaririn. Ararawa, amosto aememen.

³ Era baempor ipitam, Yesus ajinaomen. “Wore Allah Andep apaye, ara aemansa eka, amos bajaorames, atakam, asakamtamey.” Emes atakam aesimen.

⁴ Yesus arawa, “Alkitabam, ‘Asamot owe jatiaptam baemem, are amos taka banda apok. Are Allah atakam ji takes baekoromtas.’ ” Emes atakam akorem.

⁵ Me Bii Kapar Ipit arawa, Armat Ipit, Akot kota aesomasen. Are Armat Ipit Allah Tame oupnak wone beak atemetetaapomen.

⁶ Me Bii Kapar Ipit arawa, “Wore Allah Andep apaye, Wore bap ajondaey. Emesare, Alkitabam: ‘Allah, amalaikat owe, banamek wora bataiomem, atakam asakamtamtem. Era malaikat owerawa, ban wora atoomemtemanis. Wobai, eka bapakam-ombar.’ Alkitab emes atakam akorem.” Bii Kapar Ipit emes atakam aesimen.

⁷ Yesus arawa, “Alkitabam, ‘Tuhan, woAllah. Wonom Armat Ipit baempor bas,’ emes atakam akorem.” Yesus emes atakam aesimen.

⁸ Me Bii Kapar Ipitam Armat Ipit oupnak fami taka atoomtemeten. Are era tapirmiin takes, Armat Ipit ameteporomtamen. Are era tapirmi takes aakotnak pak, Armat Ipit aporomtamen.

⁹ Are atakam Yesus aokoromen. “Wore debipu bi fop andaejiaptem, wanam dera asitimtanim ere, dere era pak takes wora atetamtemin.” Emes atakam aesimen.

¹⁰ Yesus arawa, atakam Bii Kapar Ipit aokoromen. “Bii Kapar Ipit! Wonom te! Baesosey! Alkitabam, ‘Tuhan, woAllah. Wonom Armat Ipit tere baeomey. Karai A taka eetamey.’ Emes atakam akorem.” Yesus emes atakam aesimen.

¹¹ Emesare, Bii Kapar Ipit, Yesus beken ajiosen. Malaikat owerawa, andaesen. Are pak Yesus afaafetamesen.

Yesus, Galilea tapirmi aesose atakam

¹² Emesare. Yesus, owe Yohanes buji tame bomon ajiitaapomes, atakam jane ajien. Ararawa, Galilea tapirmi aesosen.

¹³ Are kota Nasaret baemapaar apoken. Emesare, Are jupima kota juas Kapernaum aemapen. Ere Sebulon anama Naftali tapirmin.

¹⁴ Ere Allah atakam bakoretam ipit juas Yesaya aesimtame atakam jipun.

¹⁵ “Sebulon tapirmiam, Naftali tapirmiam, jupima setep. Ere Yordan ju poman are. Ere Galilea tapirmi. Emesare, Galilea tapirmi era Yahudi apok owe atapirmi.

¹⁶ Era jiiti bomon aemapes owe. Sare daytinak apores. Era owe dambir tapirmi aemapes. Ere jiiti asan. Me, era sare owepu asaramtopome.” Yesaya emes atakam akoren.

¹⁷ Era bare ajiire, Yesus atakam akoretamaarir: “Allah aowe baomep bare ere, setepnak asisimmara. Emesare tare tadosa takes bamakemteteray. Wanam Allah atakam ji aeay.” Emes atakam akoretamaarir.

Yesus jimi bapie owe eak taka apok ajate atakam

¹⁸ Emesare. Yesus fo daytu juas Galilea jupima ajaren. Are jipit amnuk aporen. Ere arepotamen. Me wan ipit juas Simon. (Armat ipit wan juas Petrus.) Areot ere, juas Andreas. Are jimi bapie tastu jipit amnuken. Erarawa are jimi apiemisen.

¹⁹ Yesusam atakam era owe akoromen. “De! Dera jamkaianimi! Dere, tare, asamot owe dera bajamkai, enamo tamen bapietaa, aememtamtemin.” Emes atakam aesimen.

²⁰ Armat ipit amnukam ajimi beken ametejiemisen. Are Yesus ajamkaiemisen.

²¹ Yesusam aojaremen. Are wan ipit amnuk aporen. Anom arepotamen. Ere Yakobusam, areot Yohanesam, are. Ere Sebedeus arereisen. Are, aritipit Sebedeusam, ajimi jafa bakekem, ti bomon aemapesen. Yesusam era ipit amnuk ajaten.

²² Era ipit amnuk arawa, atiam, aritipitam, beken ametejiosemisen. Are Yesus ajamkaiemisen.

Yesus akoretame. Anom damo pota owe ajaoromtaae atakam

²³ Emesare. Armat Ipit Galilea tapirmi samaniin samaniin ajatejaremen. Are Yahudi Owe samayen tame tanane bomon, atakam aememtama ajaien. Are, Allah aobaomep owe baemem Akot Atakam, akoretama ajaien. Are damo owe era damo pota kupisam, kumiti owe damo kupisam, ajaoromtaera ajaien.

²⁴ Armat Ipit andi Siria tapirmi takes afufuosen. Oweam, era asan pota owe takes, Armat Ipitpu atoomtinesen. Ere damo kupis oweam, damoiin asesa oweam, bii ajak bomon aemapteteres oweam, apiemas oweam, kam oweam, emes owee aren. Armat Ipit arawa, era owe ajaoromtaera ajaien.

²⁵ Owe tananeam Armat Ipit fe asaramesen. Galilea tapirmiam, kota Dekapolisam, kota Yerusalemam, Yudea tapirmiam, Yordan poman tapirmiam, emes owe ajinaoesen.