MARKUS 5 - ALLAH AKOT ATAKAM

Yesus bii tanane ambirimjisime atakam

¹ Emesare. Yesusam, abajamkai oweam, fo daytu juas Galilea poman ajiremesen. Era tapirmi, Gerasa saman tapirmi.

^2-3 Yesusam asokuemen. Asokuemerawa, jipit taka Yesus ametedaeomen. Are dambir owe asan aiten. Biiam era ipit jak bomon aemapaaririn. Era ipit arawa era dambir owe asan aememaaririn. Owe era ipit rantai banam bajikapom aempores apoken.

⁴ Bonak ere, owe, bare tanane, era ipit banam, baiam, rantai banam ajikapoma ajaiesen. Me, era ipit era rantai bambi tepipikimosoma ajaien. Era ipit fiaknaken. Erarawa owe era ipit baemekumim asan apoken.

⁵ Bonak ere, jokam, aemam, era ipit dambir owe asanam, fami asanam, bambi bajatijaraar. Are jende atawuomaaririn. Are fero eka andamo amba asesakamansa ajiaaririn.

⁶ Era ipitam andaen, Yesus setep apok aemeporen. Ararawa, Yesuspu ja akukomdae, wanam abipu jindi andaepuapen.

⁷ Are atakam daytu afaken. “Yesus! Wore Oupnak Allah Andepe! Wore wama pak emtanim? Dere Allah bipu atakam fiaknak Wora ajatemin. Wore dera bajurusum bas.” Emes atakam aesimen.

⁸ (Bonak ere, Yesus atakam, era ipit jak bomon bii, akoromen. “Bii! Wore ara ipit jak bomon ajisey.” Emes atakam aesimen. Ararawa era ipit atakam akoromen.)

⁹ Yesus arawa, ajateporen. “Wore wama tamen juasem?” Emes atakam aesimen. Era ipit arawa, “Da bii tananenak aemapom. Erarawa dejuasam, ‘Tananenak.’ ” Emes atakam aesimen.

¹⁰ Era ipitam atakam fiak Yesus aijanima ajaien. “Wore da bii wan tapirmi baesos atakam baesimtam bas.” Emes atakam aesimen.

¹¹ Emesare. Wo taso tananenak fami asan paknamar apakeemesen.

¹² Era biiam Yesus atakam fiaknak ajanimesen. “Dare era wo taso jak bomon batukapteter atakam asakamtammaro.” Emes atakam aesimesen.

¹³ Yesus arawa. “Emes aemay.” Emes atakam aesimen. Erarawa, era bii takes era ipit jak bomon awarimjisesen. Ararawa, era wo damo bomon aotukapteteresen. Era wo 2.000 apayeen. Are takes imtuu fami fop akukendaeteteresen. Wanam fo daytu bomon akan ajakapua ajeteteresen, dambir akanen.

¹⁴ Era wo taso banamek batai owe kota ja akukosesen. Ararawa era atakam kota aemapes owe, wanam tamsan aemapes owe aesimtamesen. Era owerawa era atakam baporkorom aesosesen.

¹⁵ Ararawa Yesuspu ambaremesen. Erapu ambaremes, bii tananenak jak bomon awarimjises ipit, aporesen. Era ipit pakaian aptam, bimak binip akot aptam, aemapen. Era owe emes apores, are ombare ambaresen.

¹⁶ Era ipit aememe pak apores owe, ateman era ambaremes owe atamesen. Anom era wo aemes pak ateman atamesen.

¹⁷ Emesare, era oweam, Yesus atapirmi beken bajios atakam fiak ajanimesen.

¹⁸ Yesusam ti basojuu aememen. Ti basojuu aememerawa, era bii jak bomon awarimjises ipit, Yesus bajamjuu atakam fiak ajanimen.

¹⁹ Yesus arawa, “Wore bajamjuu bas. Wotame! Tuhan daytinak wora aemtaman pak, atakam era owe pakoretamey. Tuhan seekotnak wora aoorporan pak atakam era owe pakoretamey.” Emes atakam aesimen.

²⁰ Erarawa, era ipitam era asan aesose, wanam kota Ban Jamnuk dasman era samaniin samaniin takes aesosen. Are Yesus daytinak aemtame pak atakam era owe akoretamen. Era atakam jane ajies oweam jinim daytu aeesen.

Yairus arerep anama damo pota aemapaarir taot atakam

²¹ Emesare. Yesus fo daytu poman aopiiren. Ararawa owe tanane Armat Ipit fo daytu fikin ajaresiisiomesen.

²² Era asan Yahudi owe samayen tame kapar ipit juas Yairus anom ambaremen. Are Yesus bi apore, Armat Ipit bipu jimas andaejirapen.

²³ Ararawa Yesus atakam fiak ajanimen. “Deparais potanak. Are dambir baem taka. Me, Wore de! Wore ban deparais damo ten ataetiiey. Are dambir baem-ombar. Erarawa are ajaoremtem.” Emes atakam aesimen.

²⁴ Emesare, Yesus anama era ipit takan aesosemisen. Owe tanane anom Yesus fe asaramesen. Era owe Yesus akukurumomasesen. Owe daytun.

²⁵ Era owe daytu bomon, taot taka tani esee tahun 12 bataepie apok aemapaaririn.

²⁶ Dokter kupis obat era taot aempores apoken. Era taotam aapak takes dokter kupis waneja waneja ajiepore apoken. Me, obat baoromtaer asan akot baemap tamen apoken. Era ajirisaarir pak obetema ajaien.

^27-28 Bonak ere, era taot Yesus aemaarir pak atakam jane ajien. Are bimak binip atetaramen. “Dere abaju jirao ban akurumtaertey, damo akot aemaptemin.” Emes bimak binip atetaramen. Erarawa, are owe tanane bomon, Yesus fe asarame, wanam abaju jirao ban akurumtaeren.

²⁹ Baju jirao ban akurumtaere, aesee ametetaipien. Are adamo akot aememe aporen.

³⁰ Emesare, Yesus, owe damo ajaoromtaere fiak pak adamo ajise ameteporen. Ararawa, era owe tanane bomon, asep banep aooromen. “Debaju ban tao kurumtaerman?” Emes atakam aesimen.

³¹ Me abajamkai oweam atakam Armat Ipit akoromesen. “Wodamo akukurumomasmanis owe, tananenak. Worarawa ‘Debaju ban tao kurumtaerman?’ Emes atakam aesimmarem wama tamenem?” Emes atakam aesimesen.

³² Yesus asep banep era owe tanane ajiepora ajaien. Are abaju akurumtaere taot apeepemporen.

³³ Era taotam damo akot aemapar apore, wanam Yesuspu ombare damo di tamen jindi andaepuapen. Are aeme pak atakamnak akoromen.

³⁴ Yesusam atakam era taot akoromen. “Deparais akot! Wore Dera ambesemmanim. Erarawa damo akot aememmarem. Wotame ji baem jak aesosey. Wora ajurusumaarin pak taesosto. Era pak wora bojurusum bas.” Emes atakam aesimen.

³⁵ Yesus atakam taomekoremap, Yairus atame owe, Yairuspu ambaremesen. “Worerep, dambir ameemmar. Wore ara guru bajurusum bas.” Emes atakam aesimtamesen.

³⁶ Yesusam era akores atakam jane bajie apok tamen aememen. Are atakam era Yahudi owe samayen tame kapar ipit akoromen. “Wore ombare bas. Allah taka besemay.” Emes atakam aesimen.

³⁷ Yesusam wan owe Ara bajamesos atii aten. Are Petrus, Yakobus, areot Yohanes, era owe taka apa bajamesos eraren.

³⁸ Emesare, are, Yahudi owe samayen tame kapar ipit atame ambaremesen. Erarawa, Yesus bate bay aeames wanam semoo aees aporen.

³⁹ Armat Ipitam era tame ajiiemen. Erarawa, era owe ajateporen. “Tare apa eammakam? Tare apa bateem? Ara jii dambir apok. Are ise putamsar.” Emes atakam aesimen.

⁴⁰ Era owe Yesus wote awotomesen. Armat Ipitam, era owe tame bomon ambirimjisimen. Are era jii arsoot anama aritipit, Armat Ipit takan ajamememes oweam, emes owe taka ataeren. Ararawa, era jii aemanse kamar ajiiesen.

⁴¹ Are era jii ban atapimtaere, ararawa atakam era jii akoromen. “Talita kum!” Emes atakam aesimen. Era atakam daatakam jow bauumtaer, “Deparais! Dere atakam wora akorommin. Bawasitey!” emesare.

⁴² Erarawa, era taot jii ametewasiten, wanam ajaren. Me apores owe jinim daytu aeesen. (Era taot jii umur 12.)

⁴³ Me, Yesus atakam fiak era owe asakamtamen. “Tare ara apormakam pak, atakam owe bokorom bas.” Emes atakam aesimen. Are era owe, amos, era taot jii batetam atakam aesimtamen.