MARKUS 15 - ALLAH AKOT ATAKAM

Yesus Pilatuspu aememe atakam

¹ Emesare. Tomnak, era Yahudi Agama Atakam Basakamtii Owe, atakam fef asakamtamesen. Erarawa Allah Tame pak baem owe daytuam, Yahudi duturu oweam, Musa Basakamtam Atakam baememtam oweam, emes owe aren. Ararawa, Yesus banam ajikapomes, wanam atomasesen. Era owe Armat Ipit Pilatus aotasimemomtamesen.

² Pilatus arawa, Armat Ipit ajateporen. “Wore Yahudi owe raja ipit Worare?” Emes ajateporen. Yesus arawa, “Ara akoremarem atakam ere, atakamnak.” Emes atakam aesimen.

³ Allah atakam baememtam owe dayturawa, Yesus pota pak tanane aeme, emes atakam akoresen.

⁴ Pilatusam emes aporen. Ararawa, Yesus ajateporen. “Wore atep bajit baose? Baporey! Ara aememares owe, Wore pota pak tanane aemem atakam akoremas.” Emes atakam aesimen.

⁵ Yesus arawa, atep bajit apoken. Pilatus jinim bay aeen.

Pilatus, Yesus batatii, atakam asakamtiie atakam

⁶ Emesare. Tahuniin tahuniin Paskah Bare Pakambwi damon, owe Pilatus, buji tame bomon aemapes owe, jipit taka basurumjisimtam, atakam ajanima ajaiesen. Pilatus arawa, are jipit taka asurumjisimtama ajaien.

⁷ Era bare, owe tanane buji tame bomon aemapesen. Wan ipit taka juas Barabasen. Bonaknak, Barabas, wan oweam, pemerintah jokoman aemesen. Wanam owe atatiiesen.

⁸ Emesare, ara pakambwi damon, owe tanane Pilatuspu ajarisiemesen. Are Pilatus asurumjisimtama ajaie tamen baem, atakam ajanimesen.

^9-10 Emesare, Allah Tame pak baem owe Yesus bet asisimomesen. Bonak, are Yesus Pilatus aotasimemomtamesen. Pilatusam era owe bet asisimomes aporen. Ararawa, setep ajarisiemes owe ajateporen. “Tare, dere Yahudi owe araja ipit basurumemomtam akot ape?” Emes atakam aesimen.

¹¹ Allah Tame pak baem owe dayturawa, atakam era owe tanane akoromesen. “Tare Barabas basurumemom, atakam Pilatus ajanimay. Are Yesus basurumjisim bas.” Emes atakam aesimtamesen. Era owerawa, Pilatus emes atakam ajanimesen.

¹² Pilatus arawa, atakam era owe tanane aokoromen. “Tare, ‘Yesus, Yahudi araja ipit,’ emes atakam aesimemakam. Dere, ara Ipit wama tamen pak emtey?” Emes atakam aesimen.

¹³ Era owerawa, atakam afaketaaesen. “Yesus, salib wus oup atatopomey!” Emes atakam aesimesen.

¹⁴ Pilatus arawa, “Ara Ipit wama asan pota pak eme?” Emes atakam aesimen. Era owerawa, atakam daytu afaketaaesen. “Ara Ipit salib wus oup atatopomey!” Emes atakam aesimesen.

¹⁵ Emesare, Pilatus era owe tanane jak akot baporeememom aememen. Ararawa, Barabas era owe asurumemomtamen. Are Yesus wusup bata atakam asakamtame, wanam Armat Ipit salib wus oup batatopom era owe aotasimemomtamen.

Tentara owe Yesus wote awotomes atakam

¹⁶ Emesare. Tentara owe, Yesus gubernur tame bomon atoomjiiesen. Erarawa, wan tentara owe takes ajatesen.

¹⁷ Ara tentara baju jirao esakam Yesus ajiimemomesen. Are fa aptam sinim ataeres, wanam kuus bajiimapom pi asiapomesen. Erarawa, Yesus kuus ajiimapomesen.

¹⁸ Are atakam Armat Ipit akoromesen. “Yahudi owe araja Ipit akote! Dare Tuhan tere aeommarom!” Emes atakam aesima ajaiesen.

¹⁹ Are wus kope Yesus kuus wusup ajapera ajiesen. Besaam Armat Ipit damo ajiepirima ajiesen. Are Yesus pas tere aeomajies, Armat Ipit bipu jindi andaepuapa ajiesen.

²⁰ Yesus wote awotomesen. Wote awotomkoromes arawa, are abaju esakam jirao asumtaeres, wanam apakaian Armat Ipit aojiimemomesen. Erarawa, Yesus salib wus oup batatopom atomasesen.

Owe Yesus salib wus oup ataetopomes atakam

²¹ Era waut, Kirene saman ipit juas Simon awotejamtaeresen. Armat ipit, Aleksander anama Rufus aritipitin. Are akebun aedaen. Erarawa, tentara owe, Simon Yesus salib bataetam andanomesen.

²² Ararawa, Yesus, asan juas Golgota aesomasesen. “Golgota” daatakam jow bauumtaer “Dambir Owe Kuus Emak Asan,” emes tamen are.

²³ Bonak ere, are asesa anggur bwiam, wus tapi juas muram, takan ambetemesemesen. Era bwi Yesus batetam aempores apoken. Armat Ipit era bwi banda pota ajien.

²⁴ Erarawa, Yesus salib wus oup ataetopomesen. Armat Ipit pakaianam ataeresen. Wanam are eka koser andaetaatiiesen. Era eka koser aemtas pak baporomtam pak araren. (Ara pak judi ajiemas). Era pak aemes Yesus apakaian, sai bajamsaiamot jipu paken.

²⁵ Emesare, jam 9 tom, Yesus salib wus oup ataetopomesen.

²⁶ Oweam, Yesus jaos aeme pak aeapomesen. Era atakam ere, “Ara Ipit, Yahudi owe araja Ipit arare.” Emes atakam aeapomesen.

²⁷ Era asan, pak tasa baetaa ipit amnukam salib wus oup ataetopomesen. Wan ipit Yesus bo poman apa salib wus oup ataetopomesen. Wan ipit ere Yesus tamo poman apa salib wus oup ataetopomesen.

²⁸ [Era aemes pak, Alkitab atakam jipu. Alkitabam, “Owe, Armat Ipit, jokoman ipit tamen,” Emes atakam akorem.]

²⁹ Era asan aokorefea ajies owe, kuus apapaia, kuus apapaia ajieteteresen. Tame atakam Yesus ameteta ajiesen. “Wore atakam akorem, ‘Dere Allah Tame atietiitemin, wanam bare bamintep Dere era tame aoeapomtemin.’ Emes atakam aesimem.

³⁰ Wore emes fiak pak aemomem apaye, Womba ajoremey! Ara salib wus oup akorndaey!” Emes atakam aesimesen.

³¹ Allah Tame pak baem owe daytuam, Musa Basakamtam Atakam baememtam oweam, emes taka aemesen. Are armamon, Yesus wote awotomesen. “Ara Ipit wan owe ajortaere. Me, Amba ere, baemejorem asan apok.

³² Are Allah Aeremtaere Ipit aaren. Are Israel owe araja Ipit aaren. Are emes Ipit aememar apaye, ara salib wus oup ombo takorndaeto. Are emes aemto, dare Armat Ipit eemnak ambesemkoromtemarom.” Emes atakam aesimesen. Yesus salib wus oup takan aentepemis ipit amnuk ere, atakam pota Armat Ipit akoromemisen.

Yesus dambir ateme atakam

³³ Emesare. Jok jam 12 aememes, era tapirmi takes jiiti atamtiien. Jam 3rawa, sare aosaramtiien.

³⁴ Jam 3rawa, Yesus atakam afaketaeren. “Eloi, Eloi, lama sabaktani!” Emes atakam aesimen. Era atakam, daatakam jow bauumtaer, “DeAllah! DeAllah! Wore beken apa jiosmanim?” Emes atakam aesimen.

³⁵ Wan aememes oweam, Armat Ipit akore atakam jane ajiesen. Ararawa, “Era atakam jane pajiay. Are Elia jatem.” Emes atakam aesimesen.

³⁶ Jipit takaam ja akukose, wanam bwi basietaen pak ambartaeren. Era pak, asesa anggur bwi basietaen pak. Era pak wus bimak asimapome, erarawa Yesus era bwi bafamtukum, okonepu ataetemetemtamen. Atakamam ameteesimen. Atokomenao! “Are Elia basurumdaemtam apaye atoporamo.” Emes atakam aesimen.

³⁷ Emesare. Yesus atakam daytu afakendaemen. Erarawa, dambir atatepen.

³⁸ Allah Tame jimsap kainam oup aetare, bap atarendaekoromen.

³⁹ Tentara kapar ipit takaam, Yesus salib setep aememe, Yesus dambir aeme aporen. “Ara ipit Allah Andepnak.” Emes atakam aesimen.

⁴⁰ Era asan, tapes, bi bapor, setep apok aemeporesen. Era aememes tapes bomon, Maria Magdalena. Salome. Kope Yakobus anama Yoses arsoot juas Maria. Emes tapes aememesen.

⁴¹ Bonaknak, Yesus Galilea tapirmi aememaarir, era tapes Armat Ipit ajamkaiaarisin. Are pak Armat Ipit afaafetamaarisin. Wan tapes tananeam, Yesus Yerusalem takan ajamdaesen. Era tapesam Yesus dambir ateme asanpu aememesen.

Yusuf, dambir ipit eka jipa bomon aputaetiie atakam

^42-43 Emesare. Ju atien. Erarawa, Arimatea tapirmi ipit juas Yusuf ajinaoen. Yahudi Agama Atakam Bajamsakamtii Owe wan ipit taka araren. Owe takes armat ipit tere aeomesen. Armat ipitam Allah aowe aomepto, banamek apemaaririn. Emesare, era bare, Pak Bafaafe Bareen. Ajoferawa, Yahudi Owe Samayen Bareen. Erarawa armat ipit jak fiak aememe, wanam Pilatuspu ambaremen. Ararawa, dambir ipit bataer, atakam Pilatus ajanimen.

⁴⁴ Pilatus era atakam ajanime pak jane ajie, are Yesus dambir fef aeme, jinim bay aeen. Ararawa, tentara kapar ipit ajate, wanam ajateporen. “Yesus dambir eteemare?” Emes atakam aesimen.

⁴⁵ Tentara kapar ipit arawa, “Emesare, dambir ainam aemar.” Emes atakam aesimtamen. Pilatus emes atakam jane ajierawa, Yusuf dambir ipit bataer, asesetamen.

⁴⁶ Erarawa, Yusuf, akot kain ajite, wanam Yesus dambir ipit bap asurumdaemen. Ararawa, dambir ipit era kain biramo ajikitiien. Bonak ere, are fami bomon eka jipa adambir asan aeapomen. Yusufam Yesus dambir ipit eka jipa bomon aputaetiien. Era eka jipa bomon aputaetiierawa, wan eka pwe, jipa jim apaparamemomen.

⁴⁷ Maria Magdalena, Yosias arsoot juas Maria, Yesus dambir ipit ajitaetiie asan bi aporesen.