LUKAS 3 - ALLAH AKOT ATAKAM

Yohanes Owe Bwi Bakupimtaer Ipit atakam akoretame atakam

¹ Emesare. Kaisar Tiberius raja daytu tahun 15 aememaaririn. Pontius Pilatusam, Yudea tapirmi gubernur ipitin. Herodesam, Galilea tapirmi raja kopeen. Areot Filipus arawa, Ituria tapirmi anama Trakonitis tapirmi, raja kopeen. Lisaniasam, Abilene tapirmi raja kopeen.

² Hanas anama Kayafas, Allah Tame pak baem daytinak ipit amnuken. Era owe emes aememes ere, Sakaria andep juas Yohanes, tame apok asan aememen. Allaham, Yohanes, aatakam bakoretam, atakam asakamtamen.

³ Me Yohanes arawa, Yordan ju tapirmi takes ajaremen. Are atakam akoretamen. “Tanom tadosa takes bamakemteteray. Allah atakam ji aeay. Owerawa, bwi tara bakupimtaertetertan. Erarawa Allah tadosa bimak binip ajanimemtamteman.” Emes atakam aesimen.

⁴ Era pak, Allah atakam bakoretam ipit juas Yesaya aeapome atakam jipu. Emesare, armat ipit emes atakam aeapome: “Jipit taka, tame apok asan atakam afaketaatem. ‘Me Tuhan ajarto bokotpu akenemtiiay. Era bokotam imtuuar.

⁵ Era fami atakuapaespu takes akakapiaptetertem. Era daytu fami takesam, era koser fami takesam, apandaetetertem. Era jaos asan takes, turu aemamestem. Era bai asan tetakue takes, awar aemamestem.

⁶ Asamot owe takesam Allah era owe ajortaerto pak aportemas.’ Era ipit emes atakam aesimtem.” Yesaya emes atakam akoren.

⁷ Owe tananenak Yohanes bwi aobakupimtaer ajukusirendaesen. Armat ipit arawa, atakam era owe akoromen. “Amber jii kosere! Tare Allah ajurusumto pak ombare baesos atakam tao koretaman?

⁸ Baporay! Tare tadosa takes ambakemmakam apaye, ere Allah atakam ji aemakam, owe aporomtamay. Tanom, ‘Abraham darerokor,’ emes bimak binip batetaram bas. Baporay! Allah, ara aemansa eka, Abraham arurupis bajaorejim, emes fiak pak aoemommar.

⁹ Emesare, waa, sai, wus tamao setepkope aemapem. Jipit taka era akot eek bape apok wus ambatiitem. Are era wus jisimak bomon akoromtukumtem.” Yohanes emes atakam aesimen.

¹⁰ Era owe tananerawa, Yohanes ajateporesen. “Dare ere, wama akot pak emtam?” Emes atakam aesimesen.

¹¹ Armat ipit arawa, atep ajiten. “Era baju jamnuk owe, baju apok owe sai basaietamtas. Wanam era amos aptam owe, emes tamen baemtas.” Emes atakam aesimen.

¹² Pemerintah uang bataajanimtam karai oweam, Yohanes bwi aobakupimtaer ajinaomesen. Are atakam, armat ipit akoromesen. “Guru! Dare wama akot pak emtam?” Emes atakam aesimesen.

¹³ Armat ipit arawa, “Tare pemerintah atakam tara asakamtaman uang taka ataajanimtamay. Bakakaim bas.” Emes atakam aesimen.

¹⁴ Tentara oweam ajateporesen. “Dare ere, wama akot pak emtam?” Emes atakam aesimesen. Armat ipit arawa, “Owe pak, ban batatapimtaa bas. Owe pak bataer, pote atakam bakore bas. Me tagaji pak takes jak akot aemomatay.” Emes atakam aesimen.

¹⁵ Emesare. Owe tanane Yohanes jiirey aeesen. “Me Yohanes, Allah Aeremtaere Ipit ar apaye.” Emes bimak binip atetaramesen.

¹⁶ Yohanes arawa, atakam era owe takes aokoromen. “Dere bwi tara akupimtaermin. Me defe asaramtan Ipit ere, owe juas aptam Ipit. Dere juas apok. Erarawa dere Armat ipit sendal baemesurumtam asan apok. Me, Armat Ipit ere, Allah Jip anama jisimak tara akupimteman.

¹⁷ Armat Ipit ofe pu aemapomum. Are amos apimi bafamdaemam, era amos tame batoomdaeam, aememem. Ararawa, era apimi, jisimak ambomtiitem. Era jisimak ere, baemesapiames asan apok.” Emes atakam aesimen.

¹⁸ Emesare, armat ipit wan ataane tanane era owe aoweomen. Are Allah Akot Atakam era owe akoretamen.

¹⁹ Yohanes, raja kope juas Herodes, era Herodes arepot aremo aeme pak aporen. Are Herodes aemaarir pota pak tananeam aporen. Erarawa are Herodes ajatemotaeren.

²⁰ Herodes arawa, wan pota pakam aokaimen. Era pota pak ere, are Yohanes buji tame bomon ajiitaapomen.

Yohanes, Yesus, bwi akupimtaere atakam

²¹ Bonak ere, Yohanes, era asan aememes owe takes, bwi akupimtaera ajaien. Era owe takes bwi akupimtaererawa, are Yesusam bwi akupimtaeren. Yesus, atakam Allah ajanime ere, era wonamo oup ambuetepen.

²² Allah Jip arawa, sakao saii tamen, Yesus damo ten andaepiapen. Allaham atakam akorendaemen. “Wore deTii. Dere Wora afaimommin. Era aemmarem pak, ere akotnak.” Emes atakam aesimen.

Yesus arfais owe bajititimar atakam

²³ Emesare. Yesus era bonaknak karai aeme, Armat Ipit aumur tahun 30 ajiire apaye aememen. Owe, Yesus, Yusuf andep emes aren. Me Yusuf arawa, Eli andepen.

²⁴ Me Eli, Matat andepen. Me Matat, Lewi andepen. Me Lewi, Malki andepen. Me Malki, Yanai andepen. Me Yanai, Yusuf andepen.

²⁵ Me Yusuf, Matica andepen. Me Matica, Amos andepen. Me Amos, Nahum andepen. Me Nahum, Hesli andepen. Me Hesli, Nagai andepen.

²⁶ Me Nagai, Maat andepen. Me Maat, Matica andepen. Me Matica, Simei andepen. Me Simei, Yosek andepen. Me Yosek, Yoda andepen.

²⁷ Me Yoda, Yohanan andepen. Me Yohanan, Resa andepen. Me Resa, Serubabel andepen. Me Serubabel, Sealtiel andepen. Me Sealtiel, Neri andepen.

²⁸ Me Neri, Malki andepen. Me Malki, Adi andepen. Me Adi, Kosam andepen. Me Kosam, Elmadam andepen. Me Elmadam, Er andepen.

²⁹ Me Er, Yesua andepen. Me Yesua, Elieser andepen. Me Elieser, Yorim andepen. Me Yorim, Matat andepen. Me Matat, Lewi andepen.

³⁰ Me Lewi, Simeon andepen. Me Simeon, Yehuda andepen. Me Yehuda, Yusuf andepen. Me Yusuf, Yonam andepen. Me Yonam, Elyakim andepen.

³¹ Me Elyakim, Melea andepen. Me Melea, mina andepen. Me Mina, Matata andepen. Me Matata, Natan andepen. Me Natan, Daut andepen.

³² Me Daut, Isai andepen. Me Isai, Obed andepen. Me Obed, Boas andepen. Me Boas, Salmon andepen. Me Salmon, Nahason andepen.

³³ Me Nahason, Aminadab andepen. Me aminadab, Admin andepen. Me Admin, Arni andepen. Me Arni, Hesron andepen. Me Hesron, Peres andepen. Me Peres, Yehuda andepen.

³⁴ Me Yehuda, Yakub andepen. Me Yakub, Ishak andepen. Me Ishak, Abraham andepen. Me Abraham, Terah andepen. Me Terah, Nahor andepen.

³⁵ Me Nahor, Serug andepen. Me Serug, Rehu andepen. Me Rehu, Peleg andepen. Me Peleg, Eber andepen. Me Eber, Salmon andepen.

³⁶ Me Salmon, Kenan andepen. Me Kenan, Arpaksad andepen. Me Arpaksad, Sem andepen. Me Sem, Nuh andepen. Me Nuh, Lamek andepen.

³⁷ Me Lamek, Metusalah andepen. Me Metusalah, Henok andepen. Me Henok, Yared andepen. Me Yared, Mahalaleel andepen. Me Mahalaleel, Kenan andepen.

³⁸ Me Kenan, Enos andepen. Me Enos, Set andepen. Me Set, Adam andepen. Me Adam, Allah andepen. Emesare.