EFESUS 5 - ALLAH AKOT ATAKAM

Turunak Owe baememkorom atakam

¹ Tare Allah arereis. Armat Ipitam tara afaimeman. Erarawa tare Armat Ipit tamen ajamememay.

² Tanom owe afaimay— Kristus dara afaimero emes tamena. Are dambir atemtamero. Are dambir atemtamero. Era dambir atemtamero pak, ere, pinim akotnak pak, Allah jis bajaatam pak emes tamen are.

³ Emsare, tare Allah aowe. Erarawa tare tani tamane bajamdamat bas. Asan pota pak kupis takes emtakam. Pak bataet bimak binip batetaram taka bas. Tare emes baem apoknak aememay. Bambi atakam taka bakore anom bas.

⁴ Tanom asan pota atakam bas. Bambi atakamam bas. Asan pota wote atakamam bas. Era pak takes potanak. Tare ere, terima kasih atakam Allah akoromaaray.

⁵ Emesare, tare emes pak baemporkoromay: Tani tamane bajamdamat oweam, asan pota oweam, pak bataet bimak binip batetaram taka oweam, Kristus anama Allah aobaomep owe baemeemem asan apok. (Pak bataet bimak binip batetaram taka, ere eto basitim emes tamen are.)

⁶ Emes pak baem owe, Allah atakam aoomas. Erarawa, Allah era owe ajurusumtem. Emesare, owe era pak bambi atakam tara bakoretam bas. Are era pak potet tara batutum bas.

⁷ Tanom era pota pak baem owe, bakaiem bas.

⁸ Bonak ere, tare jiiti owe aememaarukum. Waa ere, tare Tuhan aowe. Tare soro owe aememekem. Emesare, tare soro owe pak jipu pak aememaaray.

⁹ Emesare, soro owe, akot pak takesam, turu pak takesam, aememmas. Are atakamnak akorekoromemas.

¹⁰ Emesare, tanom Tuhan akot apormar pak bapor, jati daytu aeporay.

¹¹ Tanom era jiiti pak baem bas. Era jiiti pak, ere bambi pak erare. Tanom era jiiti pak baso aporomay.

¹² Owe era jiiti pak aememas, era pak tiruu aememas. Era pak damke paknak erare. Danom era pak atakam bamkoreji apoka.

¹³ Me, owe era jiiti pak baso aporomemtas, owe era jiiti pak potanak aportemas.

¹⁴ Emesare, era baso aporomemtas pak takes, sare ajaoremtemas. Erarawa, Allah emes atakam akorem: “Me tare ise aemamsekem owe, bawasitay. Me tare dambir owe, bajaorwasitay. Kristusam sare tapu asaramtiitem.” Emes atakam akorem.

¹⁵ Erarawa, era aemmakam pak turunak aemkoromay. Tare bimak binip baso owe aememay. Bimak binip jiiti owe baemem bas.

¹⁶ Ara aemansa bareiin, owe potanak pak aememas. Erarawa, tare akot pak baem asan akot aportakam, era akot pak aemay.

¹⁷ Tanom janda baemap bas. Tare Tuhan era akot apormar pak aporkoromporay.

¹⁸ Tanom bir bwi banda jaytu bapie bas. Era bir bwi banda jaytu bapie owe, asan pota aemememas. Me, Allah Jip tara baemomemkoromteteraartan.

¹⁹ Tare Tuhan basitim soam, Tuhan atakam soam, Allah Jip atetammar soam, tarmamon ajamkoromay. Me Tuhan atakam soam, Ara basitim soam, jak akot tere Tuhan aeomay.

²⁰ Tanom Daritipit Allah, era atetamman pak takes terima kasih atakam Armat Ipit akoromaaray. Tare Yesus daTuhan ajamkaimakam apormakam are.

Armo ipitam, aremoam, asan akot bajamemam atakam

²¹ Tare Kristus eemnak ambesemkorommakam. Erarawa tarmamon, atakam ji ajameaamay.

²² Tapese! Tambis atakam ji aeay— tare Tuhan atakam ji aemakam emes tamena.

²³ Emesare, aremo era armo ipit ban ten are— ere Kristus basitim bajarisiap owe Kristus ban ten aemapmas emes tamen are. Armat Ipit era owe abajortaer ipit. Era oweam Kristus adamo tamen are.

²⁴ Me Kristus basitim bajarisiap owe, Armat Ipit atakam ji aeemas. Tapesam ambiis atakam ji emes tamen baekoromtas.

²⁵ Oorey owee! Tatapesti afaimay— Kristus, Ara basitim bajarisiap owe afaimemar emes tamena. Emesare, Armat Ipit dambir era owe atemtame.

²⁶ Era dambir ateme pak, era owe, turu baemapomtam pak. Armat Ipitam, aatakam era owe bwi emes tamen aetame. Erarawa Are era owe atet apok aetame.

²⁷ Era pak takes, Ara basitim bajarisiap owe, owe akotnak abipu bataemom are. Ere, are era owe atet pak aptam apokam, daso bai aptam apokam, wan pota pak aptam apokam, abipu bataemom are. Emesare, era owe, owe turunakam, bwi fef apok oweam, abipu bataemom are.

²⁸ Oorey oweam, atapesti emes tamen bafaimtas. Are atapesti, adamo emes tamen bafaimtas. Me aremo bafaim ipit, adamo amba afaimeme.

²⁹ Owe ere, adamo bifane bafeomem apoknak aememas. Are adamo jokey ajiemas. Are adamo asan akot aememas. Ere Kristus Ara basitim bajarisiap owe asan akot aemmar emes tamena.

³⁰ Emesare, dare Armat Ipit adamo anakot poman pak kupis emes tamen aemapom.

³¹ Me Alkitabam: “Erarawa, jipit era aritipitam, arsootam, beken bajiosto. Are aremo takan baemapto. Era toatipitam, damo taka bajaoremtamis.” Emes atakam akorem.

³² Emes atakam, bomonnak atakam akot. Debimak binip ere, era atakam Kristus anama Yesus basitim bajarisiap owe atakam are.

³³ Me, era atakam tare poreemema ajiekem atakamam are. Tadamo tamba afaimtetermakam. Erarawa tanom tatapesti emes tamen afaimteteray. Tapesam ambiis basitimtas.